ಭಾರತದ ಖ್ಯಾತ ಮಹಿಳಾ ಕುಸ್ತಿ ಪಟು ವಿನೇಶ್ ಫೋಗಾಟ್ ಅವರಿಗೆ ಸುಪ್ರೀಂ ಕೋರ್ಟ್ನಿಂದ ಭಾರಿ ದೊಡ್ಡ ರಿಲೀಫ್ ಸಿಕ್ಕಿದೆ. ಮುಂಬರುವ ಏಷ್ಯನ್ ಗೇಮ್ಸ್ (Asian Games 2026) ಆಯ್ಕೆ ಪ್ರಕ್ರಿಯೆಯ ಟ್ರಯಲ್ಸ್ನಲ್ಲಿ ಭಾಗವಹಿಸಲು ಸುಪ್ರೀಂ ಕೋರ್ಟ್ ವಿನೇಶ್ ಅವರಿಗೆ ಗ್ರೀನ್ ಸಿಗ್ನಲ್ ನೀಡಿದೆ. ನಾಳೆಯಿಂದ ಅಂದರೆ ಮೇ 30 ಮತ್ತು 31 ರಂದು ಈ ಪ್ರಮುಖ ಟ್ರಯಲ್ಸ್ ನಡೆಯಲಿದ್ದು, ಇದೀಗ ಕೋರ್ಟ್ ಆದೇಶದಿಂದಾಗಿ ವಿನೇಶ್ ಫೋಗಾಟ್ ಕಣಕ್ಕಿಳಿಯುವುದು ಪಕ್ಕಾ ಆಗಿದೆ.
ವಿನೇಶ್ ಫೋಗಾಟ್ ಟ್ರಯಲ್ಸ್ನಲ್ಲಿ ಭಾಗವಹಿಸುವುದಕ್ಕೆ ಭಾರತೀಯ ಕುಸ್ತಿ ಫೆಡರೇಷನ್ ತೀವ್ರ ವಿರೋಧ ವ್ಯಕ್ತಪಡಿಸಿತ್ತು. ಈ ಮೊದಲು ದೆಹಲಿ ಹೈಕೋರ್ಟ್ ವಿನೇಶ್ ಪರವಾಗಿ ತೀರ್ಪು ನೀಡಿತ್ತು. ಇದನ್ನು ಪ್ರಶ್ನಿಸಿ WFI ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು. ಆದರೆ ಸುಪ್ರೀಂ ಕೋರ್ಟ್ ಕೂಡ ಹೈಕೋರ್ಟ್ ಆದೇಶವನ್ನೇ ಎತ್ತಿಹಿಡಿದು, ರೆಸ್ಲಿಂಗ್ ಫೆಡರೇಷನ್ಗೆ ಬಿಗ್ ಶಾಕ್ ಕೊಟ್ಟಿದೆ.
ಕೋರ್ಟ್ ಅಂಗಳದಲ್ಲಿ ನಡೆದ ಈ ಹೈಡ್ರಾಮಾ ಮತ್ತು ವಿನೇಶ್ ಫೋಗಾಟ್ ಅವರಿಗೆ ಎದುರಾಗಿದ್ದ ಸವಾಲುಗಳ ಕಂಪ್ಲೀಟ್ ಡಿಟೇಲ್ಸ್ ಇಲ್ಲಿದೆ ನೋಡಿ.
ಹೈಕೋರ್ಟ್ ಕೊಟ್ಟಿದ್ದ ಖಡಕ್ ವಾರ್ನಿಂಗ್!
