ಮನೆಯಲ್ಲಿ ಅಜ್ಜ-ಅಜ್ಜಿ ಇದ್ದರೆ ಆ ಕಳೆಯೇ ಬೇರೆ. ಅದರಲ್ಲೂ ಇಂದಿನ ಬಿಡುವಿಲ್ಲದ ಲೈಫ್ನಲ್ಲಿ ಅಪ್ಪ-ಅಮ್ಮ ಇಬ್ಬರೂ ಕೆಲಸಕ್ಕೆ ಹೋಗುವವರಾಗಿದ್ದರೆ, ಮನೆಯಲ್ಲಿರೋ ಪುಟಾಣಿ ಮಕ್ಕಳನ್ನು ನೋಡಿಕೊಳ್ಳುವ ಜವಾಬ್ದಾರಿ ಹೆಚ್ಚಾಗಿ ಅಜ್ಜಿಯ ಹೆಗಲಿಗೆ ಬೀಳುತ್ತದೆ. ಈ ಹಿರಿಜೀವಗಳ ಪ್ರೀತಿ ಮತ್ತು ಕಾಳಜಿಯ ನೆರಳಿನಲ್ಲಿ ಬೆಳೆಯುವ ಮಕ್ಕಳು ಸಖತ್ ಅದೃಷ್ಟವಂತರು. ಅಜ್ಜ ಹಾಗೂ ಅಜ್ಜಿಯ ಜೊತೆ ಪುಟಾಣಿ ಮೊಮ್ಮಕ್ಕಳು ನಡೆಸುವ ಮುದ್ದಾದ ಸಂಭಾಷಣೆಗಳು, ಕೀಟಲೆಗಳು ಯಾವಾಗಲೂ ಮನಸ್ಸಿಗೆ ಹತ್ತಿರವಾಗುತ್ತವೆ.
ಇದೀಗ ಅಡುಗೆ ಮನೆಯಲ್ಲಿ ಮಾವಿನಕಾಯಿ ಉಪ್ಪಿನಕಾಯಿ ತಯಾರಿಸುತ್ತಿರುವ ಅಜ್ಜಿಯೊಬ್ಬರು, ತನ್ನ ಪುಟ್ಟ ಮೊಮ್ಮಗನ ಜೊತೆ ನಡೆಸಿರುವ ಸಖತ್ ಕ್ಯೂಟ್ ಸಂಭಾಷಣೆಯ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದೆ.
ಅಜ್ಜಿ ಉಪ್ಪಿನಕಾಯಿ ಬ್ಯುಸಿ, ಮೊಮ್ಮಗನಿಗೆ ಅಪ್ಪುಗೆಯ ಆಸೆ
ವಂದನಾ ವರ್ಮ (@vandanaverma911) ಎಂಬುವವರ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಈ ಹೃದಯಸ್ಪರ್ಶಿ ವಿಡಿಯೋವನ್ನು ಶೇರ್ ಮಾಡಲಾಗಿದೆ. ವಿಡಿಯೋದಲ್ಲಿ ಏನಿದೆ ಅಂದರೆ, ಅಜ್ಜಿ ಅಡುಗೆ ಮನೆಯಲ್ಲಿ ಸಖತ್ ಬ್ಯುಸಿಯಾಗಿ ಮಾವಿನಕಾಯಿ ಉಪ್ಪಿನಕಾಯಿ ರೆಡಿ ಮಾಡುತ್ತಿದ್ದಾರೆ. ಪಕ್ಕದಲ್ಲೇ ಪುಟ್ಟ ಮೊಮ್ಮಗನನ್ನು ಕೂರಿಸಿಕೊಂಡಿದ್ದಾರೆ. ಅಜ್ಜಿ ಅಲ್ಲಿ ಏನು ಮಾಡ್ತಿದ್ದಾರೆ ಅನ್ನೋದನ್ನು ಆ ಪುಟಾಣಿ ಕಂದಮ್ಮ ತನ್ನ ಪುಟ್ಟ ಕಣ್ಣುಗಳನ್ನು ಬಿಟ್ಟುಕೊಂಡು ಸಖತ್ ಕ್ಯೂರಿಯಾಸಿಟಿಯಿಂದ ನೋಡ್ತಾ ಇರುವುದನ್ನು ವಿಡಿಯೋದಲ್ಲಿ ಕಾಣಬಹುದು.
