Mysore Sandal Soap - ನಮ್ಮವರನ್ನು ಬಿಟ್ಟು ತಮನ್ನಾ ಯಾಕೆ? ಯಶ್, ರಶ್ಮಿಕಾ ಕೇಳಿದ್ರೆ ಖುಷಿಯಿಂದ ಮಾಡಿಕೊಡ್ತಿದ್ರು!!

ಕರ್ನಾಟಕದ ಹೆಮ್ಮೆಯ ಗುರುತಾದ 'ಮೈಸೂರು ಸ್ಯಾಂಡಲ್ ಸೋಪ್' ಪ್ರಚಾರಕ್ಕಾಗಿ ನಟಿ ತಮನ್ನಾ ಭಾಟಿಯಾ ಅವರನ್ನು ರಾಯಭಾರಿಯನ್ನಾಗಿ ನೇಮಿಸಿರುವುದಕ್ಕೆ ಆರ್. ಅಶೋಕ್ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. ಈ ಪ್ರಚಾರಕ್ಕಾಗಿ ಸರ್ಕಾರ 2 ಕೋಟಿ ರೂಪಾಯಿ ನೀಡಿದೆ ಎಂದು ಆರೋಪಿಸಿರುವ ಅವರು, "ನಮ್ಮ ಕನ್ನಡದ ಕಲಾವಿದರು ಯಾರೂ ಸರ್ಕಾರಕ್ಕೆ ಸಿಗಲಿಲ್ಲವೇ?" ಎಂದು ಪ್ರಶ್ನಿಸಿದ್ದಾರೆ. ರಶ್ಮಿಕಾ ಮಂದಣ್ಣ ಅವರಂತಹ ಖ್ಯಾತ ನಟಿಯರು ಅಥವಾ ಯಶ್ ಮತ್ತು ರಾಧಿಕಾ ಪಂಡಿತ್ ಅವರಂತಹ ದಂಪತಿಗಳಿಗೆ ಈ ಜವಾಬ್ದಾರಿ ನೀಡಿದ್ದರೆ ಅವರು ಹೆಮ್ಮೆಯಿಂದ ಮಾಡುತ್ತಿದ್ದರು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಜನರ ತೆರಿಗೆ ಹಣವನ್ನು ಪರಭಾಷಾ ನಟಿಯರಿಗೆ ನೀಡುವ ಮೂಲಕ ಸರ್ಕಾರ ದುಂದುವೆಚ್ಚ ಮಾಡುತ್ತಿದೆ ಎಂಬುದು ಅವರ ಪ್ರಮುಖ ಆರೋಪ.

'ಸೇವ್ ಮೈಸೂರು ಸಿಲ್ಕ್' ಅಭಿಯಾನ

ಮೈಸೂರು ರೇಷ್ಮೆಯ ಪರಂಪರೆಯನ್ನು ಉಳಿಸಲು 'ಸೇವ್ ಮೈಸೂರು ಸಿಲ್ಕ್' ಅಭಿಯಾನವನ್ನು ಪ್ರಾರಂಭಿಸುವುದಾಗಿ ಅಶೋಕ್ ಘೋಷಿಸಿದ್ದಾರೆ. ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರು 112 ವರ್ಷಗಳ ಹಿಂದೆ ದೂರದೃಷ್ಟಿಯಿಂದ ಸ್ಥಾಪಿಸಿದ ಈ ಸಂಸ್ಥೆಗಳು ಇಂದು ನಿರ್ಲಕ್ಷ್ಯಕ್ಕೆ ಒಳಗಾಗುತ್ತಿವೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. ವಿದೇಶದಿಂದ ಯಂತ್ರೋಪಕರಣ ತಂದು ರೈತರಿಗೆ ಅನುಕೂಲವಾಗಲೆಂದು ಅಂದು ಸ್ಥಾಪಿಸಲಾದ ರೇಷ್ಮೆ ಕಾರ್ಖಾನೆಗಳು ಇಂದು ಆಡಳಿತಾತ್ಮಕ ಹಿನ್ನಡೆ ಅನುಭವಿಸುತ್ತಿವೆ. ಚನ್ನಪಟ್ಟಣದ ಘಟಕದಲ್ಲಿ ತಯಾರಾಗುವ ಸೀರೆಗಳಿಗೆ ವಿಪರೀತ ಬೇಡಿಕೆಯಿದ್ದರೂ, ಅಲ್ಲಿನ ಭೂಮಿಯನ್ನು ಕ್ರೀಡಾಂಗಣಕ್ಕೆ ಪರಭಾರೆ ಮಾಡುತ್ತಿರುವುದು ಸರಿಯಲ್ಲ ಎಂದು ಅವರು ಸರ್ಕಾರದ ನಡೆಯನ್ನು ಖಂಡಿಸಿದ್ದಾರೆ.

ಕೆಎಸ್ಐಸಿ ಮಿಲ್‌ ಎರಡು ಸಾವಿರಕ್ಕೂ ಅಧಿಕ ಜನರಿಗೆ ಉದ್ಯೋಗ ಒದಗಿಸಿದೆ. ಇಂತಹ ಜಾಗವನ್ನೇ ಕ್ರೀಡಾಂಗಣ ನಿರ್ಮಿಸಲು ಬಳಸಿಕೊಳ್ಳುತ್ತಿರುವುದು ಖಂಡನೀಯ. ಕ್ರೀಡಾಂಗಣಕ್ಕಾಗಿ ಅಮೂಲ್ಯ ಗಿಡ ಮರಗಳನ್ನು ಕಡಿಯಲು ಉದ್ದೇಶಿಸಲಾಗಿದೆ. ಸರ್ಕಾರ ಈ ಕೂಡಲೇ ತನ್ನ ನಿರ್ಧಾರದಿಂದ ಹಿಂದೆ ಸರಿಯಬೇಕು.

