ಸಂಕಷ್ಟದ ಸಮಯದಲ್ಲಿ ದೇವದೂತರಂತೆ ಬರುವ 108 ಅಂಬ್ಯುಲೆನ್ಸ್ ಈ ಬಾರಿ ಒಂದು ಸುಂದರ ಕ್ಷಣಕ್ಕೆ ಸಾಕ್ಷಿಯಾಗಿದೆ. ಆಸ್ಪತ್ರೆಗೆ ತಲುಪುವ ಮೊದಲೇ ತುರ್ತು ಪರಿಸ್ಥಿತಿಯಲ್ಲಿ ತಾಯಿಯೊಬ್ಬರು ಅಂಬ್ಯುಲೆನ್ಸ್ನಲ್ಲೇ ಇಬ್ಬರು ಮುದ್ದಾದ ಅವಳಿ ಮಕ್ಕಳಿಗೆ ಜನ್ಮ ನೀಡಿದ್ದಾರೆ.
ವಿಜಯನಗರ ಜಿಲ್ಲೆಯ ಹೊಸಪೇಟೆ ತಾಲೂಕಿನ ಹಂಪಿನಕಟ್ಟೆ ಗ್ರಾಮದ ನಿವಾಸಿ ಶಕೀಲಾ ಎಂಬುವವರಿಗೆ ಇಂದು ಮುಂಜಾನೆ ಹೆರಿಗೆ ನೋವು ಕಾಣಿಸಿಕೊಂಡಿದೆ. ತಕ್ಷಣವೇ ಮನೆಯವರು 108 ಅಂಬ್ಯುಲೆನ್ಸ್ಗೆ ಕರೆ ಮಾಡಿದ್ದಾರೆ. ನೋವಿನಿಂದ ಬಳಲುತ್ತಿದ್ದ ಶಕೀಲಾ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಹಂಪಿನಕಟ್ಟೆಯಿಂದ ಹೊಸಪೇಟೆಯ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ಯಲಾಗುತ್ತಿತ್ತು.
ವಿಧಿಯಾಟ ಬೇರೆಯೇ ಇತ್ತು. ಆಸ್ಪತ್ರೆಗೆ ತಲುಪಲು ಇನ್ನೂ ದಾರಿಯಿರುವಾಗಲೇ ಶಕೀಲಾ ಅವರಿಗೆ ಹೆರಿಗೆ ನೋವು ಮಿತಿಮೀರಿದೆ. ಪರಿಸ್ಥಿತಿ ಗಂಭೀರವಾಗುತ್ತಿರುವುದನ್ನು ಗಮನಿಸಿದ ಅಂಬ್ಯುಲೆನ್ಸ್ ಸಿಬ್ಬಂದಿ, ದಾರಿಯಲ್ಲೇ ಹೆರಿಗೆ ಮಾಡಿಸಲು ನಿರ್ಧರಿಸಿದರು.
ಅಂಬ್ಯುಲೆನ್ಸ್ನಲ್ಲಿದ್ದ ತುರ್ತು ಆರೋಗ್ಯ ತಜ್ಞ ಅನಿಲ್ ಕುಮಾರ್ ಜೆ ಅವರು ಅತ್ಯಂತ ಜಾಣ್ಮೆ ಮತ್ತು ಎಚ್ಚರಿಕೆಯಿಂದ ಹೆರಿಗೆ ಪ್ರಕ್ರಿಯೆ ಆರಂಭಿಸಿದರು. ಬೆಳಗಿನ ಜಾವ ಸರಿಯಾಗಿ 4 ಗಂಟೆಗೆ ಶಕೀಲಾ ಅವರು ಮೊದಲ ಮಗುವಿಗೆ ಜನ್ಮ ನೀಡಿದರು. ಸರಿ ಸುಮಾರು 20 ನಿಮಿಷಗಳ ನಂತರ, ಅಂದರೆ 4:20ಕ್ಕೆ ಮತ್ತೊಂದು ಮಗು ಈ ಭೂಮಿಗೆ ಕಾಲಿಟ್ಟಿತು.
