ಗದಗ ನದಿಯಲ್ಲಿ ಈಜಿ ದಡ ಸೇರುವ ಭೂಪತಿಗೆ ಅಧಿಕಾರ ಸಿಗಲಿದೆ..." - ಗದಗ ಜಿಲ್ಲೆಯ ರೋಣ ತಾಲೂಕಿನ ಕೌಜಗೇರಿ ಗ್ರಾಮದಲ್ಲಿ ಕಳೆದ ವರ್ಷ ಮೊಹರಂ ಹಬ್ಬದ ಸಂದರ್ಭದಲ್ಲಿ ಕುದರಿಕಾರ ನುಡಿದಿದ್ದ ಕಾರಣಿಕದ ಭವಿಷ್ಯ ಕೊನೆಗೂ ಅಕ್ಷರಶಃ ನಿಜವಾಗಿದೆ! ರಾಜ್ಯ ರಾಜಕೀಯದ ಮಹತ್ವದ ಬೆಳವಣಿಗೆಯಲ್ಲಿ ಸಿದ್ದರಾಮಯ್ಯ ಅವರು ಸ್ವಇಚ್ಛೆಯಿಂದ ಮುಖ್ಯಮಂತ್ರಿ ಸ್ಥಾನವನ್ನು ಬಿಟ್ಟುಕೊಟ್ಟ ಬೆನ್ನಲ್ಲೇ, ಉಪಮುಖ್ಯಮಂತ್ರಿಯಾಗಿದ್ದ ಡಿ.ಕೆ. ಶಿವಕುಮಾರ್ ಅವರು ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಇದರೊಂದಿಗೆ ಕೌಜಗೇರಿ ಗ್ರಾಮದ ಫಕೀರಸಾಬ್ ನದಾಫ್ ಎಂಬ ಕುದರಿಕಾರ ನುಡಿದಿದ್ದ ರಾಜಕೀಯ ಭವಿಷ್ಯ ನಿಜವಾಗಿದ್ದು, ಸದ್ಯ ಗದಗ ಜಿಲ್ಲಾದ್ಯಂತ ಹಾಗೂ ಇಡೀ ರಾಜ್ಯದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ.
ಕಳೆದ ವರ್ಷವೇ ಸ್ಫೋಟಕ ಭವಿಷ್ಯ ನುಡಿದಿದ್ದ ಕುದರಿಕಾರ ಫಕೀರಸಾಬ್!
ಕಳೆದ ವರ್ಷ ಮೊಹರಂ ಹಬ್ಬದ ಸಡಗರದ ವೇಳೆ ಕೌಜಗೇರಿ ಗ್ರಾಮದಲ್ಲಿ ಸಾಂಪ್ರದಾಯಿಕ ಕಾರಣಿಕ ನುಡಿಯುವ ಕಾರ್ಯಕ್ರಮ ನಡೆದಿತ್ತು. ಈ ವೇಳೆ ಗ್ರಾಮದ ಪ್ರಸಿದ್ಧ ಕುದರಿಕಾರರಾದ ಫಕೀರಸಾಬ್ ನದಾಫ್ ಅವರು ರಾಜ್ಯ ರಾಜಕೀಯದ ಮುಂದಿನ ದಿಕ್ಸೂಚಿಯ ಬಗ್ಗೆ ಅತ್ಯಂತ ಮಾರ್ಮಿಕವಾಗಿ ಭವಿಷ್ಯ ವಾಣಿ ನುಡಿದಿದ್ದರು. ಅಂದು ಅವರು ಆಡಿದ್ದ ಮಾತುಗಳು ರಾಜ್ಯದ ಸಿಎಂ ಕುರ್ಚಿಯ ಬದಲಾವಣೆಯ ಸುಳಿವನ್ನು ನಿಖರವಾಗಿ ನೀಡಿದ್ದವು.
ಕುದರಿಕಾರ ನುಡಿದಿದ್ದ ಆ ಕಾರಣಿಕ ವಾಣಿ ಹೀಗಿತ್ತು:
"ಹಾಲು ಕೆಟ್ಟರೂ ಹಾಲುಮತ ಕೆಡುವುದಿಲ್ಲ. ಅಂತವರ ಕೈಯಲ್ಲಿ ಸದ್ಯ ಅಧಿಕಾರ ಕೊಟ್ಟಿದ್ದೀರಿ. ಅದನ್ನ ಮಧ್ಯದಲ್ಲಿ ಬದಲಿ ಮಾಡುವುದು ಅಷ್ಟು ಸುಲಭವಲ್ಲ. ಅವರಾಗಿಯೇ ಬೇಡ ಅಂತ ಅಧಿಕಾರ ಬಿಟ್ಟರೆ ಮಾತ್ರ ಅದು ಇನ್ನೊಬ್ಬರಿಗೆ ಹೋಗುತ್ತದೆ. ಕೊನೆಗೆ ನದಿಯಲ್ಲಿ ಈಜಿ ದಡ ಸೇರುವ ಕಲೆ ಗೊತ್ತಿರುವ ಆ ಭೂಪತಿಗೆ (ಡಿಕೆಶಿಗೆ) ಅಧಿಕಾರ ಸಿಗುತ್ತದೆ..."
