ಪ್ರಸ್ತುತ ದಕ್ಷಿಣ ಭಾರತದ ಅತಿ ಬೇಡಿಕೆಯ ನಟಿಯಾಗಿ, ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಮಿಂಚುತ್ತಿರುವ ನಟಿ ಶ್ರೀಲೀಲಾ ಅವರು ಒಮ್ಮೆ ಚಿತ್ರರಂಗವನ್ನೇ ಶಾಶ್ವತವಾಗಿ ತೊರೆಯುವ ತೀರ್ಮಾನ ಮಾಡಿದ್ದರು. ತೆಲುಗಿನ ಖ್ಯಾತ ನಿರೂಪಕಿ ಸುಮಾ ಕನಕಾಲ ಅವರೊಂದಿಗಿನ ಸಂದರ್ಶನದಲ್ಲಿ ಶ್ರೀಲೀಲಾ ಈ ವಿಚಾರವನ್ನು ಹಂಚಿಕೊಂಡಿದ್ದಾರೆ.
ಶ್ರೀಲೀಲಾ ಅವರು ನಟನಾ ವೃತ್ತಿಯನ್ನು ಆರಂಭಿಸಿದ ಹೊಸದರಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ಟ್ರೋಲ್ಗಳ ಬಗ್ಗೆ ಬಹಳಷ್ಟು ಭಯಪಡುತ್ತಿದ್ದರು. ಕೇವಲ ಮನರಂಜನೆಯ ಉದ್ದೇಶದಿಂದ ಟ್ರೋಲ್ ಮಾಡುವವರು, ಕೆಲವೊಮ್ಮೆ ವ್ಯಕ್ತಿಗತವಾಗಿ ನಿಂದಿಸುತ್ತಿದ್ದುದು ಶ್ರೀಲೀಲಾ ಅವರಿಗೆ ತುಂಬಾ ನೋವುಂಟು ಮಾಡುತ್ತಿತ್ತು. ಇಂತಹ ಟೀಕೆಗಳು ಅವರ ಮನಸ್ಸಿನ ಮೇಲೆ ಅತಿಯಾದ ಪ್ರಭಾವ ಬೀರಿದ್ದವು. ನಿರಂತರವಾದ ನಕಾರಾತ್ಮಕ ಕಾಮೆಂಟ್ಗಳಿಂದ ನೊಂದಿದ್ದ ಶ್ರೀಲೀಲಾ, ಅದೆಷ್ಟೋ ಬಾರಿ ಕಣ್ಣೀರಿಟ್ಟಿದ್ದಾರೆ.
ಚಿತ್ರರಂಗವನ್ನು ತೊರೆಯುವ ತೀರ್ಮಾನ
ಈ ನಿರಂತರ ಮಾನಸಿಕ ಹಿಂಸೆಯನ್ನು ತಡೆದುಕೊಳ್ಳಲು ಸಾಧ್ಯವಾಗದೆ, ನಟನೆಯೇ ತಮಗೆ ಒಗ್ಗುತ್ತಿಲ್ಲ ಎಂದು ಭಾವಿಸಿ ಚಿತ್ರರಂಗದಿಂದಲೇ ದೂರವಾಗಲು ನಿರ್ಧರಿಸಿದ್ದರು. ಈ ಬಗ್ಗೆ ತಮ್ಮ ತಾಯಿಯ ಬಳಿ ಅಳಲು ತೋಡಿಕೊಂಡಿದ್ದ ಅವರು, "ನನಗೆ ನಟಿಸಲು ಸಾಧ್ಯವಾಗುತ್ತಿಲ್ಲ, ಈ ಕ್ಷೇತ್ರದಿಂದ ಹೊರಬಂದು ಪುನಃ ಶಾಲೆ ಅಥವಾ ಕಾಲೇಜಿಗೆ ಹೋಗಿ ಓದಿಕೊಳ್ಳುತ್ತೇನೆ" ಎಂದು ಹೇಳಿದ್ದರು. ಅಂದು ಅವರು ಅಷ್ಟು ಸೂಕ್ಷ್ಮ ಮನಸ್ಥಿತಿಯನ್ನು ಹೊಂದಿದ್ದರು.
ಕಾಲಕ್ರಮೇಣ ಶ್ರೀಲೀಲಾ ಅವರು ಇಂತಹ ಟ್ರೋಲ್ಗಳನ್ನು ಎದುರಿಸುವ ಧೈರ್ಯವನ್ನು ಬೆಳೆಸಿಕೊಂಡರು. ಸದ್ಯ ಅವರು ಟ್ರೋಲ್ಗಳ ಬಗ್ಗೆ ಅಥವಾ ಅಂತಹ ಜನರ ವ್ಯಂಗ್ಯದ ಮಾತುಗಳ ಬಗ್ಗೆ ತಲೆಕೆಡಿಸಿಕೊಳ್ಳುವುದಿಲ್ಲ. "ಹಿಂದೆಲ್ಲಾ ಜನರು ಬಹಳ ಒರಟಾಗಿ ಕಾಮೆಂಟ್ ಮಾಡುತ್ತಿದ್ದರು, ಆದರೆ ಈಗ ನಕಾರಾತ್ಮಕ ಕಾಮೆಂಟ್ ಮಾಡುವ ಮುನ್ನ ಜನರು ಸ್ವಲ್ಪ ಯೋಚಿಸುತ್ತಿದ್ದಾರೆ. ಜನ ಈಗ ಹೆಚ್ಚು ಸಂವೇದನಾಶೀಲರಾಗುತ್ತಿದ್ದಾರೆ" ಎಂದು ಶ್ರೀಲೀಲಾ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಒಂದು ಕಾಲದಲ್ಲಿ ಸಿನಿಮಾ ರಂಗವನ್ನೇ ಬಿಟ್ಟುಬಿಡಬೇಕು ಎಂದು ಯೋಚಿಸಿದ್ದ ಶ್ರೀಲೀಲಾ, ಇಂದು ಯಶಸ್ವಿಯಾಗಿ ಮುನ್ನಡೆಯುತ್ತಿದ್ದಾರೆ. ತೆಲುಗು, ತಮಿಳು ಮತ್ತು ಹಿಂದಿ ಭಾಷೆಗಳಲ್ಲಿ ಸ್ಟಾರ್ ನಟರೊಂದಿಗೆ ದೊಡ್ಡ ದೊಡ್ಡ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಕಾರ್ತಿಕ್ ಆರ್ಯನ್ ಅವರೊಂದಿಗೆ 'ಆಶಿಖಿ 3', ಧನುಷ್ ಮತ್ತು ಶಿವಕಾರ್ತಿಕೇಯನ್ ಅವರ ಚಿತ್ರಗಳು ಸೇರಿದಂತೆ ಹಲವು ಯೋಜನೆಗಳಲ್ಲಿ ಅವರು ಬ್ಯುಸಿಯಾಗಿದ್ದಾರೆ. ಒಟ್ಟಿನಲ್ಲಿ, ಟ್ರೋಲ್ಗಳಿಗೆ ಅಂಜದೆ ತಮ್ಮ ವೃತ್ತಿಜೀವನದಲ್ಲಿ ಗಟ್ಟಿಯಾಗಿ ನಿಂತಿರುವ ಶ್ರೀಲೀಲಾ, ಇಂದು ಯುವ ನಟಿಯರಿಗೆ ಸ್ಫೂರ್ತಿಯಾಗಿದ್ದಾರೆ.
