ಐಪಿಎಲ್ ಕ್ರಿಕೆಟ್ ಅಂದ್ರೆ ಕೇವಲ ಒಂದು ಆಟವಲ್ಲ, ಅದೊಂದು ಭಾವನೆ. ಅದ್ರಲ್ಲೂ ನಮ್ಮ ಆರ್ಸಿಬಿ (RCB) ತಂಡದ ಮೇಲೆ ಕನ್ನಡಿಗರಿಗೆ ಇರುವ ಪ್ರೀತಿ ಅಷ್ಟಿಷ್ಟಲ್ಲ. ಇತ್ತೀಚೆಗೆ ಯುನೈಟೆಡ್ ಸ್ಪಿರಿಟ್ಸ್ ಕಂಪನಿಯು ಆರ್ಸಿಬಿ ತಂಡವನ್ನು ಆದಿತ್ಯ ಬಿರ್ಲಾ ಗ್ರೂಪ್ಗೆ ಬರೋಬ್ಬರಿ 16,706 ಕೋಟಿ ರೂಪಾಯಿಗೆ ಮಾರಾಟ ಮಾಡಿದೆ. ಈ ಸುದ್ದಿ ಹೊರಬಿದ್ದ ಬೆನ್ನಲ್ಲೇ, "ಇನ್ಮುಂದೆ ತಂಡದ ಹೆಸರು ಬದಲಾಗುತ್ತಾ?", "ನಮ್ಮ ಆರ್ಸಿಬಿ ಹೆಸರು ಉಳಿಯುತ್ತಾ?" ಎಂಬ ಆತಂಕ ಅಭಿಮಾನಿಗಳಲ್ಲಿ ಮನೆಮಾಡಿತ್ತು. ಆದರೆ, ಈಗ ಈ ಎಲ್ಲಾ ವದಂತಿಗಳಿಗೆ ಆದಿತ್ಯ ಬಿರ್ಲಾ ಗ್ರೂಪ್ನ ಅನನ್ಯಾ ಬಿರ್ಲಾ ಅವರು ಸ್ಪಷ್ಟನೆಯೊಂದನ್ನು ನೀಡುವ ಮೂಲಕ ಅಭಿಮಾನಿಗಳಿಗೆ ದೊಡ್ಡ ಗುಡ್ ನ್ಯೂಸ್ ಕೊಟ್ಟಿದ್ದಾರೆ.
ವಿಜಯ್ ಮಲ್ಯ ಅವರು ತಾವು ತಯಾರಿಸುತ್ತಿದ್ದ 'ರಾಯಲ್ ಚಾಲೆಂಜ್' ವಿಸ್ಕಿ ಬ್ರ್ಯಾಂಡ್ ಪ್ರಚಾರಕ್ಕಾಗಿ ಈ ತಂಡಕ್ಕೆ 'ರಾಯಲ್ ಚಾಲೆಂಜರ್ಸ್ ಬೆಂಗಳೂರು' ಎಂದು ಹೆಸರಿಟ್ಟಿದ್ದರು. ಮಲ್ಯ ಅವರು ಬೆಂಗಳೂರಿನವರಾಗಿದ್ದರಿಂದ ಈ ಹೆಸರು ಕನ್ನಡಿಗರ ಮನಸ್ಸಿಗೆ ತೀರ ಹತ್ತಿರವಾಯಿತು. ಆನಂತರ, 'Bangalore' ಎನ್ನುವುದನ್ನು 'Bengaluru' ಎಂದು ಬದಲಿಸಿ, ಕನ್ನಡಿಗರ ಭಾವನೆಗೆ ದೊಡ್ಡ ಗೌರವ ನೀಡಲಾಯಿತು. ಹೀಗಾಗಿ, ಯಾವುದೇ ಕಾರಣಕ್ಕೂ ಈ ಹೆಸರು ಬದಲಾಗಬಾರದು ಎಂದು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಮನವಿ ಮಾಡಿಕೊಳ್ಳುತ್ತಲೇ ಬಂದಿದ್ದರು.
