ಸಿನಿಮಾ ಸ್ಟೈಲ್ನಲ್ಲಿ ನಡೆಯುವ ಘಟನೆಗಳು ಈಗೀಗ ನಮ್ಮ ಅಕ್ಕಪಕ್ಕದ ಊರುಗಳಲ್ಲೇ ನಡೆಯುತ್ತಿವೆ. ಹಾಸನ ಜಿಲ್ಲೆಯ ಮುಕಂದೂರು ಗ್ರಾಮದಲ್ಲಿ ಅಂತಹದ್ದೇ ಒಂದು ಘಟನೆ ನಡೆದಿದ್ದು, ಈಗ ಇಡೀ ಜಿಲ್ಲೆಯಲ್ಲಿ ಸಖತ್ ಸದ್ದು ಮಾಡುತ್ತಿದೆ. ಆಸ್ಪತ್ರೆಗೆ ಹೋಗಿ ಬರ್ತೀನಿ ಅಂತ ಮನೆಯವ್ರಿಗೆ ಹೇಳಿ ಹೋದ ಮಹಿಳೆ, ಮಗು ಮತ್ತು ಪತಿಯನ್ನು ಮರೆತು ಪ್ರಿಯಕರನ ಜೊತೆ ಕಾರಿನಲ್ಲೇ ಮದುವೆಯಾಗಿದ್ದಾಳೆ ಎಂದು ತಿಳಿದುಬಂದಿದೆ.
ಹಾಸನದ ಮುಕಂದೂರು ಗ್ರಾಮದ ಈ ಮಹಿಳೆಗೆ ಈಗಾಗಲೇ ಮದುವೆಯಾಗಿ ಪುಟ್ಟ ಮಗುವೂ ಇದೆ. "ಸ್ವಲ್ಪ ಹುಷಾರಿಲ್ಲ, ಆಸ್ಪತ್ರೆಗೆ ಹೋಗಿ ಬರ್ತೀನಿ" ಅಂತ ಪತಿ ಮತ್ತು ಮನೆಯವರಿಗೆ ಹೇಳಿ ಆಕೆ ಮನೆಯಿಂದ ಹೊರಟಿದ್ದಾಳೆ. ಪತಿ ಕೂಡ ಮಗಳನ್ನ ನೋಡಿಕೊಳ್ಳುತ್ತಾ ಹೆಂಡತಿ ಬರ್ತಾಳೆ ಅಂತ ಕಾದಿದ್ದಾನೆ. ಆದರೆ ಗಂಟೆಗಳು ಕಳೆದರೂ ಆಕೆ ವಾಪಸ್ ಬರಲಿಲ್ಲ, ಫೋನ್ ಮಾಡಿದರೆ ಸ್ವಿಚ್ ಆಫ್.
ಗಾಬರಿಯಾದ ಪತಿ ಪೊಲೀಸರ ಮೊರೆ ಹೋಗಿದ್ದಾನೆ. ಪೊಲೀಸರು ಕೂಡಲೇ ಫೀಲ್ಡಿಗಿಳಿದು ಆಕೆಯ ಮೊಬೈಲ್ ಲೊಕೇಶನ್ ಟ್ರ್ಯಾಕ್ ಮಾಡಿದಾಗ ಅಸಲಿ ಕಥೆ ಬಯಲಾಗಿದೆ. ಆಕೆ ಆಸ್ಪತ್ರೆಗೆ ಹೋಗುವ ದಾರಿಯಲ್ಲೇ ತನ್ನ ಪ್ರಿಯಕರನನ್ನು ಭೇಟಿಯಾಗಿ, ಕಾರಿನಲ್ಲೇ ತಾಳಿ ಕಟ್ಟಿಸಿಕೊಂಡು ಮದುವೆಯಾಗಿದ್ದಾಳೆ.
