ಬೆಂಗಳೂರು: ಸರ್ಕಾರಿ ಇಲಾಖೆಗಳಲ್ಲಿ ಕೆಲಸ ಮಾಡಿ ರಿಟೈರ್ಡ್ ಆಗೋದು ಅಂದ್ರೆ ಅದೊಂದು ರೀತಿ ಮಿಕ್ಸೆಡ್ ಎಮೋಷನ್. ಆದ್ರೆ, ದಿನವಿಡೀ ಸ್ಟೀರಿಂಗ್ ಹಿಡಿದು, ನೂರಾರು ಪ್ರಯಾಣಿಕರ ಪ್ರಾಣವನ್ನ ಕೈಯಲ್ಲಿ ಹಿಡಿದು ಸೇಫ್ ಆಗಿ ಜರ್ನಿ ಮಾಡಿಸೋ ಬಸ್ ಡ್ರೈವರ್ ಒಬ್ಬರ ನಿವೃತ್ತಿ ಕ್ಷಣ ಮಾತ್ರ ಇಡೀ ಸೋಶಿಯಲ್ ಮೀಡಿಯಾವನ್ನು ಭಾವುಕವಾಗಿಸಿದೆ. ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯಲ್ಲಿ (KSRTC) ಬರೋಬ್ಬರಿ 34 ವರ್ಷಗಳ ಕಾಲ ಯಾವುದೇ ಅಪಘಾತವಿಲ್ಲದೆ, ಸುದೀರ್ಘ ಮತ್ತು ಯಶಸ್ವಿ ಸೇವೆ ಮುಗಿಸಿ ನಿವೃತ್ತರಾದ ಚಾಲಕರೊಬ್ಬರ ಅತ್ಯಂತ ಹೃದಯಸ್ಪರ್ಶಿ ವಿಡಿಯೋವೊಂದು ಇಂಟರ್ನೆಟ್‌ನಲ್ಲಿ ಸಖತ್ ವೈರಲ್ ಆಗ್ತಿದೆ.
ಇಷ್ಟು ವರ್ಷ ತಮಗೆ ಮತ್ತು ತಮ್ಮ ಕುಟುಂಬಕ್ಕೆ ಅನ್ನ ನೀಡಿದ ಕೆಎಸ್‌ಆರ್‌ಟಿಸಿ ಬಸ್ಸಿನ ಸ್ಟೀರಿಂಗ್ ಮುಟ್ಟಿ, ಕೈಮುಗಿದು, ಮುತ್ತಿಕ್ಕಿ ಕಣ್ಣೀರಿಟ್ಟ ಆ ಹಿರಿಯ ಚಾಲಕನ ಕರ್ತವ್ಯ ನಿಷ್ಠೆಗೆ ನೆಟ್ಟಿಗರು ಫಿದಾ ಆಗಿದ್ದು, ಪ್ರೀತಿಯಿಂದ ಸಲ್ಯೂಟ್ ಹೊಡೆಯುತ್ತಿದ್ದಾರೆ.
ಕಣ್ಣೀರಾದ ಸಾರಥಿ: ಸ್ಟೀರಿಂಗ್ ಚಕ್ರವೇ ಇವರ ಪಾಲಿನ ದೇವರು!
ವೈರಲ್ ಆಗಿರುವ ಆ ಪುಟ್ಟ ವಿಡಿಯೋದಲ್ಲಿ, ಸಾರಿಗೆ ಸಂಸ್ಥೆಯ ಹಿರಿಯ ಚಾಲಕರೊಬ್ಬರು ತಮ್ಮ ಕೊನೆಯ ದಿನದ ಡ್ಯೂಟಿ ಮುಗಿಸಿ ಬಸ್ ಇಳಿಯುವ ಮುನ್ನ ಸೀಟಿನಲ್ಲೇ ಕುಳಿತು ಭಾವುಕರಾಗಿದ್ದಾರೆ. ತಾವು ದಿನನಿತ್ಯ ಉಸಿರಿನಂತೆ ಚಲಾಯಿಸುತ್ತಿದ್ದ ಕೆಎಸ್‌ಆರ್‌ಟಿಸಿ ಬಸ್ಸಿನ ಸ್ಟೀರಿಂಗ್ ಚಕ್ರವನ್ನು ಅತ್ಯಂತ ಭಕ್ತಿಯಿಂದ ಎರಡು ಕೈಗಳಿಂದ ಮುಟ್ಟಿ ಕಣ್ಣಿಗೆ ಒತ್ತಿಕೊಳ್ಳುತ್ತಾರೆ.
