"ನನ್ನನ್ನು ಸ್ಟಾರ್ ಮಾಡಿದ್ದೇ ಹಂಸಲೇಖ" - ಸುದ್ದಿಗೋಷ್ಠಿಯಲ್ಲಿ ರವಿಮಾಮ ಭಾವುಕ!!

ಕನ್ನಡ ಚಿತ್ರರಂಗದಲ್ಲಿ ಪ್ರೇಮಲೋಕ ಸೃಷ್ಟಿಸಿದ ರವಿಚಂದ್ರನ್ ಮತ್ತು ಹಂಸಲೇಖ ಅವರ ಕಾಂಬಿನೇಷನ್ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ? ಒಂದು ಕಾಲದಲ್ಲಿ ಈ ಜೋಡಿ ಕೆಟ್ಟರೆ ಸ್ಯಾಂಡಲ್‌ವುಡ್‌ನಲ್ಲಿ ಹಾಡುಗಳ ಹಬ್ಬವೇ ನಡೆಯುತ್ತಿತ್ತು. ಆದರೆ, ಕಾಲಚಕ್ರ ಉರುಳಿದಂತೆ ಇಬ್ಬರ ನಡುವೆ ಸಣ್ಣದೊಂದು ಬಿರುಕು ಕಾಣಿಸಿಕೊಂಡು, ಇಬ್ಬರು ದೂರವಾಗಿದ್ದರು. ಈಗ ಸುಮಾರು ವರ್ಷಗಳ ನಂತರ ಈ ಕ್ರೇಜಿ ಮತ್ತು 'ಬ್ರಹ್ಮ' ಮತ್ತೆ ಒಂದಾಗುತ್ತಿದ್ದಾರೆ. ಈ ಸುದಿನದ ಅಂಗವಾಗಿ ನಡೆದ ಸುದ್ದಿಗೋಷ್ಠಿಯಲ್ಲಿ ರವಿಮಾಮ ಆಡಿದ ಮಾತುಗಳು ಪ್ರತಿಯೊಬ್ಬ ಅಭಿಮಾನಿಯ ಕಣ್ಣಾಲಿಗಳನ್ನು ಒದ್ದೆ ಮಾಡುವಂತಿತ್ತು.

"ನನ್ನನ್ನು ಕ್ರೇಜಿಸ್ಟಾರ್ ಮಾಡಿದ್ದೇ ಹಂಸಲೇಖ"

ಸುದ್ದಿಗೋಷ್ಠಿಯಲ್ಲಿ ಬಹಳ ಭಾವುಕರಾಗಿ ಮಾತನಾಡಿದ ರವಿಚಂದ್ರನ್, "ನೋಡಿ, ಮನುಷ್ಯನಿಗೆ ಅತಿಯಾದ ಕೋಪ, ಅಹಂ (ಇಗೋ) ಮತ್ತು ಸಕ್ಸಸ್ ಬಂದಾಗ ಸಂಬಂಧಗಳಲ್ಲಿ ಬಿರುಕು ಬರುವುದು ಮಾಮೂಲಿ. ನಮ್ಮಿಬ್ಬರ ನಡುವೆ ಸಣ್ಣ ಕಿರಿಕ್ ಆದಾಗ ಅದನ್ನು ನೋಡಿ ಸಂಭ್ರಮಿಸಿದವರೇ ಜಾಸ್ತಿ. ಆದರೆ ನಮ್ಮಿಬ್ಬರದು ಚಿತ್ರರಂಗ ಕಂಡ ಬೆಸ್ಟ್ ಜೋಡಿ ಅನ್ನೋದನ್ನು ಯಾರೂ ಮರೆಯುವಂತಿಲ್ಲ. 40 ವರ್ಷಗಳ ಹಿಂದೆ ನನಗೆ ಸಿನಿಮಾ ಬಗ್ಗೆ ಅಷ್ಟೇನೂ ಗೊತ್ತಿರಲಿಲ್ಲ. ಹಂಸಲೇಖ ಅವರು ಸಾಹಿತ್ಯ ಬರೆದುಕೊಟ್ಟಾಗಲೇ ಅದನ್ನು ತೆರೆಯ ಮೇಲೆ ಹೇಗೆ ತರಬೇಕು ಎನ್ನುವ ಐಡಿಯಾ ನನಗೆ ಬರುತ್ತಿತ್ತು. ನಿಜ ಹೇಳಬೇಕೆಂದರೆ, ನನ್ನನ್ನು 'ಕ್ರೇಜಿ ಸ್ಟಾರ್' ಮಾಡಿದ್ದೇ ಹಂಸಲೇಖ," ಎಂದು ಮನದಾಳದ ಮಾತುಗಳನ್ನು ಹಂಚಿಕೊಂಡರು.

