ವಿಧಾನಸಭೆಯ ಕಲಾಪ ಅಂದ್ರೆ ಕೇವಲ ಗಂಭೀರ ಚರ್ಚೆಗಳಲ್ಲ, ಕೆಲವೊಮ್ಮೆ ರಾಜಕೀಯ ನಾಯಕರ ಕಾಲೆಳೆಯುವಿಕೆ ಮತ್ತು ಹಾಸ್ಯಮಯ ಸನ್ನಿವೇಶಗಳಿಗೂ ಸಾಕ್ಷಿಯಾಗುತ್ತದೆ. ಇತ್ತೀಚೆಗೆ ನಡೆದ ಕಲಾಪದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ತಮ್ಮದೇ ಶೈಲಿಯಲ್ಲಿ ವಿರೋಧ ಪಕ್ಷದ ನಾಯಕರಿಗೆ ಟಾಂಗ್ ನೀಡುವ ಮೂಲಕ ಎಲ್ಲರನ್ನು ನಗಿಸಿದರು.
ಚರ್ಚೆಯ ಮಧ್ಯೆ ಸಿಎಂ ಸಿದ್ದರಾಮಯ್ಯ ಅವರು ನೇರವಾಗಿ ವಿರೋಧ ಪಕ್ಷದ ನಾಯಕ ಆರ್. ಅಶೋಕ್ ಅವರನ್ನು ಕೆಣಕಿದರು. "ಅಶೋಕ್, ನಿಮಗೆ ಮುಖ್ಯಮಂತ್ರಿ ಆಗುವ ಆಸೆ ಇಲ್ವಾ?" ಎಂದು ಕೇಳಿದಾಗ ಅಶೋಕ್ ಅವರು ಏನು ಹೇಳಬೇಕೆಂದು ತಿಳಿಯದೆ ಸುಮ್ಮನೆ ನಕ್ಕರು. ಮಾತು ಮುಂದುವರಿಸಿದ ಸಿದ್ದರಾಮಯ್ಯ, "ಅಶೋಕ್ ಆಗಲಿ, ಅರವಿಂದ ಬೆಲ್ಲದ್ ಆಗಲಿ ಅಥವಾ ಅಶ್ವಥ್ ನಾರಾಯಣ್ ಆಗಲಿ, ಯಾರೇ ಸಿಎಂ ಆದರೂ ನನಗೆ ಸಂತೋಷವೇ. ಆದರೆ ಒಂದು ಮಾತು ನೆನಪಿಡಿ, ಬಿ.ವೈ. ವಿಜಯೇಂದ್ರ ಅವರು ನಿಮ್ಮನ್ನು ಸಿಎಂ ಆಗಲು ಬಿಡುವುದಿಲ್ಲ!" ಎಂದು ಬಿಜೆಪಿಯ ಆಂತರಿಕ ರಾಜಕೀಯದ ಗಾಯದ ಮೇಲೆ ಉಪ್ಪು ಸವರಿದರು.
ಈ ಸಂದರ್ಭದಲ್ಲಿ ಮಧ್ಯಪ್ರವೇಶಿಸಿದ ಬಿಜೆಪಿ ಶಾಸಕ ಸುನಿಲ್ ಕುಮಾರ್, "ನೀವು ಎಲ್ಲರ ಹೆಸರು ಹೇಳ್ತಿದ್ದೀರಾ, ಆದರೆ ಡಿ.ಕೆ. ಶಿವಕುಮಾರ್ ಅವರು ಸಿಎಂ ಆಗಬೇಕು ಅಂತ ಯಾಕೆ ಒಂದು ಬಾರಿಯೂ ಹೇಳ್ತಿಲ್ಲ?" ಎಂದು ನೇರವಾಗಿ ಪ್ರಶ್ನಿಸಿದರು. ಇದಕ್ಕೆ ಸಿಎಂ ಸಿದ್ದರಾಮಯ್ಯ ಅವರು ಬಹಳ ಜಾಣ್ಮೆಯಿಂದ, "ಹೈಕಮಾಂಡ್ ಯಾವಾಗ ಹೇಳುತ್ತದೋ ಆಗ ಅವರು ಸಿಎಂ ಆಗುತ್ತಾರೆ. ಅಲ್ಲಿಯವರೆಗೆ ನಾನೇ ಸಿಎಂ!" ಎಂದು ಸ್ಪಷ್ಟಪಡಿಸಿದರು. ಜೊತೆಗೆ ಎಂ.ಬಿ. ಪಾಟೀಲ್, ಮುನಿಯಪ್ಪ, ಈಶ್ವರ್ ಖಂಡ್ರೆ ಹೀಗೆ ಹಲವರ ಹೆಸರುಗಳನ್ನು ತೆಗೆದುಕೊಂಡರಾದರೂ, ಡಿಕೆಶಿ ಅವರ ಹೆಸರನ್ನು ಮಾತ್ರ ಪ್ರತ್ಯೇಕವಾಗಿ ಉಲ್ಲೇಖಿಸದೆ ಮೌನ ವಹಿಸಿದ್ದು ರಾಜಕೀಯ ಅಂಗಳದಲ್ಲಿ ಹೊಸ ಚರ್ಚೆಗೆ ಕಾರಣವಾಯಿತು.