ಉಪ್ಪಿನಕಾಯಿ ಕಲಸುವ ಮಧ್ಯೆಯೇ ಅಜ್ಜಿ ಮೊಮ್ಮಗನ ಕಡೆ ತಿರುಗಿ, "ಅಜ್ಜಿ ಏನು ಮಾಡ್ತಾ ಇದ್ದಾಳೆ?" ಎಂದು ಮುದ್ದಾಗಿ ಕೇಳುತ್ತಾರೆ. ಆ ಮಗುವಿಗೆ ಇನ್ನೂ ಸರಿಯಾಗಿ ಮಾತನಾಡಲು ಬರದೇ ಇರುವುದರಿಂದ ಅಜ್ಜಿಯೇ ನಸುನಗುತ್ತಾ "ಉಪ್ಪಿನಕಾಯಿ ಮಾಡ್ತಾ ಇದ್ದಾಳೆ" ಎಂದು ತಾವೇ ಉತ್ತರಿಸುತ್ತಾರೆ.
ಮಾವಿನಕಾಯಿ ಬೇಡ, ಅಜ್ಜಿಯ ಅಪ್ಪುಗೆಯೇ ಬೇಕು
ಅಷ್ಟಕ್ಕೇ ನಿಲ್ಲದ ಅಜ್ಜಿ, ತಾನು ಕತ್ತರಿಸಿಟ್ಟಿದ್ದ ಮಾವಿನಕಾಯಿ ಹೋಳುಗಳಲ್ಲಿ ಒಂದು ಪುಟ್ಟ ಪೀಸ್ ಅನ್ನು ಮೊಮ್ಮಗನ ಕೈಗೆ ಕೊಟ್ಟು ತಿನ್ನಲು ಹೇಳ್ತಾರೆ. ಜೊತೆಗೆ ಮಗುವನ್ನು ರೇಗಿಸುತ್ತಾ, "ಅಬ್ಬಾ.. ಇದನ್ನ ನೋಡ್ತಿದ್ರೆ ನನ್ನ ಬಾಯಲ್ಲಿ ನೀರೂರುತ್ತಿದೆ" ಎಂದು ಕೀಟಲೆ ಮಾಡುತ್ತಾರೆ. ಅಜ್ಜಿ ಆ ಮಗುವಿಗೆ ಮಾವಿನಕಾಯಿ ತಿನ್ನುವಂತೆ ಪ್ರೀತಿಯಿಂದ ಸನ್ನೆ ಮಾಡುತ್ತಾರೆ.
ಆದರೆ ಆ ಪುಟಾಣಿ ಮಗು ಮಾತ್ರ ತನ್ನ ಕೈಲಿದ್ದ ಮಾವಿನಕಾಯಿ ತುಂಡನ್ನು ತಿನ್ನಲು ಹೋಗುವುದೇ ಇಲ್ಲ! ಬದಲಿಗೆ ಉಪ್ಪಿನಕಾಯಿ ಪಾತ್ರೆಯನ್ನೇ ಮರೆತು, ತನ್ನ ಎರಡೂ ಪುಟ್ಟ ಕೈಗಳನ್ನು ಮುಂದಕ್ಕೆ ಚಾಚಿ, ಅಜ್ಜಿಯ ಹೆಗಲಿಗೆ ವಾಲಿ ತನ್ನನ್ನು ಎತ್ತಿಕೊಳ್ಳುವಂತೆ ಮುದ್ದಾಗಿ ಕೇಳುತ್ತದೆ. ಅಜ್ಜಿಯ ಅಪ್ಪುಗೆಯನ್ನು (Hug) ಬಯಸಿ ಆ ಮಗು ಕೈ ಚಾಚಿದ ಆ ಒಂದು ಕ್ಷಣ ನೆಟ್ಟಿಗರ ಮನಸ್ಸು ಕರಗುವಂತೆ ಮಾಡಿದೆ.
