Sunday, Nov 22, 2026
|
Advertisement

ಸಚಿನ್ ತೆಂಡೂಲ್ಕರ್ ಅವರ ನೆಚ್ಚಿನ ಬ್ಯಾಟ್ ಹಿಂದಿದೆ ಇಂಟರೆಸ್ಟಿಂಗ್ ಕಥೆ - ಸುನಿಲ್ ಜೋಶಿಗೂ ಇದೆ ನಂಟು!!

ಕ್ರಿಕೆಟ್ ಜಗತ್ತಿನಲ್ಲಿ ಸಚಿನ್ ತೆಂಡೂಲ್ಕರ್ ಅವರ ಹೆಸರು ಕೇಳಿದಾಗ ಅವರ ದಾಖಲೆಗಳು, ಶತಕಗಳು ಮತ್ತು ಸ್ಮರಣೀಯ ಇನಿಂಗ್ಸ್‌ಗಳು ನೆನಪಾಗುತ್ತವೆ. ಆದರೆ ಅವರ ವೃತ್ತಿಜೀವನದಲ್ಲಿ ವಿಶೇಷ ಸ್ಥಾನ ಪಡೆದಿದ್ದ ಒಂದು ಬ್ಯಾಟ್‌ನ ಕಥೆ ಮಾತ್ರ ಇನ್ನಷ್ಟು ಕುತೂಹಲಕಾರಿಯಾಗಿದೆ. ಅದು ಆರಂಭದಲ್ಲಿ ಸಚಿನ್‌ಗಾಗಿ ತಯಾರಿಸಿದ ಬ್ಯಾಟ್ ಆಗಿರಲಿಲ್ಲ. ಭಾರತದ ಮಾಜಿ ಕ್ರಿಕೆಟಿಗ ಸುನಿಲ್ ಜೋಶಿ ಅವರಿಗಾಗಿ ಸಿದ್ಧಪಡಿಸಿದ್ದ ಬ್ಯಾಟ್ ಕೊನೆಗೆ ಸಚಿನ್ ಅವರ ಕೈ ಸೇರಿ, ಅವರ ನೆಚ್ಚಿನ ಬ್ಯಾಟ್‌ಗಳಲ್ಲಿ ಒಂದಾಯಿತು.

Sachin Tendulkar Favourite Bat | Photo Credit: https://www.instagram.com/sachintendulkar/#
Sachin Tendulkar Favourite Bat | Photo Credit: https://www.instagram.com/sachintendulkar/#

ಇತ್ತೀಚೆಗೆ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿರುವ ಮುಂಬೈ ಕ್ರಿಕೆಟ್ ಅಸೋಸಿಯೇಷನ್‌ನ ಶರದ್ ಪವಾರ್ ಕ್ರಿಕೆಟ್ ಮ್ಯೂಸಿಯಂನಲ್ಲಿ ಸಚಿನ್ ಅವರ 25 ವಿಶೇಷ ಬ್ಯಾಟ್‌ಗಳನ್ನು ಒಳಗೊಂಡ ‘ಬ್ಯಾಟೋಗ್ರಫಿ’ ವಿಭಾಗವನ್ನು ಅನಾವರಣಗೊಳಿಸಲಾಯಿತು. ಈ ಸಂದರ್ಭದಲ್ಲಿ ತಮ್ಮ ಕ್ರಿಕೆಟ್ ಬದುಕಿನ ಹಲವು ನೆನಪುಗಳನ್ನು ಹಂಚಿಕೊಂಡ ಸಚಿನ್, ಸುನಿಲ್ ಜೋಶಿಗಾಗಿ ಸಿದ್ಧಪಡಿಸಿದ್ದ ಬ್ಯಾಟ್ ತಮ್ಮ ಪಾಲಾದ ಘಟನೆಯನ್ನು ವಿವರಿಸಿದರು.