ಬಳಿಕ ಅದಕ್ಕೆ ಪ್ರೀತಿಯಿಂದ ಮುತ್ತಿಕ್ಕಿ, ಇಷ್ಟು ವರ್ಷಗಳ ಕಾಲ ಯಾವುದೇ ತೊಂದರೆ ಇಲ್ಲದೆ ನನ್ನನ್ನು ಕಾಯ್ದೆ ಎಂದು ವಾಹನಕ್ಕೆ ನಮನ ಸಲ್ಲಿಸುತ್ತಾರೆ. 34 ವರ್ಷಗಳ ಕಾಲ ತಮ್ಮ ಬದುಕಿಗೆ ಆಸರೆಯಾಗಿದ್ದ ಆ ಸೀಟು ಮತ್ತು ವಾಹನವನ್ನು ಬಿಟ್ಟು ಹೋಗುವ ನೋವಿನಲ್ಲಿ ಅವರ ಕಣ್ಣುಗಳಿಂದ ನೀರು ಧಾರೆಧಾರೆಯಾಗಿ ಹರಿದುಬರುವುದನ್ನು ವಿಡಿಯೋದಲ್ಲಿ ಕಾಣಬಹುದು.
“Going to miss this man” ಎಂದ ನೆಟ್ಟಿಗರು!
ಈ ಅಪೂರ್ವ ಕ್ಷಣವನ್ನು ಅಲ್ಲೇ ಇದ್ದ ಸಿಬ್ಬಂದಿಯೊಬ್ಬರು ಮೊಬೈಲ್‌ನಲ್ಲಿ ಸೆರೆಹಿಡಿದು ಸೋಶಿಯಲ್ ಮೀಡಿಯಾಕ್ಕೆ ಅಪ್ಲೋಡ್ ಮಾಡಿದ್ದಾರೆ. “Going to miss this man” (ಈ ಅದ್ಭುತ ವ್ಯಕ್ತಿಯನ್ನು ನಾವು ಖಂಡಿತ ಮಿಸ್ ಮಾಡಿಕೊಳ್ಳಲಿದ್ದೇವೆ) ಎಂಬ ಶೀರ್ಷಿಕೆಯೊಂದಿಗೆ ಹರಿದಾಡುತ್ತಿರುವ ಈ ವಿಡಿಯೋ, ಬಸ್ ಚಾಲಕರು ತಾವು ದಿನನಿತ್ಯ ಓಡಿಸುವ ವಾಹನದೊಂದಿಗೆ ಎಷ್ಟು ಗಾಢವಾದ ಭಾವನಾತ್ಮಕ ಬಂಧ ಬೆಳೆಸಿಕೊಂಡಿರುತ್ತಾರೆ ಅನ್ನೋದಕ್ಕೆ ಕನ್ನಡಿ ಹಿಡಿದಂತಿದೆ.
ಸಾಮಾನ್ಯವಾಗಿ ಬಸ್ ಡ್ರೈವಿಂಗ್ ಅಂದರೆ ಸುಲಭದ ಮಾತಲ್ಲ. ಟ್ರಾಫಿಕ್, ಮಳೆ, ಗಾಳಿ, ಹಗಲು-ರಾತ್ರಿ ಎನ್ನದೆ ಬಸ್ ಓಡಿಸಬೇಕಿರುತ್ತೆ. ಇವೆಲ್ಲದರ ನಡುವೆ ಆ ವಾಹನವೇ ಅವರಿಗೆ ಮೊದಲ ಮನೆಯಾಗಿಬಿಡುತ್ತದೆ. ಅದನ್ನೇ ಈ ವಿಡಿಯೋ ಸಾಬೀತುಪಡಿಸಿದೆ.