90 ಸಾವಿರಕ್ಕೂ ಹೆಚ್ಚು ವೀವ್ಸ್: ಕಮೆಂಟ್ಸ್ ಮಹಾಪೂರ
ಅಜ್ಜಿ ಮತ್ತು ಮೊಮ್ಮಗನ ನಡುವಿನ ಈ ಅಪರೂಪದ ಹಾಗೂ ಪವಿತ್ರವಾದ ಪ್ರೀತಿಯ ವಿಡಿಯೋ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸೌಂಡ್ ಮಾಡ್ತಿದೆ. ಈಗಾಗಲೇ ಈ ವಿಡಿಯೋ ಬರೋಬ್ಬರಿ 90 ಸಾವಿರಕ್ಕೂ ಹೆಚ್ಚು ವೀಕ್ಷಣೆಗಳನ್ನು (Views) ಪಡೆದುಕೊಂಡು ಮುನ್ನುಗ್ಗುತ್ತಿದೆ. ವಿಡಿಯೋ ನೋಡಿದ ನೆಟ್ಟಿಗರು ಅಜ್ಜಿ-ಮೊಮ್ಮಗನ ಬಾಂಡಿಂಗ್ಗೆ ಫಿದಾ ಆಗಿ ಜಬರ್ದಸ್ತ್ ಆಗಿ ಕಮೆಂಟ್ ಮಾಡ್ತಿದ್ದಾರೆ.
ವಿಡಿಯೋಗೆ ಕಮೆಂಟ್ ಮಾಡಿರುವ ಒಬ್ಬ ಬಳಕೆದಾರ, "ನಾವು ಅಜ್ಜಿಯನ್ನು ಇಷ್ಟೊಂದು ಗಾಢವಾಗಿ ಪ್ರೀತಿಸಲು ಇದೇ ಅಲ್ವಾ ಕಾರಣ" ಎಂದು ಬರೆದುಕೊಂಡಿದ್ದಾರೆ. ಇನ್ನೊಬ್ಬರು, "ಈ ಪುಟಾಣಿ ತುಂಬಾ ಬುದ್ಧಿವಂತ ಮತ್ತು ಒಳ್ಳೆಯವನು. ಸಾಮಾನ್ಯವಾಗಿ ಈ ವಯಸ್ಸಿನ ಮಕ್ಕಳು ಕೈಗೆ ಸಿಕ್ಕಿದ್ದನ್ನೆಲ್ಲಾ ತಕ್ಷಣ ಬಾಯಿಗೆ ಹಾಕಿಕೊಳ್ಳುತ್ತಾರೆ. ಆದರೆ ಈ ಮಗುವಿಗೆ ಮಾವಿನಕಾಯಿಗಿಂತ ಅಜ್ಜಿಯ ಅಪ್ಪುಗೆಯೇ ಮುಖ್ಯವಾಯಿತು" ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಮತ್ತೊಬ್ಬ ಬಳಕೆದಾರರು ಭಾವುಕರಾಗಿ, "ಜೀವನದಲ್ಲಿ ಅಜ್ಜ-ಅಜ್ಜಿಯ ಪ್ರೀತಿ ಮತ್ತು ಆಶೀರ್ವಾದ ಸಿಕ್ಕಿರುವವರೇ ಈ ಜಗತ್ತಿನಲ್ಲಿ ಅತಿ ದೊಡ್ಡ ಪುಣ್ಯವಂತರು" ಎಂದು ಕಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಈ ವಿಡಿಯೋ ಇಂಟರ್ನೆಟ್ನಲ್ಲಿ ಎಲ್ಲರ ಮುಖದಲ್ಲೂ ಒಂದು ಸಣ್ಣ ನಗು ಮೂಡಿಸುವಲ್ಲಿ ಯಶಸ್ವಿಯಾಗಿದೆ.
