ಕನ್ನಡ ಕಿರುತೆರೆಯ ಜನಪ್ರಿಯ ಧಾರಾವಾಹಿ 'ಅಣ್ಣಯ್ಯ' ಬಗ್ಗೆ ನಿಮಗೇ ಗೊತ್ತೇ ಇದೆ. ಅಣ್ಣ ಶಿವಣ್ಣನಿಗೆ ತನ್ನ ನಾಲ್ವರು ತಂಗಿಯರೇ ಪ್ರಾಣ. ಈ ನಾಲ್ವರು ತಂಗಿಯರಲ್ಲಿ ಕೊನೆಯವಳು, ಮುದ್ದಿನ ತಂಗಿ 'ರಮ್ಯಾ'. ಸೀರಿಯಲ್ನಲ್ಲಿ ಸದಾ ಪುಸ್ತಕ ಹಿಡಿದು ಓದುತ್ತಾ ಕೂರುವ ಈ ರಮ್ಯಾ, ನಿಜ ಜೀವನದಲ್ಲೂ ಅಷ್ಟೇ ಓದಿನ ಗಿರಾಕಿ ಅನ್ನೋದು ಈಗ ಸಾಬೀತಾಗಿದೆ. ರಮ್ಯಾ ಪಾತ್ರದಲ್ಲಿ ನಟಿಸುತ್ತಿರುವ ಅಂಕಿತಾ ಗೌಡ, ಈ ವರ್ಷದ SSLC ಪರೀಕ್ಷೆಯಲ್ಲಿ ಭರ್ಜರಿ ಅಂಕಗಳೊಂದಿಗೆ ಡಿಸ್ಟಿಂಕ್ಷನ್ ಪಡೆದು ಪಾಸ್ ಆಗಿದ್ದಾರೆ.
ಇದು ಸೀರಿಯಲ್ ಕಥೆಯಲ್ಲ, ರಿಯಲ್ ಸಾಧನೆ
ಸಾಮಾನ್ಯವಾಗಿ ಸೀರಿಯಲ್ ನಟ-ನಟಿಯರು ನಟನೆಯಲ್ಲಿ ಬ್ಯುಸಿಯಾಗಿ ಓದನ್ನು ಕೈಬಿಡುತ್ತಾರೆ ಅಥವಾ ಅಷ್ಟಕ್ಕಷ್ಟೆ ಅಂಕ ಪಡೆಯುತ್ತಾರೆ ಎಂಬ ಮಾತಿದೆ. ಆದರೆ ಅಂಕಿತಾ ಗೌಡ ಅದನ್ನು ಸುಳ್ಳು ಮಾಡಿದ್ದಾರೆ. ಏಪ್ರಿಲ್ 23 ರಂದು ಪ್ರಕಟವಾದ ಎಸ್ಎಸ್ಎಲ್ಸಿ ಫಲಿತಾಂಶದಲ್ಲಿ ಅಂಕಿತಾ ಅವರು 625ಕ್ಕೆ 537 ಅಂಕಗಳನ್ನು ಗಳಿಸುವ ಮೂಲಕ ಎಲ್ಲರ ಹುಬ್ಬೇರಿಸಿದ್ದಾರೆ.
ನಟನೆ ಮತ್ತು ಓದು ಎರಡನ್ನೂ ಸರಿದೂಗಿಸಿಕೊಂಡು ಹೋಗುವುದು ಸುಲಭದ ಮಾತಲ್ಲ. ಮಂಡ್ಯ ಮೂಲದ ಈ ಪ್ರತಿಭೆ, ಬೆಂಗಳೂರಿನಲ್ಲಿ ವಾಸವಾಗಿದ್ದುಕೊಂಡು ಶೂಟಿಂಗ್ ಮಧ್ಯೆಯೂ ಅಭ್ಯಾಸ ಮಾಡಿ ಈ ಸಾಧನೆ ಮಾಡಿದ್ದಾರೆ.
ಅಂಕಿತಾ ಗೌಡ ಪಡೆದ ಅಂಕಗಳ ಡಿಟೇಲ್ಸ್ ಇಲ್ಲಿದೆ
ಅಂಕಿತಾ ಅವರು ಪ್ರತಿಯೊಂದು ವಿಷಯದಲ್ಲೂ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಅವರ ಅಂಕಗಳ ಪಟ್ಟಿ ಹೀಗಿದೆ
- ಇಂಗ್ಲಿಷ್ - 119
- ಹಿಂದಿ - 100
- ಸಮಾಜ ವಿಜ್ಞಾನ - 85
- ವಿಜ್ಞಾನ - 83
- ಕನ್ನಡ - 81
- ಗಣಿತ - 69
- ಒಟ್ಟು ಅಂಕಗಳು - 537
ಇಂಟರ್ನಲ್ ಮಾರ್ಕ್ಸ್ ಮತ್ತು ಪರೀಕ್ಷೆಯ ಅಂಕಗಳೆಲ್ಲಾ ಸೇರಿ ಅಂಕಿತಾ ಅವರು ಡಿಸ್ಟಿಂಕ್ಷನ್ನಲ್ಲಿ ಪಾಸಾಗಿದ್ದು, ತಂದೆ-ತಾಯಿ ಹಾಗೂ ಅಣ್ಣಯ್ಯ ಚಿತ್ರತಂಡಕ್ಕೆ ಹೆಮ್ಮೆ ತಂದಿದ್ದಾರೆ.