ನಗು ಮತ್ತು ಸ್ನೇಹದ ಪಯಣ:

ಇಷ್ಟು ವರ್ಷಗಳ ಕಾಲ ಜೊತೆಗೆ ಕೆಲಸ ಮಾಡದಿದ್ದರೂ, ನಮ್ಮ ಸ್ನೇಹ ಮಾತ್ರ ಹಾಗೆಯೇ ಇದೆ ಎನ್ನುತ್ತಾರೆ ರವಿಚಂದ್ರನ್. "ನಾನು ಇವತ್ತಿಗೂ ಯಾರ ಜೊತೆಯಾದರೂ ಮನಸಾರೆ ನಗುತ್ತೇನೆ ಎಂದರೆ ಅದು ಹಂಸಲೇಖ ಅವರ ಜೊತೆಗೆ ಮಾತ್ರ. ಆ ನಗುವೇ ನಮ್ಮನ್ನು ಇಷ್ಟು ದೂರ ಕರೆದುಕೊಂಡು ಬಂದಿದೆ," ಎನ್ನುವ ಮೂಲಕ ತಮ್ಮ ನಡುವಿನ ಬಾಂಧವ್ಯ ಎಷ್ಟು ಗಟ್ಟಿಯಾಗಿದೆ ಎಂಬುದನ್ನು ಸಾಬೀತುಪಡಿಸಿದರು.

ಮೇ 30ಕ್ಕೆ 'ಕ್ರೇಜಿ ಬ್ರಹ್ಮ' ಸಂಗೀತ ಸಂಜೆ

ಈ ಇಬ್ಬರು ದಿಗ್ಗಜರು ಮತ್ತೆ ಒಂದಾಗುತ್ತಿರುವುದು ಯಾವುದೋ ಸಿನಿಮಾದಲ್ಲಲ್ಲ, ಬದಲಾಗಿ 'ಕ್ರೇಜಿ ಬ್ರಹ್ಮ' ಎನ್ನುವ ಅದ್ಧೂರಿ ಸಂಗೀತ ಕಾರ್ಯಕ್ರಮದ ಮೂಲಕ. ಮೇ 30ರಂದು ಸಂಜೆ 6 ಗಂಟೆಯಿಂದ ರಾತ್ರಿ 12 ಗಂಟೆಯವರೆಗೆ ಕೆಂಗೇರಿಯ ಜೆಕೆ ಗ್ರಾಂಡ್ ಅರೇನಾದಲ್ಲಿ ಈ ಮ್ಯೂಸಿಕಲ್ ಹಬ್ಬ ನಡೆಯಲಿದೆ. ರವಿಚಂದ್ರನ್ ಮತ್ತು ಹಂಸಲೇಖ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿರುವ ಎವರ್‌ಗ್ರೀನ್ ಹಿಟ್ ಹಾಡುಗಳನ್ನು ಈ ಕಾರ್ಯಕ್ರಮದಲ್ಲಿ ಮರುಸೃಷ್ಟಿ ಮಾಡಲಾಗುತ್ತಿದೆ. ದೇಶದ ಖ್ಯಾತ ಗಾಯಕರು ಈ ಹಾಡುಗಳಿಗೆ ಧ್ವನಿಯಾಗಲಿದ್ದಾರೆ.

'ಪ್ರೇಮಲೋಕ', 'ರಣಧೀರ', 'ಅಂಜದ ಗಂಡು', 'ಶಾಂತಿ ಕ್ರಾಂತಿ' ಅಂತಹ ಸಿನಿಮಾಗಳ ಹಾಡುಗಳನ್ನು ಮತ್ತೆ ಈ ಜೋಡಿ ವೇದಿಕೆಯ ಮೇಲೆ ನಿಂತು ಕೇಳಿಸಿಕೊಳ್ಳುವುದನ್ನು ನೋಡುವುದೇ ಒಂದು ಸಂಭ್ರಮ. ಹಳೆಯ ನೆನಪುಗಳನ್ನು ಮೆಲುಕು ಹಾಕುತ್ತಾ, ರವಿಚಂದ್ರನ್ ಅವರ ಸ್ಟೈಲ್ ಮತ್ತು ಹಂಸಲೇಖ ಅವರ ಟ್ಯೂನ್‌ಗಳನ್ನು ಮತ್ತೊಮ್ಮೆ ಅನುಭವಿಸಲು ಕನ್ನಡಿಗರು ಕಾತರರಾಗಿದ್ದಾರೆ.

ಈ 'ಕ್ರೇಜಿ ಬ್ರಹ್ಮ' ಕಾರ್ಯಕ್ರಮವು ಕೇವಲ ಸಂಗೀತ ಸಂಜೆಯಲ್ಲ, ಅದು ದಶಕಗಳ ಸ್ನೇಹದ ಸಂಭ್ರಮ. ರವಿಚಂದ್ರನ್ ಅವರ ಕನಸುಗಳಿಗೆ ಹಂಸಲೇಖ ಅವರು ಮತ್ತೆ ಶಬ್ದಗಳ ರೂಪ ನೀಡುತ್ತಿರುವುದು ಸ್ಯಾಂಡಲ್‌ವುಡ್ ಪಾಲಿಗೆ ಅತ್ಯಂತ ಸಂತೋಷದ ವಿಷಯವಾಗಿದೆ. ನೀವೂ ಕೂಡ ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಗಲು ಮರೆಯಬೇಡಿ!