ಹೊಸ ಹಣಕಾಸು ವರ್ಷದ ಮೊದಲ ದಿನವೇ ಮಾರುಕಟ್ಟೆಯಲ್ಲಿ ಹಬ್ಬ - ಒಂದೇ ದಿನದಲ್ಲಿ 10 ಲಕ್ಷ ಕೋಟಿ ಲಾಭ!!

ಕಳೆದ ಒಂದು ತಿಂಗಳಿಂದ ಸತತವಾಗಿ ಕುಸಿಯುತ್ತಾ ಹೂಡಿಕೆದಾರರ ನಿದ್ದೆಗೆಡಿಸಿದ್ದ ಷೇರು ಮಾರುಕಟ್ಟೆ, ಹೊಸ ಹಣಕಾಸು ವರ್ಷದ ಮೊದಲ ದಿನವೇ (ಏಪ್ರಿಲ್ 1) ಭರ್ಜರಿಯಾಗಿ ಪುಟಿದೆದ್ದಿದೆ. ಅಮೆರಿಕ ಮತ್ತು ಇರಾನ್ ನಡುವಿನ ಯುದ್ಧದ ಕಾರ್ಮೋಡ ಸ್ವಲ್ಪ ತಿಳಿಯಾಗುತ್ತಿದ್ದಂತೆ, ಮಾರುಕಟ್ಟೆಯಲ್ಲಿ ಗೂಳಿ ಅಬ್ಬರಿಸಿದೆ. ಸೆನ್ಸೆಕ್ಸ್ ಬರೋಬ್ಬರಿ 1,186 ಅಂಕಗಳ ಏರಿಕೆ ಕಂಡರೆ, ನಿಫ್ಟಿ ಕೂಡ 348 ಅಂಕಗಳ ಲಾಭದೊಂದಿಗೆ ದಿನದ ವಹಿವಾಟು ಮುಗಿಸಿದೆ.

ಹೂಡಿಕೆದಾರರ ಜೇಬಿಗೆ ಬಂತು ಭಾರಿ ಹಣ!

ಇಂದಿನ ಈ ಅದ್ಭುತ ಏರಿಕೆಯಿಂದಾಗಿ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದವರಿಗೆ ಕೇವಲ ಒಂದೇ ದಿನದಲ್ಲಿ ಸುಮಾರು 10 ಲಕ್ಷ ಕೋಟಿ ರೂಪಾಯಿ ಲಾಭವಾಗಿದೆ. ಮಾರುಕಟ್ಟೆಯ ಬೆಂಚ್‌ಮಾರ್ಕ್ ಸೂಚ್ಯಂಕಗಳಾದ ಸೆನ್ಸೆಕ್ಸ್ 73,134 ಅಂಕಗಳಿಗೆ ಹಾಗೂ ನಿಫ್ಟಿ 22,679 ಅಂಕಗಳಿಗೆ ಏರಿಕೆಯಾಗಿರುವುದು ಹೂಡಿಕೆದಾರರಲ್ಲಿ ಹೊಸ ಭರವಸೆ ಮೂಡಿಸಿದೆ.

Press Release: GIFT Nifty sets an All-Time High Monthly Turnover of US $129.80 billion and the Highest Monthly Volume with 2.82 million contracts for the month of March 2026

For more details visit: https://t.co/xtMacgDxMf#NSEIX #GIFTNIFTY #CapitalMarkets #PressRelease @nse_ix… pic.twitter.com/iUczQsxayt

— NSE IX Gift Nifty (@NSEIXGiftNifty) April 1, 2026

ಮಾರುಕಟ್ಟೆ ದಿಢೀರ್ ಚೇತರಿಸಿಕೊಳ್ಳಲು ಕಾರಣಗಳೇನು?

ಮಾರುಕಟ್ಟೆ ಇಷ್ಟೊಂದು ವೇಗವಾಗಿ ಮೇಲೆ ಬರಲು ಕೆಲವು ಪ್ರಮುಖ ಕಾರಣಗಳಿವೆ:

1. ಯುದ್ಧ ಭೀತಿ ದೂರ: ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ಶೀಘ್ರದಲ್ಲೇ ಕೊನೆಗೊಳ್ಳುವ ಲಕ್ಷಣಗಳು ಕಾಣುತ್ತಿವೆ. ಡೊನಾಲ್ಡ್ ಟ್ರಂಪ್ ಅವರು ಮಿಲಿಟರಿ ಕ್ರಮ ನಿಲ್ಲಿಸುವ ಬಗ್ಗೆ ನೀಡಿರುವ ಸುಳಿವು ಹೂಡಿಕೆದಾರರಲ್ಲಿ ಧೈರ್ಯ ತುಂಬಿದೆ.

2. ಜಾಗತಿಕ ಮಾರುಕಟ್ಟೆಯ ಸಪೋರ್ಟ್: ಕೇವಲ ಭಾರತ ಮಾತ್ರವಲ್ಲ, ಅಮೆರಿಕದ ನಾಸ್ಡಾಕ್ ಮತ್ತು ಎಸ್‌ಪಿ 500 ನಂತಹ ಪ್ರಮುಖ ಸೂಚ್ಯಂಕಗಳು ಕೂಡ ಏರಿಕೆ ಕಂಡಿವೆ. ವಿಶ್ವದಾದ್ಯಂತ ಮಾರುಕಟ್ಟೆ ಚೇತರಿಸಿಕೊಳ್ಳುತ್ತಿರುವುದು ನಮ್ಮ ಮಾರುಕಟ್ಟೆಗೂ ಪ್ಲಸ್ ಪಾಯಿಂಟ್ ಆಯಿತು.