Advertisement

ಜೋಶಿಗಾಗಿ ತಯಾರಾಗಿದ್ದ ಬ್ಯಾಟ್ ಸಚಿನ್‌ಗೆ ಇಷ್ಟವಾಗಿದ್ದು ಹೇಗೆ

2009-10ರ ಅವಧಿಯಲ್ಲಿ ಭಾರತ ತಂಡ ಮೊಹಾಲಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲಿ ಆಡುತ್ತಿದ್ದಾಗ ಬ್ಯಾಟ್ ತಯಾರಕ ಸೋಮಿ ಕೊಹ್ಲಿ, ಸಚಿನ್ ಅವರ ಕೊಠಡಿಗೆ ಕೆಲವು ಬ್ಯಾಟ್‌ಗಳನ್ನು ತಂದಿದ್ದರು. ಅವುಗಳಲ್ಲಿ ಒಂದು ಬ್ಯಾಟ್ ಬದಿಯಲ್ಲಿ ಇಡಲಾಗಿತ್ತು. ಅದನ್ನು ಗಮನಿಸಿದ ಸಚಿನ್, ಯಾರಿಗಾಗಿ ತಯಾರಿಸಲಾಗಿದೆ ಎಂದು ವಿಚಾರಿಸಿದರು.

ಆ ಬ್ಯಾಟ್ ಸುನಿಲ್ ಜೋಶಿಗಾಗಿ ಮಾಡಲಾಗಿತ್ತು. ಅಲ್ಲದೆ, ಅದು ಸಚಿನ್ ಬಳಸುವ ಬ್ಯಾಟ್‌ಗಿಂತ ಸ್ವಲ್ಪ ಉದ್ದವಾಗಿತ್ತು. ಹೀಗಾಗಿ ಅದು ಅವರಿಗೆ ಸೂಕ್ತವಲ್ಲ ಎಂದು ತಯಾರಕರು ತಿಳಿಸಿದರು. ಆದರೆ ಕುತೂಹಲದಿಂದ ಸಚಿನ್ ಆ ಬ್ಯಾಟ್ ತೆಗೆದುಕೊಂಡು ಚೆಂಡನ್ನು ಹೊಡೆದು ನೋಡಿದರು. ಚೆಂಡು ನೇರವಾಗಿ ಮೇಲ್ಛಾವಣಿಗೆ ತಾಗುವಷ್ಟು ದೂರ ಹಾರಿತು.

ಅದರ ಹೊಡೆತ ಮತ್ತು ಹಿಡಿತ ಸಚಿನ್‌ಗೆ ಬಹಳ ಇಷ್ಟವಾಯಿತು. ತಕ್ಷಣವೇ ಆ ಬ್ಯಾಟ್ ತನಗೆ ಬೇಕೆಂದು ಕೇಳಿದ ಅವರು, ಅದರ ಬದಲಾಗಿ ಸುನಿಲ್ ಜೋಶಿಗೆ ಎರಡು ಹೆಚ್ಚುವರಿ ಬ್ಯಾಟ್‌ಗಳನ್ನು ನೀಡುವುದಾಗಿ ಹೇಳಿದರು. ಬ್ಯಾಟ್‌ನ ಕೆಳಭಾಗವನ್ನು ಕತ್ತರಿಸಿ ತಮ್ಮ ಬಳಕೆಗೆ ತಕ್ಕಂತೆ ಸಿದ್ಧಪಡಿಸಿ ಬೇಗ ಕಳುಹಿಸುವಂತೆಯೂ ಸೂಚಿಸಿದರು.

ಪಂದ್ಯಕ್ಕೆ ಹೊರಡುವಾಗಲೇ ತಲುಪಿದ ಬ್ಯಾಟ್

ಮುಂದಿನ ಪಂದ್ಯ ಹೈದರಾಬಾದ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆಯಬೇಕಿತ್ತು. ಮೊಹಾಲಿಯಿಂದ ಹೈದರಾಬಾದ್‌ಗೆ ತೆರಳಿದ ಬಳಿಕವೂ ಸಚಿನ್ ಆ ಬ್ಯಾಟ್‌ಗಾಗಿ ಕಾಯುತ್ತಿದ್ದರು. ಪಂದ್ಯ ನಡೆಯುವ ದಿನ ತಂಡದ ಬಸ್ ಕ್ರೀಡಾಂಗಣಕ್ಕೆ ಹೊರಡಲು ಸಿದ್ಧವಾಗಿದ್ದಾಗ, ಬ್ಯಾಟ್ ತಯಾರಕರು ಅದನ್ನು ತಲುಪಿಸಿದರು.

