ಸುಳ್ಳು ಅಪವಾದಕ್ಕೆ ಬಲಿಯಾದ ಬಿಎಎಂಎಸ್ ವಿದ್ಯಾರ್ಥಿನಿ - ಹೊಳಲ್ಕೆರೆಯಲ್ಲಿ ಬೆಚ್ಚಿಬೀಳಿಸುವ ಘಟನೆ! ಡೆತ್‌ನೋಟ್‌ನಲ್ಲಿ ಏನಿದೆ?

ಮಾನವೀಯತೆ ಮಣ್ಣಾಗಿ ಹೋಗಿದೆಯೇ ಎಂಬ ಪ್ರಶ್ನೆ ಮೂಡುವಂತಹ ಘಟನೆಯೊಂದು ಚಿತ್ರದುರ್ಗ ಜಿಲ್ಲೆಯ ಹೊಳಲ್ಕೆರೆಯಲ್ಲಿ ನಡೆದಿದೆ. ಸುಳ್ಳು ವದಂತಿ ಮತ್ತು ಮಾನಹಾನಿಯ ಪಿತೂರಿಗೆ ಸಿಲುಕಿ, ಪ್ರತಿಭಾವಂತ ವೈದ್ಯಕೀಯ ವಿದ್ಯಾರ್ಥಿನಿಯೊಬ್ಬಳು ತನ್ನ ಜೀವನವನ್ನೇ ಕೊನೆಗಾಣಿಸಿಕೊಂಡಿದ್ದಾಳೆ. ಕೇವಲ 23 ವರ್ಷದ ಲಿಖಿತಾ ಎಂಬಾಕೆ ಅನುಭವಿಸಿದ ಮಾನಸಿಕ ಯಾತನೆ ಈಗ ಇಡೀ ಜಿಲ್ಲೆಯನ್ನೇ ಕಣ್ಣೀರಿಡುವಂತೆ ಮಾಡಿದೆ.

ಹೊಳಲ್ಕೆರೆಯ ಬಸವ ಲೇಔಟ್ ನಿವಾಸಿಯಾದ ಲಿಖಿತಾ (23), ಹೊಸದುರ್ಗ ತಾಲೂಕಿನ ಮಲ್ಲಾಡಿಹಳ್ಳಿ ಆಯುರ್ವೇದ ಕಾಲೇಜಿನಲ್ಲಿ ಬಿಎಎಂಎಸ್ (BAMS) ವ್ಯಾಸಂಗ ಮಾಡುತ್ತಿದ್ದರು. ಆದರೆ, ಕಳೆದ ಕೆಲವು ದಿನಗಳಿಂದ ಕಾಲೇಜಿನ ಪ್ರೊಫೆಸರ್ ಒಬ್ಬರ ಜೊತೆ ಈಕೆಗೆ ಸಂಬಂಧವಿದೆ ಎಂಬ ಕೆಟ್ಟ ವದಂತಿಯನ್ನು ಕಿಡಿಗೇಡಿಗಳು ಹಬ್ಬಿಸಿದ್ದರು. ಈ ಸುಳ್ಳು ಪ್ರಚಾರ ಮತ್ತು ಅದರಿಂದ ಉಂಟಾದ ಅವಮಾನವನ್ನು ತಡೆದುಕೊಳ್ಳಲಾಗದೆ ಲಿಖಿತಾ ತನ್ನ ಮನೆಯಲ್ಲೇ ನೇ*ಣು ಬಿಗಿದುಕೊಂಡು ಆತ್ಮಹ*ತ್ಯೆ ಮಾಡಿಕೊಂಡಿದ್ದಾಳೆ.

ಆತ್ಮಹ*ತ್ಯೆ ಮಾಡಿಕೊಳ್ಳುವ ಮುನ್ನ ಲಿಖಿತಾ ಸುದೀರ್ಘವಾದ ಡೆತ್‌ನೋಟ್ ಒಂದನ್ನು ಬರೆದಿದ್ದಾಳೆ. ಅದರಲ್ಲಿ ತನ್ನ ಸಾವಿಗೆ ಕಾರಣರಾದವರ ಹೆಸರನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾಳೆ. ಕಾಲೇಜಿನ ಪ್ರೊಫೆಸರ್ ಡಾ. ರಾಜು, ಅವರ ಪತ್ನಿ ನಿಶಾ ಹಾಗೂ ಕೆಲವು ಸಹಪಾಠಿ ವಿದ್ಯಾರ್ಥಿನಿಯರು ಸೇರಿಕೊಂಡು ತನ್ನ ವಿರುದ್ಧ ಇಲ್ಲಸಲ್ಲದ ಸುಳ್ಳು ಸುದ್ದಿ ಹಬ್ಬಿಸಿದ್ದಾರೆ ಎಂದು ಆಕೆ ಬರೆದಿದ್ದಾಳೆ. ಇವರ ನಿರಂತರ ಕಿರುಕುಳ ಮತ್ತು ಚಾರಿತ್ರ್ಯ ಹರಣದಿಂದಾಗಿ ತಾನು ಈ ತೀವ್ರ ನಿರ್ಧಾರ ತೆಗೆದುಕೊಳ್ಳುತ್ತಿರುವುದಾಗಿ ಆಕೆ ನೋವಿನಿಂದ ಪತ್ರದಲ್ಲಿ ತಿಳಿಸಿದ್ದಾಳೆ.