ಶೂಟಿಂಗ್ನಿಂದ ಬ್ರೇಕ್ ತಗೊಂಡಿದ್ದು ಇದಕ್ಕೇನಾ?
ಕಳೆದ ಕೆಲವು ದಿನಗಳಿಂದ 'ಅಣ್ಣಯ್ಯ' ಸೀರಿಯಲ್ನಲ್ಲಿ ರಮ್ಯಾ ಪಾತ್ರ ಅಷ್ಟಾಗಿ ಕಾಣಿಸಿಕೊಳ್ಳುತ್ತಿರಲಿಲ್ಲ. ಶಿವಣ್ಣನ ಮನೆಯಲ್ಲಿ ಅಷ್ಟೊಂದು ಗಲಾಟೆ ನಡೆಯುತ್ತಿದ್ದರೂ ಕೊನೆಯ ತಂಗಿ ಎಲ್ಲಿ ಹೋದಳು? ಎಂದು ಪ್ರೇಕ್ಷಕರು ಕೇಳುತ್ತಿದ್ದರು. ಈಗ ಅದಕ್ಕೆ ಉತ್ತರ ಸಿಕ್ಕಿದೆ. ಪರೀಕ್ಷೆಯ ತಯಾರಿಗಾಗಿ ಅಂಕಿತಾ ಅವರು ನಟನೆಯಿಂದ ಸ್ವಲ್ಪ ಬ್ರೇಕ್ ಪಡೆದಿದ್ದರು. ಈಗ ರಿಸಲ್ಟ್ ಬಂದ ಮೇಲೆ ಮತ್ತೆ ಸೀರಿಯಲ್ನಲ್ಲಿ ಸಕ್ರಿಯರಾಗಿದ್ದಾರೆ.
ಶಿವಣ್ಣನ 'ನೆಚ್ಚಿನ ತಂಗಿ'
'ಅಣ್ಣಯ್ಯ' ಧಾರಾವಾಹಿಯಲ್ಲಿ ಶಿವಣ್ಣನಿಗೆ ನಾಲ್ವರು ತಂಗಿಯರು: ರಾಣಿ, ರತ್ನಾ, ರಶ್ಮಿ ಮತ್ತು ರಮ್ಯಾ. ಇದರಲ್ಲಿ ರಮ್ಯಾ ಸಾಕು ತಂಗಿಯಾದರೂ ಶಿವಣ್ಣನಿಗೆ ಅವಳ ಮೇಲೆ ಅತೀವ ಪ್ರೀತಿ. ಇತ್ತೀಚೆಗಷ್ಟೇ ನಡೆದ 'ಜೀ ಕುಟುಂಬ ಅವಾರ್ಡ್ಸ್'ನಲ್ಲಿ ಈ ನಾಲ್ವರು ಸಹೋದರಿಯರಿಗೆ 'ನೆಚ್ಚಿನ ಸಹೋದರಿಯರು' ಪ್ರಶಸ್ತಿ ಕೂಡ ಸಿಕ್ಕಿತ್ತು.
ಸೀರಿಯಲ್ನಲ್ಲಿ ರಮ್ಯಾ ಪಾತ್ರದ ಡೈಲಾಗ್ಗಳು ಕಡಿಮೆ ಇರಬಹುದು, ಆದರೆ ಅವು ಸಖತ್ ಎಫೆಕ್ಟಿವ್ ಆಗಿರುತ್ತವೆ. ಈಗ ರಿಯಲ್ ಲೈಫ್ನಲ್ಲೂ ದೊಡ್ಡ ರಿಸಲ್ಟ್ ಕೊಡುವ ಮೂಲಕ ಅಂಕಿತಾ ಗೌಡ ತಾನೊಬ್ಬ ನಟಿ ಮಾತ್ರವಲ್ಲ, ಓದಿನಲ್ಲೂ ಮುಂದು ಎಂದು ತೋರಿಸಿಕೊಟ್ಟಿದ್ದಾರೆ.
ನಟನೆ ಹಾಗೂ ಶಿಕ್ಷಣ ಎರಡನ್ನೂ ಸಮಾನವಾಗಿ ಪ್ರೀತಿಸುತ್ತಿರುವ ಅಂಕಿತಾ ಗೌಡ ಅವರಿಗೆ ನಮ್ಮ ಕಡೆಯಿಂದಲೂ ಒಂದು ದೊಡ್ಡ ಕಂಗ್ರಾಜುಲೇಷನ್ಸ್! ಅವರ ಮುಂದಿನ ಭವಿಷ್ಯ ಇನ್ನಷ್ಟು ಉಜ್ವಲವಾಗಲಿ.