Advertisement

ವಿಶೇಷವೆಂದರೆ, ಆ ಬ್ಯಾಟ್‌ನೊಂದಿಗೆ ಸಚಿನ್ ಅದಕ್ಕೂ ಮೊದಲು ಒಂದೇ ಒಂದು ಚೆಂಡನ್ನೂ ಆಡಿರಲಿಲ್ಲ. ಆದರೂ ಹೊಸ ಬ್ಯಾಟ್‌ನೊಂದಿಗೆ ನೇರವಾಗಿ ಪಂದ್ಯಕ್ಕೆ ಇಳಿದರು. ಅದು ಅವರಿಗೆ ಅದೃಷ್ಟದ ಬ್ಯಾಟ್ ಮಾತ್ರವಲ್ಲದೆ, ಅತ್ಯಂತ ಇಷ್ಟದ ಬ್ಯಾಟ್‌ಗಳಲ್ಲಿ ಒಂದಾಯಿತು.

ಈ ಬ್ಯಾಟ್‌ನಿಂದಲೇ ಸಚಿನ್ 2009ರಲ್ಲಿ ಹೈದರಾಬಾದ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ 175 ರನ್‌ಗಳ ಅದ್ಭುತ ಇನಿಂಗ್ಸ್ ಆಡಿದರು. ನಂತರ 2010ರಲ್ಲಿ ಗ್ವಾಲಿಯರ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಏಕದಿನ ಕ್ರಿಕೆಟ್ ಇತಿಹಾಸದಲ್ಲೇ ಪುರುಷ ಆಟಗಾರನ ಮೊದಲ ದ್ವಿಶತಕ ದಾಖಲಿಸಿದರು. 2009ರಿಂದ 2011ರವರೆಗೆ ಬಳಸಿದ ಈ ಬ್ಯಾಟ್‌ಗೆ ‘ಸೂಪರ್ ಬ್ಯಾಟ್’ ಎಂಬ ವಿಶೇಷ ಗುರುತನ್ನೂ ನೀಡಲಾಗಿದೆ.

25 ಬ್ಯಾಟ್‌ಗಳಲ್ಲಿ ಅಡಗಿರುವ ಸಚಿನ್ ಬದುಕಿನ ನೆನಪುಗಳು

‘ಬ್ಯಾಟೋಗ್ರಫಿ’ ಪ್ರದರ್ಶನದಲ್ಲಿರುವ 25 ಬ್ಯಾಟ್‌ಗಳು ಸಚಿನ್ ಅವರ ಕ್ರಿಕೆಟ್ ಬದುಕಿನ ವಿಭಿನ್ನ ಹಂತಗಳನ್ನು ಪ್ರತಿನಿಧಿಸುತ್ತವೆ. ಐದು ವರ್ಷದವರಾಗಿದ್ದಾಗ ಅಕ್ಕ ಸವಿತಾ ಕಾಶ್ಮೀರದಿಂದ ತಂದುಕೊಟ್ಟ ಮೊದಲ ಬ್ಯಾಟ್‌ನಿಂದ ಹಿಡಿದು, 2013ರಲ್ಲಿ ವಾಂಖೆಡೆ ಕ್ರೀಡಾಂಗಣದಲ್ಲಿ ಆಡಿದ ಕೊನೆಯ ಟೆಸ್ಟ್ ಪಂದ್ಯದ ಬ್ಯಾಟ್‌ವರೆಗೂ ಈ ಸಂಗ್ರಹದಲ್ಲಿ ಸ್ಥಾನ ಪಡೆದಿವೆ.