ಅವಧಿಗೂ ಮುನ್ನವೇ ನಡೆದ ಶಾಸಕರ ಫೋಟೋ ಶೂಟ್ ವಿಚಾರವನ್ನೂ ಅಶೋಕ್ ಸದನದಲ್ಲಿ ಪ್ರಸ್ತಾಪಿಸಿದರು. "ಐದು ವರ್ಷಕ್ಕೊಮ್ಮೆ ಫೋಟೋ ತೆಗೆಸೋದು ಸಂಪ್ರದಾಯ, ಇವರು ಯಾಕೆ ಈಗಲೇ ತೆಗೆಸಿದರು? ಸ್ಪೀಕರ್ ಯು.ಟಿ. ಖಾದರ್ ಮಂತ್ರಿ ಆಗೋಕೆ ಹೊರಟಿದ್ದಾರಾ?" ಎಂದು ಅಶೋಕ್ ಪ್ರಶ್ನಿಸಿದರು. ಇದಕ್ಕೆ ತಕ್ಷಣವೇ ಉತ್ತರ ನೀಡಿದ ಸಿದ್ದರಾಮಯ್ಯ, "ಖಾದರ್ ಎಲ್ಲಿಗೂ ಹೋಗಲ್ಲ, ಅವರ ಪಾಡಿಗೆ ಅವರು ಇರುತ್ತಾರೆ. ನೀನು ಸುಮ್ಮನೆ 'ಜಾಕ್' (ಪ್ರಚೋದನೆ) ಹಾಕಬೇಡ ಅಶೋಕ್, ನಿನ್ನ ಇಂತಹ ಕಿತಾಪತಿಗಳಿಗೆ ಅವರು ತಲೆ ಕೆಡಿಸಿಕೊಳ್ಳುವುದಿಲ್ಲ" ಎಂದು ನಗುತ್ತಲೇ ಚೇಷ್ಟೆ ಮಾಡಿದರು.
ಕೊನೆಯದಾಗಿ ಸಿದ್ದರಾಮಯ್ಯ ಅವರು ಸದನದಲ್ಲಿ ಒಂದು ಫಿಲಾಸಫಿ ಮಾತನಾಡಿದರು. "ಈ ಸದನದಲ್ಲಿರುವ 224 ಶಾಸಕರೂ ಮುಖ್ಯಮಂತ್ರಿಯಾಗುವ ಯೋಗ್ಯತೆ ಹೊಂದಿದ್ದಾರೆ. ಎಂ.ಬಿ. ಪಾಟೀಲ್ ಆಗಲಿ, ಮುನಿಯಪ್ಪ ಆಗಲಿ, ಎಲ್ಲರಿಗೂ ಆ ಸ್ಥಾನಕ್ಕೇರುವ ಅರ್ಹತೆಯಿದೆ. ಆದರೆ ಮುಖ್ಯವಾದುದು ಅವಕಾಶ. ಯೋಗ್ಯತೆ ಇದ್ದರೂ ಅವಕಾಶ ಸಿಗದಿದ್ದರೆ ಏನು ಮಾಡಲು ಸಾಧ್ಯ?" ಎಂದು ತಮ್ಮದೇ ಶೈಲಿಯಲ್ಲಿ ನುಡಿದರು.
ಸಿಎಂ ಕುರ್ಚಿಯ ವಿಚಾರದಲ್ಲಿ ಯಾರಿಗೆ ಬಲೆ ಬೀಳಿಸಿದರೂ, ಸಿದ್ದರಾಮಯ್ಯ ಅವರು ಮಾತ್ರ ಬಹಳ ಲವಲವಿಕೆಯಿಂದ ಚರ್ಚೆಯನ್ನು ತಮಗೆ ಬೇಕಾದ ಕಡೆಗೆ ತಿರುಗಿಸಿ, ಸದನವನ್ನು ನಗುವಿನ ಅಲೆಯಲ್ಲಿ ತೇಲುವಂತೆ ಮಾಡಿದರು. ರಾಜಕೀಯ ಅಂದ್ರೆ ಹೀಗೆಯೇ ಇರಬೇಕು ಎಂಬಂತೆ ಸಿಎಂ ನೀಡಿದ ಉತ್ತರಗಳು ಸದ್ಯ ಸಖತ್ ವೈರಲ್ ಆಗುತ್ತಿವೆ.