- ಶ್ರೀ @RAshokaBJP, ಪ್ರತಿಪಕ್ಷ ನಾಯಕರು… pic.twitter.com/sDh6KXeq9w

ALSO READ

ಮೈಸೂರು ಸ್ಯಾಂಡಲ್ ಸೋಪ್‌ಗೆ ತಮನ್ನಾ ಭಾಟಿಯಾ ರಾಯಭಾರಿ

ಸ್ಯಾಂಡಲ್ ಸೋಪ್ ರಾಯಭಾರಿಗೆ - ಕನ್ನಡ ನಟಿಯರನ್ನು ಬದಿಗಿಟ್ಟಿದ್ದು ಯಾಕೆ ಅಂದರೆ!!

— BJP Karnataka (@BJP4Karnataka) February 27, 2026

ಇತಿಹಾಸ ಮತ್ತು ರಾಜಕೀಯ ಸಂಘರ್ಷ

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮೈಸೂರು ಮಹಾರಾಜರ ಕೊಡುಗೆಯನ್ನು ಕಾಂಗ್ರೆಸ್ ನಾಯಕರು ಗೌರವಿಸುತ್ತಿಲ್ಲ ಎಂದು ಟೀಕಿಸಿದ್ದಾರೆ. ಕೆಆರ್‌ಎಸ್ ಡ್ಯಾಂ ನಿರ್ಮಿಸಿದ ಮಹಾರಾಜರ ಹೆಸರಿಗಿಂತ ಟಿಪ್ಪು ಸುಲ್ತಾನ್ ಹೆಸರನ್ನು ಮುನ್ನೆಲೆಗೆ ತರುತ್ತಿರುವ ಸಚಿವ ಮಹದೇವಪ್ಪ ಅವರ ಹೇಳಿಕೆಗಳಿಗೆ ಅಶೋಕ್ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಮದುವೆ ಮತ್ತು ಧಾರ್ಮಿಕ ಕಾರ್ಯಗಳಲ್ಲಿ ಪವಿತ್ರವೆಂದು ಭಾವಿಸುವ ಮೈಸೂರು ಸಿಲ್ಕ್ ಸೀರೆಗಳಿಂದ ಸರ್ಕಾರಕ್ಕೆ 96 ಕೋಟಿ ರೂಪಾಯಿ ಲಾಭ ಬರುತ್ತಿದ್ದರೂ, ಅದರ ಮೂಲ ಸೌಕರ್ಯಗಳನ್ನು ರಕ್ಷಿಸುವಲ್ಲಿ ಸರ್ಕಾರ ವಿಫಲವಾಗಿದೆ ಎಂದಿದ್ದಾರೆ.

ಉದ್ಯೋಗ ಭರ್ತಿ ಮತ್ತು ಮುಂದಿನ ಹೋರಾಟ

ರಾಜ್ಯದಲ್ಲಿ ಖಾಲಿ ಇರುವ ಸುಮಾರು 2.84 ಲಕ್ಷ ಹುದ್ದೆಗಳನ್ನು ಭರ್ತಿ ಮಾಡುವಂತೆ ಸರ್ಕಾರಕ್ಕೆ ಅವರು ಆಗ್ರಹಿಸಿದ್ದಾರೆ. ಕೇವಲ 50 ಸಾವಿರ ಹುದ್ದೆಗಳ ಭರ್ತಿಯ ಘೋಷಣೆಯಿಂದ ತಾವು ತೃಪ್ತರಾಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಮಾರ್ಚ್ 6 ರಿಂದ ನಡೆಯಲಿರುವ ಸದನದಲ್ಲಿ ಈ ಎಲ್ಲಾ ವಿಷಯಗಳ ಕುರಿತು ಚರ್ಚೆ ನಡೆಸುವುದಾಗಿ ಮತ್ತು ಸರ್ಕಾರದ ನಿರ್ಧಾರಗಳ ವಿರುದ್ಧ ಸದನದ ಒಳಗೆ ಹಾಗೂ ಹೊರಗೆ ಹೋರಾಟ ಮಾಡುವುದಾಗಿ ಅಶೋಕ್ ಎಚ್ಚರಿಕೆ ನೀಡಿದ್ದಾರೆ. ಹುಬ್ಬಳ್ಳಿಯಿಂದ ಬೆಂಗಳೂರಿಗೆ ಹಮ್ಮಿಕೊಂಡಿದ್ದ ಪಾದಯಾತ್ರೆಯನ್ನು ಸದ್ಯಕ್ಕೆ ಮುಂದೂಡಲಾಗಿದ್ದರೂ, ಸರ್ಕಾರದ ಮುಂದಿನ ಕ್ರಮಗಳನ್ನು ಗಮನಿಸಿ ಹೋರಾಟ ರೂಪಿಸುವುದಾಗಿ ಅವರು ತಿಳಿಸಿದ್ದಾರೆ.