ಹೊಸ ಮಾಲೀಕರು ಬಂದ ಮೇಲೆ ತಂಡದ ಹೆಸರನ್ನು ಬದಲಾಯಿಸುತ್ತಾರೆ ಎಂಬ ಚರ್ಚೆ ಜೋರಾಗಿತ್ತು. ಆದರೆ, ಅನನ್ಯಾ ಬಿರ್ಲಾ ಅವರು ತಮ್ಮ ಇನ್ಸ್ಟಾಗ್ರಾಮ್ ಸ್ಟೇಟಸ್ನಲ್ಲಿ ಒಂದು ಪೋಸ್ಟ್ ಅನ್ನು ಶೇರ್ ಮಾಡಿಕೊಳ್ಳುವ ಮೂಲಕ ಎಲ್ಲಾ ಗೊಂದಲಗಳನ್ನು ದೂರ ಮಾಡಿದ್ದಾರೆ. "ಆರ್ಸಿಬಿ ಹೆಸರು ಬದಲಾಗುವುದಿಲ್ಲ" ಎಂದು ಸ್ಪಷ್ಟವಾಗಿ ತಿಳಿಸಿ, ಅಭಿಮಾನಿಗಳ ಆತಂಕಕ್ಕೆ ತೆರೆ ಎಳೆದಿದ್ದಾರೆ. ಅಂದ್ರೆ, ಇನ್ಮುಂದೆಯೂ ನಮ್ಮ ತಂಡದ ಹೆಸರು 'ರಾಯಲ್ ಚಾಲೆಂಜರ್ಸ್ ಬೆಂಗಳೂರು' ಆಗಿಯೇ ಮುಂದುವರಿಯಲಿದೆ!
ಐಪಿಎಲ್ ಅಂದಾಕ್ಷಣ ನೆನಪಿಗೆ ಬರೋದು ಸನ್ರೈಸರ್ಸ್ ಹೈದರಾಬಾದ್ ತಂಡದ ಮಾಲೀಕಿ ಕಾವ್ಯ ಮಾರನ್. ತಮ್ಮ ತಂಡದ ಪಂದ್ಯಗಳ ವೇಳೆ ಕಾವ್ಯ ಮಾರನ್ ಸ್ಟೇಡಿಯಂನಲ್ಲಿ ಮಿಂಚುತ್ತಿರುತ್ತಾರೆ. ಇದೀಗ ಆದಿತ್ಯ ಬಿರ್ಲಾ ಗ್ರೂಪ್ನ ಅನನ್ಯಾ ಬಿರ್ಲಾ ಅವರು ಆರ್ಸಿಬಿ ತಂಡದ ಜೊತೆ ಸೇರಿರುವುದರಿಂದ, ಆರ್ಸಿಬಿ ಪಂದ್ಯಗಳಲ್ಲಿ ಅವರು ಕೂಡ ಹೆಚ್ಚು ಹೈಲೈಟ್ ಆಗಬಹುದು ಎಂಬ ಮಾತುಗಳು ಕೇಳಿಬರುತ್ತಿವೆ. ಕಾವ್ಯ ಮಾರನ್ಗೆ ಕಾಂಪಿಟೇಷನ್ ಕೊಡಲು ಅನನ್ಯಾ ಬಂದಿದ್ದಾರೆ ಎನ್ನುವ ಚರ್ಚೆಗಳು ಈಗ ಕ್ರಿಕೆಟ್ ವಲಯದಲ್ಲಿ ಸಖತ್ ಸದ್ದು ಮಾಡುತ್ತಿವೆ.
ಹೆಸರಿನ ಗೊಂದಲ ಇಲ್ಲದಾಗಿದೆ, ಅಭಿಮಾನಿಗಳ ಆತಂಕ ದೂರವಾಗಿದೆ. ಇನ್ಮುಂದೆ ಯಾವುದೇ ಚಿಂತೆಯಿಲ್ಲದೆ, ಅದೇ ಹಳೆಯ ಅಭಿಮಾನದೊಂದಿಗೆ ನಮ್ಮ ತಂಡವನ್ನು ಬೆಂಬಲಿಸಲು ಫ್ಯಾನ್ಸ್ ಸಿದ್ಧರಾಗಿದ್ದಾರೆ.