ಈ ತುರ್ತು ಹೆರಿಗೆಯ ಸಮಯದಲ್ಲಿ ಆರೋಗ್ಯ ತಜ್ಞ ಅನಿಲ್ ಕುಮಾರ್ ಅವರಿಗೆ ಆಶಾ ಕಾರ್ಯಕರ್ತೆ ಗಂಗಮ್ಮ ಅವರು ಸಾಥ್ ನೀಡಿದರು. ಇನ್ನು ವಾಹನ ಚಾಲಕ ಭಾಷಾ ಅವರು ರಸ್ತೆಯ ಗುಂಡಿಗಳನ್ನು ತಪ್ಪಿಸಿ ಅಂಬ್ಯುಲೆನ್ಸ್ ಅನ್ನು ಸುರಕ್ಷಿತವಾಗಿ ಚಲಾಯಿಸುವ ಮೂಲಕ ಸಹಕರಿಸಿದರು. ಆಸ್ಪತ್ರೆಯ ನಾಲ್ಕು ಗೋಡೆಗಳ ನಡುವೆ ನಡೆಯಬೇಕಿದ್ದ ಹೆರಿಗೆ, ಅಂಬ್ಯುಲೆನ್ಸ್ನ ಪುಟ್ಟ ಜಾಗದಲ್ಲಿ ಯಶಸ್ವಿಯಾಗಿ ನಡೆದಿದೆ.
ತಾಯಿ-ಮಕ್ಕಳು ಹೇಗಿದ್ದಾರೆ?
ಹೆರಿಗೆಯ ನಂತರ ತಾಯಿ ಶಕೀಲಾ ಮತ್ತು ಇಬ್ಬರು ಅವಳಿ ಮಕ್ಕಳು ಪೂರ್ಣ ಪ್ರಮಾಣದಲ್ಲಿ ಆರೋಗ್ಯವಾಗಿದ್ದಾರೆ. ಸದ್ಯಕ್ಕೆ ಇವರನ್ನು ಹೆಚ್ಚಿನ ಆರೈಕೆಗಾಗಿ ಹೊಸಪೇಟೆಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. "ನನ್ನ ಮಕ್ಕಳು ಮತ್ತು ನಾನು ಆರಾಮವಾಗಿದ್ದೇವೆ, ಸಿಬ್ಬಂದಿಯವರು ಮಾಡಿದ ಸಹಾಯವನ್ನು ಎಂದಿಗೂ ಮರೆಯಲು ಸಾಧ್ಯವಿಲ್ಲ" ಎಂದು ತಾಯಿ ಕೃತಜ್ಞತೆ ಸಲ್ಲಿಸಿದ್ದಾರೆ.
ಸಾರ್ವಜನಿಕರ ಶ್ಲಾಘನೆ
ಮಾರ್ಗ ಮಧ್ಯೆಯೇ ಸಾಹಸ ಮಾಡಿ ತಾಯಿ ಮತ್ತು ಮಕ್ಕಳ ಜೀವ ಉಳಿಸಿದ ಅಂಬ್ಯುಲೆನ್ಸ್ ಸಿಬ್ಬಂದಿಯ ಕಾರ್ಯಕ್ಕೆ ಈಗ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಆಂಬ್ಯುಲೆನ್ಸ್ ಅಂದರೆ ಬರಿ ರೋಗಿಗಳನ್ನು ಸಾಗಿಸುವ ವಾಹನವಲ್ಲ, ಅದು ಜೀವ ಉಳಿಸುವ 'ಚಲಿಸುವ ಆಸ್ಪತ್ರೆ' ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ.
ಒಂದೇ ಹೊಟ್ಟೆಯಲ್ಲಿ ಹುಟ್ಟಿದ ಇಬ್ಬರು ಪುಟ್ಟ ಕಂದಮ್ಮಗಳ ಮೊದಲ ಅಳು ಅಂಬ್ಯುಲೆನ್ಸ್ನಲ್ಲಿ ಕೇಳಿಬಂದಿದ್ದು, ಹಂಪಿನಕಟ್ಟೆ ಗ್ರಾಮದ ಈ ಕುಟುಂಬದಲ್ಲಿ ಈಗ ಹಬ್ಬದ ವಾತಾವರಣ ಮನೆಮಾಡಿದೆ.