ವಿಶೇಷ ಅಂದ್ರೆ, ಈ ಮಹಿಳೆ ಹೀಗೆ ಮಾಡುವುದು ಇದು ಮೊದಲೇನಲ್ಲವಂತೆ. ಈ ಹಿಂದೆಯೂ ಒಮ್ಮೆ ಆಕೆ ಹೀಗೆಯೇ ಮನೆ ಬಿಟ್ಟು ಹೋಗಿದ್ದಳಂತೆ. ಆಗ ಪತಿ ದೊಡ್ಡ ಮನಸ್ಸು ಮಾಡಿ, ಪೊಲೀಸರ ಸಮ್ಮುಖದಲ್ಲಿ ಬುದ್ಧಿ ಹೇಳಿ ಆಕೆಯನ್ನು ಮನೆಗೆ ಕರೆದುಕೊಂಡು ಬಂದಿದ್ದ. "ಮಗು ಇದೆ, ಸಂಸಾರ ಸರಿ ಮಾಡಿಕೊಳ್ಳೋಣ" ಅಂತ ನಂಬಿದ್ದ ಪತಿಗೆ ಈಗ ಹೆಂಡತಿ ಕೊಟ್ಟಿರುವ ಶಾಕ್ ಜೀರ್ಣಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ.
ಪೊಲೀಸರು ಮಹಿಳೆಯನ್ನು ಸ್ಟೇಷನ್ಗೆ ಕರೆಸಿ ವಿಚಾರಣೆ ನಡೆಸಿದ್ದಾರೆ. "ನಿನ್ನ ಪತಿ ಏನಾದರೂ ಕಿರುಕುಳ ನೀಡುತ್ತಿದ್ದನಾ? ಯಾಕೆ ಹೀಗೆ ಮಾಡಿದೆ?" ಅಂತ ಕೇಳಿದರೆ, ಆಕೆ ಮಾತ್ರ ಯಾವುದಕ್ಕೂ ಉತ್ತರಿಸದೆ ಮೌನಕ್ಕೆ ಶರಣಾಗಿದ್ದಾಳೆ.
ಈ ಇಡೀ ಘಟನೆಯಲ್ಲಿ ಅತ್ಯಂತ ನೋವಿನ ಸಂಗತಿ ಎಂದರೆ ಆ ಪುಟ್ಟ ಮಗು. ಹೆತ್ತ ತಾಯಿ ತನ್ನ ಸುಖಕ್ಕಾಗಿ ಪ್ರಿಯಕರನ ಜೊತೆ ಹೋಗಿರುವುದು ಒಂದೆಡೆಯಾದರೆ, ಅತ್ತ ತಾಯಿಯ ಪ್ರೀತಿಯೂ ಇಲ್ಲದೆ, ಅಪ್ಪನ ಕಣ್ಣೀರು ನೋಡಿ ಬೆಚ್ಚಿಬಿದ್ದಿರುವ ಮಗುವಿನ ಸ್ಥಿತಿ ನಿಜಕ್ಕೂ ಕರುಣಾಜನಕವಾಗಿದೆ. ಪತಿ ಈಗ ನ್ಯಾಯಕ್ಕಾಗಿ ಪೊಲೀಸರ ಮೊರೆ ಹೋಗಿದ್ದಾನೆ.
ಇವತ್ತಿನ ಕಾಲದಲ್ಲಿ ಸಂಬಂಧಗಳ ಬೆಲೆ ಕಡಿಮೆಯಾಗುತ್ತಿದೆಯೇ ಎಂಬ ಪ್ರಶ್ನೆ ಮೂಡುತ್ತಿದೆ. ಪ್ರೀತಿ ಅಥವಾ ಮದುವೆ ಎಂಬುದು ವೈಯಕ್ತಿಕ ನಿರ್ಧಾರವಾದರೂ, ಚಿಕ್ಕ ಮಕ್ಕಳ ಭವಿಷ್ಯದ ಜೊತೆ ಆಟವಾಡುವುದು ಎಷ್ಟು ಸರಿ? ಇಂತಹ ಘಟನೆಗಳು ಸಮಾಜದಲ್ಲಿ ಸಂಸಾರ ಎಂಬ ವ್ಯವಸ್ಥೆಯ ಮೇಲಿದ್ದ ನಂಬಿಕೆಯನ್ನೇ ಸಡಿಲಗೊಳಿಸುತ್ತಿವೆ. ಹಾಸನದ ಈ 'ಕಾರು ಮದುವೆ' ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ನಿಮ್ಮ ಪ್ರಕಾರ ಈ ವಿಷಯದಲ್ಲಿ ತಪ್ಪು ಯಾರದ್ದು?
