ಸಿನಿಮಾ ಲೋಕದ 'ಬೆದರಿಕೆ ಇಲ್ಲದ' ನಿರ್ದೇಶಕ ಎಂದೇ ಹೆಸರಾದ ರಾಮ್ ಗೋಪಾಲ್ ವರ್ಮಾ (RGV) ಸದಾ ಒಂದಿಲ್ಲೊಂದು ವಿವಾದ ಅಥವಾ ವಿಭಿನ್ನ ಹೇಳಿಕೆಗಳ ಮೂಲಕ ಸುದ್ದಿಯಲ್ಲಿರುತ್ತಾರೆ. ಇತ್ತೀಚಿನ ವರ್ಷಗಳಲ್ಲಿ ಅವರು ಸಿನಿಮಾಗಳಿಗಿಂತ ಹೆಚ್ಚಾಗಿ ಟ್ವೀಟ್ ಮತ್ತು ಸಂದರ್ಶನಗಳ ಮೂಲಕವೇ ಫೇಮಸ್ ಆಗಿದ್ದರು. ಆದರೆ ಈಗ ವರ್ಮಾ ಅವರು ಚಿತ್ರರಂಗವೇ ಬೆಚ್ಚಿಬೀಳುವಂತಹ ಒಂದು ದೊಡ್ಡ ಘೋಷಣೆ ಮಾಡಿದ್ದಾರೆ. ಅದೇನೆಂದರೆ, ಅವರು ಇನ್ಮುಂದೆ ತೆಲುಗು ಸಿನಿಮಾಗಳನ್ನು ಮಾಡುವುದಿಲ್ಲವಂತೆ!
ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಆರ್ಜಿವಿ ಈ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ. ಅವರ ಪ್ರಕಾರ, ಆದಿತ್ಯ ಧರ್ ನಿರ್ದೇಶನದ 'ಧುರಂಧರ್ 2' ಸಿನಿಮಾ ನೋಡಿದ ಮೇಲೆ ಅವರ ಆಲೋಚನಾ ಕ್ರಮವೇ ಬದಲಾಗಿ ಹೋಗಿದೆಯಂತೆ. ಆ ಚಿತ್ರದ ಮೇಕಿಂಗ್ ಮತ್ತು ರಿಯಲಿಸ್ಟಿಕ್ ಶೈಲಿಯನ್ನು ಕಂಡು ಬೆರಗಾಗಿರುವ ವರ್ಮಾ, "ಈ ಸಿನಿಮಾ ಭಾರತೀಯ ಚಿತ್ರರಂಗದ ಹಳೆಯ ಸೂತ್ರಗಳನ್ನೆಲ್ಲಾ ಧೂಳಿಪಟ ಮಾಡಿದೆ" ಎಂದು ಹೊಗಳಿದ್ದಾರೆ.
ಅಷ್ಟೇ ಅಲ್ಲ, "ನಾನು ಈ ಹಿಂದೆ ಮಾಡಿದ 'ಗಾಡ್ ಫಾದರ್' ಮಾದರಿಯ ಸಿನಿಮಾಗಳು ಈ ಹೊಸ ತಲೆಮಾರಿನ ಚಿತ್ರಗಳ ಮುಂದೆ ಮಂಕಾಗಿ ಕಾಣುತ್ತಿವೆ. ಇನ್ನು ಮುಂದೆ ಅತಿಯಾದ ಹೀರೋಗಿರಿ ಇರುವ ಸಿನಿಮಾಗಳ ಕಾಲ ಮುಗಿದಿದೆ" ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಈಗಿನ ಪ್ರೇಕ್ಷಕರು ತುಂಬಾ ಬುದ್ಧಿವಂತರಾಗಿದ್ದಾರೆ, ಅವರಿಗೆ ಹಳೆಯ ಶೈಲಿಯ ಸಿನಿಮಾಗಳು ಇಷ್ಟವಾಗುವುದಿಲ್ಲ ಎಂಬುದು ವರ್ಮಾ ಅವರ ವಾದ. ಹೀಗಾಗಿಯೇ ಅವರು ತಮ್ಮ ಹಳೆಯ ಶೈಲಿಯನ್ನು ಮರೆತು, ಹೊಸದಾಗಿ ಹುಟ್ಟಿದ ನಿರ್ದೇಶಕನಂತೆ ಕೆಲಸ ಮಾಡಲು ನಿರ್ಧರಿಸಿದ್ದಾರೆ. ಇದೇ ಕಾರಣಕ್ಕೆ ಅವರು ಹೈದರಾಬಾದ್ ಬಿಟ್ಟು ಮುಂಬೈಗೆ ಪಯಣ ಬೆಳೆಸಿದ್ದಾರೆ.
ತೆಲುಗು ಚಿತ್ರರಂಗಕ್ಕೆ ಬೈ-ಬೈ ಹೇಳಿರುವ ಆರ್ಜಿವಿ, ಈಗ 'ಸಿಂಡಿಕೇಟ್' ಎಂಬ ಹೊಸ ಸಿನಿಮಾದ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಇದು ಜಾಗತಿಕ ಮಟ್ಟದ ಕಥಾಹಂದರ ಹೊಂದಿದ್ದು, ಹಿಂದಿ ಮತ್ತು ಅಂತರಾಷ್ಟ್ರೀಯ ಗುಣಮಟ್ಟದಲ್ಲಿ ಮೂಡಿಬರಲಿದೆ. "ನನ್ನ ಹಳೆಯ ಹಿಟ್ ಚಿತ್ರಗಳು ಈಗಿನ ಸಿನಿಮಾಗಳ ಮುಂದೆ ಟಿವಿ ಸೀರಿಯಲ್ನಂತೆ ಕಾಣುತ್ತಿವೆ" ಎಂದು ನೇರವಾಗಿ ಹೇಳಿರುವ ವರ್ಮಾ, ಸದ್ಯಕ್ಕೆ ತಮ್ಮ ಸಂಪೂರ್ಣ ಗಮನವನ್ನು ಈ 'ಸಿಂಡಿಕೇಟ್' ಸಿನಿಮಾ ಮೇಲೆ ಹರಿಸಿದ್ದಾರೆ.
ಟಾಲಿವುಡ್ನಲ್ಲಿ ಹೊಸ ಕ್ರಾಂತಿ ಮಾಡಿದ್ದ ವರ್ಮಾ, ಈಗ ಅಲ್ಲಿಂದ ಹೊರಬಂದು ಬಾಲಿವುಡ್ ಅಥವಾ ಗ್ಲೋಬಲ್ ಮಟ್ಟದಲ್ಲಿ ಏನೋ ಹೊಸತು ಮಾಡಲು ಹೊರಟಿದ್ದಾರೆ. ಅವರ ಈ 'ಸೆಕೆಂಡ್ ಇನ್ನಿಂಗ್ಸ್' ಹೇಗಿರಲಿದೆ ಎಂಬುದನ್ನು ಕಾದು ನೋಡಬೇಕು.