ಒಬ್ಬ ವಿದ್ಯಾರ್ಥಿನಿಯ ಗೌರವಕ್ಕೆ ಧಕ್ಕೆ ತರುವಂತಹ ಸುಳ್ಳು ಕಥೆಗಳನ್ನು ಕಟ್ಟಿ, ಆಕೆಯನ್ನು ಸಮಾಜದ ಮುಂದೆ ತಲೆತಗ್ಗಿಸುವಂತೆ ಮಾಡಿದ ಈ ಕಿಡಿಗೇಡಿಗಳ ಕೃತ್ಯ ಈಗ ಎಲ್ಲರ ಆಕ್ರೋಶಕ್ಕೆ ಕಾರಣವಾಗಿದೆ. ಓದಿ ವೈದ್ಯೆಯಾಗಬೇಕಿದ್ದ ಕನಸು ಈ ಸುಳ್ಳು ಅಪಪ್ರಚಾರದಿಂದಾಗಿ ಮಣ್ಣು ಪಾಲಾಗಿದೆ.

ಘಟನೆ ನಡೆದ ತಕ್ಷಣ ಹೊಳಲ್ಕೆರೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಲಿಖಿತಾ ಬರೆದಿಟ್ಟ ಡೆತ್‌ನೋಟ್ ಆಧರಿಸಿ ಪೊಲೀಸರು ಪ್ರೊಫೆಸರ್ ರಾಜು, ಆತನ ಪತ್ನಿ ನಿಶಾ ಮತ್ತು ಪತ್ರದಲ್ಲಿ ಹೆಸರಿಸಲಾದ ವಿದ್ಯಾರ್ಥಿನಿಯರ ವಿರುದ್ಧ ಎಫ್‌ಐಆರ್ (FIR) ದಾಖಲಿಸಿದ್ದಾರೆ. ಸದ್ಯ ಪೊಲೀಸರು ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ತನಿಖೆ ಚುರುಕುಗೊಳಿಸಿದ್ದಾರೆ. ಆರೋಪಿಗಳ ವಿಚಾರಣೆ ನಡೆಯುತ್ತಿದ್ದು, ಸತ್ಯಾಸತ್ಯತೆ ಶೀಘ್ರದಲ್ಲೇ ಹೊರಬರಬೇಕಿದೆ.

ನೋಡಿ, ಸೋಶಿಯಲ್ ಮೀಡಿಯಾ ಅಥವಾ ಬಾಯಿ ಮಾತಿನಲ್ಲಿ ಒಬ್ಬರ ಬಗ್ಗೆ ಸುಳ್ಳು ಸುದ್ದಿ ಹಬ್ಬಿಸುವುದು ಎಷ್ಟು ಅಪಾಯಕಾರಿ ಅನ್ನೋದಕ್ಕೆ ಈ ಘಟನೆಯೇ ಸಾಕ್ಷಿ. ನಮ್ಮ ಒಂದು ಸುಳ್ಳು ಮಾತು ಒಬ್ಬರ ಜೀವನವನ್ನೇ ಬಲಿ ಪಡೆಯಬಹುದು. ವಿದ್ಯಾರ್ಥಿನಿಯರು ಅಥವಾ ಯುವಜನತೆ ಇಂತಹ ಸಂಕಷ್ಟದ ಸಮಯದಲ್ಲಿ ಧೃತಿಗೆಡಬಾರದು. ಯಾರೋ ಅಂದ ಮಾತಿಗೆ ಪ್ರಾಣ ಕಳೆದುಕೊಳ್ಳುವ ಬದಲು, ಧೈರ್ಯವಾಗಿ ಎದುರಿಸಬೇಕು. ಪೋಷಕರು ಕೂಡ ಮಕ್ಕಳ ಜೊತೆ ಸ್ನೇಹಿತರಂತೆ ಇದ್ದು ಅವರ ಮನಸ್ಸಿನ ನೋವನ್ನು ಅರಿಯಬೇಕಿದೆ.