ಚಾಲಕನ ಅಪಘಾತ ಮುಕ್ತ ಸೇವೆಗೆ ಇಂಟರ್ನೆಟ್ ಲೋಕ ಫಿದಾ!
ಸಾಮಾಜಿಕ ಜಾಲತಾಣಗಳಾದ ಇನ್‌ಸ್ಟಾಗ್ರಾಮ್, ಫೇಸ್‌ಬುಕ್ ಮತ್ತು ಎಕ್ಸ್ (ಟ್ವಿಟರ್) ಖಾತೆಗಳಲ್ಲಿ ಈ ವಿಡಿಯೋ ಶೇರ್ ಆಗುತ್ತಿದ್ದಂತೆಯೇ ಲಕ್ಷಾಂತರ ವ್ಯೂಸ್ ಮತ್ತು ಕಮೆಂಟ್‌ಗಳ ಮಹಾಪೂರವೇ ಹರಿದುಬರುತ್ತಿದೆ. ನೆಟ್ಟಿಗರು ಚಾಲಕನಿಗೆ ಗೌರವ ಸಲ್ಲಿಸುತ್ತಾ, ನಿವೃತ್ತ ಜೀವನಕ್ಕೆ ಶುಭ ಹಾರೈಸುತ್ತಿದ್ದಾರೆ.
ನೆಟ್ಟಿಗರ ಕಮೆಂಟ್ಸ್: "34 ವರ್ಷಗಳ ಕಾಲ ಒಂದೇ ಒಂದು ಆಕ್ಸಿಡೆಂಟ್ ಮಾಡದೆ, ಲಕ್ಷಾಂತರ ಜನರನ್ನು ಪ್ರತಿದಿನ ಸುರಕ್ಷಿತವಾಗಿ ಅವರವರ ಊರುಗಳಿಗೆ ಮುಟ್ಟಿಸಿದ ಈ ಸಾರಥಿಯ ಸಾಧನೆ ನಿಜಕ್ಕೂ ಗ್ರೇಟ್. ಇವರಿಗೆ ಸರ್ಕಾರ ದೊಡ್ಡ ಪ್ರಶಸ್ತಿ ನೀಡಬೇಕು," ಎಂದು ಒಬ್ಬರು ಬರೆದಿದ್ದಾರೆ. ಇನ್ನೊಬ್ಬರು, "ಇದು ಅವರಿಗೆ ಕೇವಲ ಕೆಲಸವಾಗಿರಲಿಲ್ಲ, ಅವರ ಪಾಲಿನ ದೇವಸ್ಥಾನವಾಗಿತ್ತು. ಇಂತಹ ಪ್ರಾಮಾಣಿಕ ನೌಕರರು ಇರೋದಕ್ಕೆ ಕೆಎಸ್‌ಆರ್‌ಟಿಸಿ ಸಂಸ್ಥೆ ಇಷ್ಟೊಂದು ಹೆಸರು ಮಾಡಿದೆ," ಎಂದು ಕೊಂಡಾಡಿದ್ದಾರೆ.
ಒಟ್ಟಿನಲ್ಲಿ, ಸದ್ದಿಲ್ಲದೆ ದಶಕಗಳ ಕಾಲ ಸಾರ್ವಜನಿಕರ ಸೇವೆ ಮಾಡಿ ಸದ್ದಿಲ್ಲದೆಯೇ ನಿವೃತ್ತರಾಗುವ ಇಂತಹ ಅದೆಷ್ಟೋ ಕರ್ತವ್ಯನಿಷ್ಠ ಚಾಲಕರಿಗೆ ಈ ವಿಡಿಯೋ ಒಂದು ದೊಡ್ಡ ಗೌರವದ ಸಂಕೇತವಾಗಿ ನಿಂತಿದೆ. ಇವರ ನಿವೃತ್ತ ಜೀವನ ನೆಮ್ಮದಿಯಿಂದ ಕೂಡಿರಲಿ ಅನ್ನೋದೇ ಎಲ್ಲರ ಹಾರೈಕೆ.
Comments
Leave a Comment