ಈ ಹಿಂದೆ ದೆಹಲಿ ಹೈಕೋರ್ಟ್ನಲ್ಲಿ ವಿಚಾರಣೆ ನಡೆದಾಗ, ವಿನೇಶ್ ಫೋಗಾಟ್ ಅವರಿಗೆ ಅನಗತ್ಯವಾಗಿ ನೋಟಿಸ್ ನೀಡಿ ಕಿರಿಕಿರಿ ಉಂಟುಮಾಡಿದ್ದಕ್ಕೆ ರೆಸ್ಲಿಂಗ್ ಫೆಡರೇಷನ್ (WFI) ವಿರುದ್ಧ ಕೋರ್ಟ್ ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿತ್ತು. "ನಮ್ಮ ದೇಶದಲ್ಲಿ ತಾಯ್ತನಕ್ಕೆ ಅಪಾರ ಗೌರವವಿದೆ. ಹೀಗಿರುವಾಗ ಡಬ್ಲ್ಯೂಎಫ್ಐ ತನ್ನ ಹಳೆಯ ಕಟ್ಟುನಿಟ್ಟಿನ ನಿಯಮಗಳನ್ನು ಮುಂದಿಟ್ಟುಕೊಂಡು ಒಬ್ಬ ಮಹಿಳಾ ಕ್ರೀಡಾಪಟುವಿಗೆ ತೊಂದರೆ ಕೊಡುತ್ತಿರುವುದು ಸರಿಯಲ್ಲ" ಎಂದು ಹೈಕೋರ್ಟ್ ಆಕ್ರೋಶ ಹೊರಹಾಕಿತ್ತು.
ಅಷ್ಟೇ ಅಲ್ಲದೆ, ಮೇ 30 ಮತ್ತು 31 ರಂದು ನಡೆಯುವ ಸೆಲಕ್ಷನ್ ಟ್ರಯಲ್ಸ್ನ ಸಂಪೂರ್ಣ ವಿಡಿಯೋ ರೆಕಾರ್ಡಿಂಗ್ ಮಾಡಬೇಕು ಎಂದು ಡಬ್ಲ್ಯೂಎಫ್ಐಗೆ ಆದೇಶಿಸಿದೆ. ಯಾವುದೇ ಅಕ್ರಮ ನಡೆಯದಂತೆ ತಡೆಯಲು ಸ್ಪೋರ್ಟ್ಸ್ ಅಥಾರಿಟಿ ಆಫ್ ಇಂಡಿಯಾ (SAI) ಮತ್ತು ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ (IOA) ಕಡೆಯಿಂದ ತಲಾ ಒಬ್ಬೊಬ್ಬ ಸ್ವತಂತ್ರ ವೀಕ್ಷಕರು ಅಲ್ಲಿ ಹಾಜರಿರಬೇಕು ಎಂದು ಹೈಕೋರ್ಟ್ ಕಠಿಣ ನಿಯಮ ಜಾರಿ ಮಾಡಿತ್ತು. ಈಗ ಸುಪ್ರೀಂ ಕೋರ್ಟ್ ಕೂಡ ಇದೇ ಆದೇಶವನ್ನು ಎತ್ತಿಹಿಡಿದಿದೆ.
ವಿನೇಶ್ಗೆ 'ಶೋಕಾಸ್ ನೋಟಿಸ್' ನೀಡಿದ್ದ WFI
ಇದಕ್ಕೂ ಮುನ್ನ, ರೆಸ್ಲಿಂಗ್ ಫೆಡರೇಷನ್ ಆಫ್ ಇಂಡಿಯಾ ವಿನೇಶ್ ಅವರಿಗೆ 'ಕಾರಣ ಕೇಳಿ ನೋಟಿಸ್' ಜಾರಿ ಮಾಡಿ ನಾಲ್ಕು ಮುಖ್ಯ ಪ್ರಶ್ನೆಗಳಿಗೆ ಉತ್ತರ ಕೇಳಿತ್ತು. ವಿನೇಶ್ ಫೋಗಾಟ್ ಅವರು ಶಿಸ್ತು ಉಲ್ಲಂಘಿಸಿದ್ದಾರೆ ಮತ್ತು ಡೋಪಿಂಗ್ ವಿರೋಧಿ ನಿಯಮಗಳನ್ನು ಗಾಳಿಗೆ ತೂರಿದ್ದಾರೆ ಎಂದು ಡಬ್ಲ್ಯೂಎಫ್ಐ ಗಂಭೀರ ಆರೋಪ ಮಾಡಿತ್ತು.
ಈ ಆರೋಪದ ಹಿನ್ನೆಲೆಯಲ್ಲಿ ಜೂನ್ 26, 2026 ರವರೆಗೆ ವಿನೇಶ್ ದೇಶದ ಯಾವುದೇ ದೇಶಿ ಕುಸ್ತಿ ಪಂದ್ಯಾವಳಿಗಳಲ್ಲಿ ಭಾಗವಹಿಸದಂತೆ ನಿಷೇಧ ಹೇರಲಾಗಿತ್ತು.