1990ರಲ್ಲಿ ಇಂಗ್ಲೆಂಡ್‌ನ ಓಲ್ಡ್ ಟ್ರಾಫರ್ಡ್‌ನಲ್ಲಿ ತಮ್ಮ ಮೊದಲ ಟೆಸ್ಟ್ ಶತಕ ದಾಖಲಿಸಿದಾಗ ಬಳಸಿದ ಬ್ಯಾಟ್, 1998ರಲ್ಲಿ ಡಾನ್ ಬ್ರಾಡ್ಮನ್ ಉಡುಗೊರೆಯಾಗಿ ನೀಡಿದ ಬ್ಯಾಟ್ ಮತ್ತು 2012ರ ಮಾರ್ಚ್ 16ರಂದು ಬಾಂಗ್ಲಾದೇಶ ವಿರುದ್ಧ 100ನೇ ಅಂತಾರಾಷ್ಟ್ರೀಯ ಶತಕ ಗಳಿಸಿದಾಗ ಬಳಸಿದ ಬ್ಯಾಟ್ ಕೂಡ ಪ್ರದರ್ಶನದಲ್ಲಿವೆ.

1996ರ ವಿಶ್ವಕಪ್‌ನಲ್ಲಿ ಜಾಹೀರಾತು ಸ್ಟಿಕ್ಕರ್ ಇಲ್ಲದ ಬ್ಯಾಟ್‌ನೊಂದಿಗೆ ಆಡಿದ ತಮ್ಮ ನಿರ್ಧಾರದ ಬಗ್ಗೆಯೂ ಸಚಿನ್ ನೆನಪಿಸಿಕೊಂಡರು. ಮದ್ಯ ಮತ್ತು ತಂಬಾಕು ಉತ್ಪನ್ನಗಳನ್ನು ಪ್ರಚಾರ ಮಾಡಬಾರದು ಎಂಬ ಕುಟುಂಬದ ನಿರ್ಧಾರದಿಂದ ಅವರು ಇಂತಹ ಜಾಹೀರಾತುಗಳಿಂದ ದೂರ ಉಳಿದಿದ್ದರು. ಉತ್ತಮ ಪ್ರದರ್ಶನ ನೀಡುತ್ತಿದ್ದ ಸಮಯದಲ್ಲಿ ಬ್ಯಾಟ್ ಮೇಲೆ ಹೊಸ ಸ್ಟಿಕ್ಕರ್ ಹಾಕಲು ಬಂದ ಪ್ರಸ್ತಾಪವನ್ನೂ ಅವರು ವಿಶ್ವಕಪ್ ಮುಗಿಯುವವರೆಗೆ ತಿರಸ್ಕರಿಸಿದ್ದರು.

ಸಚಿನ್ ಪಾಲಿಗೆ ಬ್ಯಾಟ್ ಕೇವಲ ಆಟದ ಸಾಧನವಲ್ಲ. ಅದು ಅವರ ಕ್ರಿಕೆಟ್ ಬದುಕಿನ ಅವಿಭಾಜ್ಯ ಅಂಗ. ತಮ್ಮ ಬ್ಯಾಟ್‌ಗಳನ್ನು ಮ್ಯೂಸಿಯಂಗೆ ನೀಡುವಾಗಲೂ ಅವುಗಳನ್ನು ತಮ್ಮ ದೇಹದ ಒಂದು ಭಾಗದಂತೆ ನೋಡಿಕೊಳ್ಳಬೇಕು ಎಂದು ಅವರು ಮನವಿ ಮಾಡಿದ್ದರು. ಈ ಕಾರಣಕ್ಕಾಗಿಯೇ ‘ಬ್ಯಾಟೋಗ್ರಫಿ’ ಪ್ರದರ್ಶನವು ಕೇವಲ ಬ್ಯಾಟ್‌ಗಳ ಸಂಗ್ರಹವಾಗಿರದೆ, ಕ್ರಿಕೆಟ್ ದಿಗ್ಗಜನ ಬದುಕಿನ ನೆನಪುಗಳ ಕಥೆಯಾಗಿದೆ.

Comments