ಸಿನಿಮಾ ಅಂದ ತಕ್ಷಣ ನಮಗೆಲ್ಲ ಮೊದಲು ನೆನಪಾಗೋದೇ ಅದರ ಲೈಟು, ಗ್ಲಾಮರ್ ಮತ್ತೆ ಸ್ಟಾರ್ಗಳ ಲೈಫ್ ಸ್ಟೈಲ್. ಆದ್ರೆ, ಈ ಬಣ್ಣದ ಪ್ರಪಂಚದ ಹಿಂದೆ ನಮಗೆ ಗೊತ್ತಿಲ್ಲದ ಎಷ್ಟೋ ಕಹಿ ಸತ್ಯಗಳಿವೆ. ಇವತ್ತು ಸ್ಟಾರ್ಗಳಾಗಿ ಮೆರೆಯುತ್ತಿರೋ ಎಷ್ಟೋ ಜನ ಈ ಮಟ್ಟಕ್ಕೆ ಬರಲು ಪಟ್ಟ ಪಾಡು, ಎದುರಿಸಿದ ಅವಮಾನ ಅಷ್ಟಿಷ್ಟಲ್ಲ. ಈಗ ಕನ್ನಡದಿಂದ ಹೋಗಿ ಬಾಲಿವುಡ್ನಲ್ಲಿ ಮಿಂಚುತ್ತಿರೋ ನಟಿ ಡೈಸಿ ಶಾ ಕೂಡ ತಮ್ಮ ಲೈಫ್ನಲ್ಲಿ ನಡೆದ ಇಂತದ್ದೇ ಒಂದು ಶಾಕಿಂಗ್ ವಿಷಯನ ಬಿಚ್ಚಿಟ್ಟಿದ್ದಾರೆ.
ಡೈಸಿ ಶಾ ಅವರ ಜರ್ನಿ ನಿಜಕ್ಕೂ ಸ್ಪೂರ್ತಿದಾಯಕ. 10ನೇ ತರಗತಿಯಲ್ಲಿದ್ದಾಗಲೇ ಸೌಂದರ್ಯ ಸ್ಪರ್ಧೆ ಗೆದ್ದಿದ್ದ ಇವರು, ಮೊದಲು ಕೆಲಸ ಮಾಡಿದ್ದು ಗಣೇಶ್ ಆಚಾರ್ಯ ಅವರ ಡ್ಯಾನ್ಸ್ ಟೀಮ್ನಲ್ಲಿ. 'ತೇರೆ ನಾಮ್' ಸಿನಿಮಾದ ಹಾಡೊಂದರಲ್ಲಿ ಬ್ಯಾಕ್ಗ್ರೌಂಡ್ ಡ್ಯಾನ್ಸರ್ ಆಗಿದ್ದ ಇವರನ್ನು ಗುರುತಿಸಿದ್ದು ಸಲ್ಮಾನ್ ಖಾನ್. ನಂತರ ಸಲ್ಮಾನ್ ಅವರೇ 'ಜೈ ಹೋ' ಚಿತ್ರದ ಮೂಲಕ ಬಾಲಿವುಡ್ಗೆ ಇವರನ್ನು ನಾಯಕಿಯಾಗಿ ಪರಿಚಯಿಸಿದರು. ಅದಕ್ಕೂ ಮುನ್ನ ಡೈಸಿ ಕನ್ನಡ ಸಿನಿಮಾಗಳಲ್ಲೂ ನಟಿಸಿದ್ದರು ಅನ್ನೋದು ನಮಗೆಲ್ಲ ಗೊತ್ತಿರೋ ವಿಷಯ.
ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಡೈಸಿ ಶಾ ಅವರು ತಾವು ಎದುರಿಸಿದ 'ಕಾಸ್ಟಿಂಗ್ ಕೌಚ್' ಮತ್ತು 'ಬ್ಯಾಡ್ ಟಚ್' ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ. ಅವರ ವೃತ್ತಿ ಜೀವನದ ಆರಂಭದಲ್ಲಿ ದಕ್ಷಿಣ ಭಾರತದ ನಿರ್ಮಾಪಕರೊಬ್ಬರನ್ನು ಭೇಟಿ ಮಾಡಲು ಆರು ಏಳು ಜನ ಹುಡುಗಿಯರು ಆಡಿಷನ್ಗೆ ಹೋಗಿದ್ದರಂತೆ. ಅಲ್ಲಿ ಆ ನಿರ್ಮಾಪಕರು ಪ್ರತಿಯೊಬ್ಬರನ್ನು ಪರ್ಸನಲ್ ಆಗಿ ಭೇಟಿ ಮಾಡುತ್ತಿದ್ದರು.