3. ಡಾಲರ್ ಮತ್ತು ಬಾಂಡ್ ಇಳುವರಿ ಕುಸಿತ: ಅಮೆರಿಕದ ಡಾಲರ್ ಮತ್ತು ಬಾಂಡ್ ಇಳುವರಿ ಸ್ವಲ್ಪ ತಗ್ಗಿದೆ. ಇದು ವಿದೇಶಿ ಹೂಡಿಕೆದಾರರು ಮತ್ತೆ ಭಾರತದಂತಹ ಮಾರುಕಟ್ಟೆಗಳತ್ತ ಮುಖ ಮಾಡಲು ಸಹಾಯ ಮಾಡಿದೆ.

4. ಕಡಿಮೆ ಬೆಲೆಗೆ ಸಿಕ್ಕ ಷೇರುಗಳು: ಕಳೆದ ಒಂದು ತಿಂಗಳ ಕುಸಿತದಿಂದಾಗಿ ಗುಣಮಟ್ಟದ ಷೇರುಗಳ ಬೆಲೆ ತುಂಬಾ ಕಡಿಮೆಯಾಗಿತ್ತು. "ಕಡಿಮೆ ಬೆಲೆಗೆ ಸಿಗುತ್ತಿರುವಾಗ ಯಾಕೆ ಖರೀದಿಸಬಾರದು?" ಎಂದು ಹೂಡಿಕೆದಾರರು ಮುಗಿಬಿದ್ದು ಷೇರುಗಳನ್ನು ಖರೀದಿಸಿದ್ದಾರೆ.

ಯಾರಿಗೆ ಲಾಭ, ಯಾರಿಗೆ ನಷ್ಟ?

ಇಂದಿನ ವಹಿವಾಟಿನಲ್ಲಿ ಅದಾನಿ ಪೋರ್ಟ್ಸ್, ಅದಾನಿ ಎಂಟರ್‌ಪ್ರೈಸಸ್, ಭಾರತ್ ಎಲೆಕ್ಟ್ರಾನಿಕ್ಸ್ (BEL) ಮತ್ತು ಇಂಟರ್‌ಗ್ಲೋಬ್ ಏವಿಯೇಷನ್ ಸಂಸ್ಥೆಯ ಷೇರುಗಳು ಭರ್ಜರಿ ಲಾಭ ಗಳಿಸಿವೆ. ವಿಶೇಷವಾಗಿ ರಕ್ಷಣಾ ವಲಯದ (Defense) ಷೇರುಗಳು ಶೇ. 5ಕ್ಕಿಂತ ಹೆಚ್ಚು ಏರಿಕೆ ಕಂಡಿವೆ. ಆದರೆ, ಫಾರ್ಮಾ ವಲಯದ ಷೇರುಗಳು (ಡಾ. ರೆಡ್ಡೀಸ್, ಸಿಪ್ಲಾ, ಸನ್ ಫಾರ್ಮಾ) ಸ್ವಲ್ಪ ಮಟ್ಟಿಗೆ ಇಳಿಕೆ ಕಂಡಿವೆ.

ಎಕ್ಸ್‌ಪರ್ಟ್ಸ್ ಸಲಹೆ ಏನು?

ಈ ಬಗ್ಗೆ ಮಾತನಾಡಿರುವ ಮಾರುಕಟ್ಟೆ ವಿಶ್ಲೇಷಕ ರಾಹುಲ್ ಶಾ, "ಚಿಕ್ಕಪುಟ್ಟ ಸುದ್ದಿಗಳು ಮಾರುಕಟ್ಟೆಯಲ್ಲಿ ಗದ್ದಲ ಸೃಷ್ಟಿಸುವುದು ಸಹಜ. ಆದರೆ ಹೂಡಿಕೆದಾರರು ದೀರ್ಘಾವಧಿಯ ಅಂದರೆ ಕನಿಷ್ಠ 7 ವರ್ಷಗಳ ಗುರಿ ಇಟ್ಟುಕೊಂಡು ಹೂಡಿಕೆ ಮಾಡಬೇಕು. ಬಲವಾದ ಆರ್ಥಿಕತೆ ಹೊಂದಿರುವ ಕಂಪನಿಗಳನ್ನು ಆರಿಸಿಕೊಂಡರೆ ಅಪಾಯ ಕಡಿಮೆ," ಎಂದು ಕಿವಿಮಾತು ಹೇಳಿದ್ದಾರೆ.

ಹೊಸ ಹಣಕಾಸು ವರ್ಷದ ಆರಂಭವೇ ಹೂಡಿಕೆದಾರರಿಗೆ 'ಸ್ವೀಟ್' ಆಗಿ ಪರಿಣಮಿಸಿದೆ. ಇದೇ ಟ್ರೆಂಡ್ ಮುಂದುವರಿಯುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.