ಸಂಸಾರದ ಜಗಳ, ವಾಡಾ ನಿಯಮದ ನೆಪ!
ಫೆಡರೇಷನ್ ವಿಧಿಸಿದ್ದ ನಿಷೇಧದ ಕಾರಣದಿಂದಾಗಿ ವಿನೇಶ್ ಫೋಗಾಟ್ ಅವರಿಗೆ ಇತ್ತೀಚೆಗೆ ನಡೆದ ನ್ಯಾಷನಲ್ ಓಪನ್ ರ್ಯಾಂಕಿಂಗ್ ಟೂರ್ನಮೆಂಟ್ನಲ್ಲಿ ಭಾಗವಹಿಸಲು ಸಾಧ್ಯವಾಗಿರಲಿಲ್ಲ. ಇದರಿಂದ ಕಂಗಾಲಾದ ವಿನೇಶ್, ತಮಗೆ ಏಷ್ಯನ್ ಗೇಮ್ಸ್ ಟ್ರಯಲ್ಸ್ನಲ್ಲಾದರೂ ಭಾಗವಹಿಸಲು ಅವಕಾಶ ಕೊಡಿ ಎಂದು WFI ಬಳಿ ಮನವಿ ಮಾಡಿದ್ದರು. ಆದರೆ ಫೆಡರೇಷನ್ ಆ ಮನವಿಯನ್ನು ಕಸದ ಬುಟ್ಟಿಗೆ ಹಾಕಿತ್ತು.
ವಿಶ್ವ ಡೋಪಿಂಗ್ ವಿರೋಧಿ ಸಂಸ್ಥೆ (WADA) ನಿಯಮ 5.6.1ರ ಅಡಿಯಲ್ಲಿ ವಿನೇಶ್ ವಿರುದ್ಧ ಶಿಸ್ತು ಕ್ರಮ ಜಾರಿಯಲ್ಲಿದೆ, ಹಾಗಾಗಿ ಅವರಿಗೆ ಅವಕಾಶ ನೀಡಲ್ಲ ಎಂದು WFI ವಾದಿಸಿತ್ತು. ಈ ನಿಯಮದ ಪ್ರಕಾರ, ಸಂನ್ಯಾಸ ಅಥವಾ ಸುದೀರ್ಘ ಬ್ರೇಕ್ ಮುಗಿಸಿ ಮತ್ತೆ ಕಣಕ್ಕೆ ಮರಳುವ ಆಟಗಾರರು ಯಾವುದೇ ಟೂರ್ನಮೆಂಟ್ನಲ್ಲಿ ಆಡುವ ಮುನ್ನ ಕನಿಷ್ಠ 6 ತಿಂಗಳ ಮೊದಲೇ ನೋಟಿಸ್ ಅವಧಿಯನ್ನು ಪೂರ್ಣಗೊಳಿಸಬೇಕಿರುತ್ತದೆ. ಆದರೆ ಈ ಎಲ್ಲಾ ವಾದಗಳನ್ನು ತಳ್ಳಿಹಾಕಿದ ವಿನೇಶ್, ಹೈಕೋರ್ಟ್ ಹಾಗೂ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿ ಕೊನೆಗೂ ತಮಗೆ ಸಿಗಬೇಕಾದ ನ್ಯಾಯವನ್ನು ಪಡೆದುಕೊಂಡಿದ್ದಾರೆ.
ಕಣದಲ್ಲಿ ಎಷ್ಟೇ ಸವಾಲುಗಳು ಬಂದರೂ ಧೃತಿಗೆಡದೆ ಹೋರಾಡುವ ವಿನೇಶ್ ಫೋಗಾಟ್ ಅವರಿಗೆ ಸಿಕ್ಕ ಈ ಜಯ ಇಡೀ ಕ್ರೀಡಾಲೋಕಕ್ಕೆ ಮಾದರಿ. ರಾಜಕೀಯ ಅಥವಾ ವೈಯಕ್ತಿಕ ದ್ವೇಷಕ್ಕಾಗಿ ಒಬ್ಬ ಪ್ರತಿಭಾವಂತ ಆಟಗಾರ್ತಿಯ ಭವಿಷ್ಯ ಹಾಳುಮಾಡಲು ಹೊರಟವರಿಗೆ ಕೋರ್ಟ್ ಸೂಕ್ತ ಪಾಠ ಕಲಿಸಿದೆ.