ಡೈಸಿ ಅವರ ಸರದಿ ಬಂದಾಗ ಆ ನಿರ್ಮಾಪಕರು ಅವರ ಜೊತೆ ತುಂಬಾ ಅನುಚಿತವಾಗಿ ನಡೆದುಕೊಂಡಿದ್ದಾರಂತೆ. "ಆತ ನನ್ನನ್ನು ಮುಟ್ಟಿದ ರೀತಿ ಮತ್ತು ನನ್ನ ಕೈ ಹಿಡಿದ ರೀತಿ ತುಂಬಾ ಕೆಟ್ಟದಾಗಿತ್ತು" ಎಂದು ಡೈಸಿ ನೋವಿನಿಂದ ಆ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.
ನಿರ್ಮಾಪಕನ ಆ ಒಂದು ಅನುಚಿತ ನಡವಳಿಕೆ ಡೈಸಿ ಅವರ ಮನಸ್ಸಿನ ಮೇಲೆ ಎಂತಹ ಪರಿಣಾಮ ಬೀರಿದೆ ಎಂದರೆ, ಇಂದಿಗೂ ಅವರಿಗೆ ಅಪರಿಚಿತರು ಮುಟ್ಟಿದರೆ ನಡುಕ ಶುರುವಾಗುತ್ತದೆಯಂತೆ. ಆ ಘಟನೆಯಿಂದಾಗಿ ನನಗೆ ಈಗ ಮಸಾಜ್ ಮಾಡಿಸಿಕೊಳ್ಳೋಕೆ ಕೂಡ ಹೆದರಿಕೆ ಆಗುತ್ತೆ. ಗಂಡಸರಿರಲಿ ಅಥವಾ ಹೆಂಗಸರಿರಲಿ, ನನ್ನನ್ನು ಯಾರಾದರೂ ಸ್ಪರ್ಶಿಸಿದರೆ ತುಂಬಾ ಕಿರಿಕಿರಿ ಮತ್ತು ಬೇಸರ ಆಗುತ್ತದೆ ಎಂದು ಅವರು ತಮ್ಮ ಸಂಕಟವನ್ನು ತೋಡಿಕೊಂಡಿದ್ದಾರೆ.
ಸಿನಿಮಾದಿಂದ ಸ್ವಲ್ಪ ಗ್ಯಾಪ್ ತಗೊಂಡಿದ್ದ ಡೈಸಿ ಶಾ ಈಗ ಮತ್ತೆ ಬ್ಯುಸಿಯಾಗಿದ್ದಾರೆ. 'ರೆಡ್ ರೂಮ್' ಎಂಬ ವೆಬ್ ಸರಣಿಯ ಮೂಲಕ ಒಟಿಟಿ ಜಗತ್ತಿಗೆ ಎಂಟ್ರಿ ಕೊಟ್ಟಿದ್ದಾರೆ. ಅಷ್ಟೇ ಅಲ್ಲದೆ, ಯೂಟ್ಯೂಬ್ನಲ್ಲಿ ಸಕ್ರಿಯವಾಗಿರುವ ಇವರು ತಮ್ಮ ಲೈಫ್ ಸ್ಟೈಲ್ ಬಗ್ಗೆ ವ್ಲಾಗ್ಗಳನ್ನು ಮಾಡುತ್ತಾ 50 ಸಾವಿರಕ್ಕೂ ಹೆಚ್ಚು ಫಾಲೋವರ್ಸ್ ಹೊಂದಿದ್ದಾರೆ. ಸದ್ಯ ಇವರು ಪಲಾಶ್ ಮುಚ್ಚಲ್ ನಿರ್ದೇಶನದ ಥ್ರಿಲ್ಲರ್ ಸಿನಿಮಾದಲ್ಲಿ ಶ್ರೇಯಸ್ ತಲ್ಪಡೆ ಅವರ ಜೊತೆ ನಟಿಸುತ್ತಿದ್ದಾರೆ.
ಸಿನಿಮಾ ಲೋಕದಲ್ಲಿ ಬೆಳೆಯಬೇಕು ಅಂದುಕೊಳ್ಳುವ ಹೆಣ್ಣುಮಕ್ಕಳಿಗೆ ಇಂತಹ ಎಷ್ಟೋ ಕಹಿ ಅನುಭವಗಳು ಎದುರಾಗುತ್ತವೆ. ಅದನ್ನು ಮೆಟ್ಟಿ ನಿಂತು ಸಾಧಿಸುವುದು ನಿಜಕ್ಕೂ ದೊಡ್ಡ ಸವಾಲು. ಡೈಸಿ ಶಾ ಅವರು ತಮ್ಮ ನೋವನ್ನು ಮುಕ್ತವಾಗಿ ಹಂಚಿಕೊಳ್ಳುವ ಮೂಲಕ ಚಿತ್ರರಂಗದ ಮತ್ತೊಂದು ಮುಖವನ್ನು ತೋರಿಸಿದ್ದಾರೆ. ಇಂತಹ ಘಟನೆಗಳ ವಿರುದ್ಧ ದನಿ ಎತ್ತಿದ ಡೈಸಿ ಅವರ ಧೈರ್ಯಕ್ಕೆ ಮೆಚ್ಚುಗೆ ಸೂಚಿಸಲೇಬೇಕು.