ಭವಿಷ್ಯದ ಒಳಾರ್ಥ ಬಿಚ್ಚಿಟ್ಟ ರಾಜಕೀಯ ಬೆಳವಣಿಗೆಗಳು
ಕುದರಿಕಾರ ಫಕೀರಸಾಬ್ ನುಡಿದಿದ್ದ ಪ್ರತಿಯೊಂದು ಸಾಲುಗಳು ಇಂದಿನ ರಾಜಕೀಯ ಪರಿಸ್ಥಿತಿಗೆ ತಕ್ಕಂತೆ ಸಾಬೀತಾಗಿವೆ ಎಂದು ಸಾರ್ವಜನಿಕರು ವಿಶ್ಲೇಷಿಸುತ್ತಿದ್ದಾರೆ.
ಹಾಲುಮತದ ನಾಯಕನ ಅಧಿಕಾರ: 'ಹಾಲುಮತ ಕೆಡುವುದಿಲ್ಲ' ಎಂಬ ಮಾತು ಕುರುಬ ಸಮಾಜದ ಹಿರಿಯ ನಾಯಕ ಸಿದ್ದರಾಮಯ್ಯ ಅವರ ಅಧಿಕಾರದ ಬಲವನ್ನು ಸೂಚಿಸಿತ್ತು. ಹೈಕಮಾಂಡ್ ಅಥವಾ ವಿರೋಧಿಗಳು ಒತ್ತಡ ಹೇರಿದರೂ ಅವರನ್ನು ಸಿಎಂ ಕುರ್ಚಿಯಿಂದ ಇಳಿಸುವುದು ಅಷ್ಟು ಸುಲಭವಲ್ಲ ಎಂಬುದು ಸಾಬೀತಾಗಿತ್ತು.
ಸ್ವಇಚ್ಛೆಯಿಂದ ಬಿಟ್ಟ ಸಿದ್ದರಾಮಯ್ಯ: ಭವಿಷ್ಯದಲ್ಲಿ ಹೇಳಿದಂತೆ, ಸಿದ್ದರಾಮಯ್ಯ ಅವರು ಯಾರ ಒತ್ತಡಕ್ಕೂ ಮಣಿಯದೆ, ತಾವಾಗಿಯೇ ಸ್ವಇಚ್ಛೆಯಿಂದ ಮುಖ್ಯಮಂತ್ರಿ ಸ್ಥಾನವನ್ನು ತ್ಯಜಿಸಿ ಡಿಕೆಶಿಗೆ ದಾರಿ ಮಾಡಿಕೊಟ್ಟಿದ್ದಾರೆ.
ಈಜಿ ದಡ ಸೇರಿದ 'ಭೂಪತಿ' ಡಿಕೆಶಿ: ರಾಜಕೀಯದ ಹತ್ತಾರು ಏರುಪೇರುಗಳು, ಕೇಸ್-ಕಂಟಕಗಳು ಹಾಗೂ ಸಂಕಷ್ಟಗಳೆಂಬ ಮಹಾಸಮುದ್ರದಲ್ಲಿ ಯಶಸ್ವಿಯಾಗಿ 'ಈಜಿ ದಡ ಸೇರಿದ' ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಅವರಿಗೆ ಕೊನೆಗೂ ಮುಖ್ಯಮಂತ್ರಿ ಪಟ್ಟ ಒಲಿದುಬಂದಿದೆ.
ಗದಗ ಮತ್ತು ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ಭಾರಿ ವೈರಲ್!
ಡಿ.ಕೆ. ಶಿವಕುಮಾರ್ ಅವರು ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸುತ್ತಿದ್ದಂತೆ, ಕೌಜಗೇರಿ ಗ್ರಾಮದಲ್ಲಿ ಫಕೀರಸಾಬ್ ನದಾಫ್ ಭವಿಷ್ಯ ನುಡಿಯುತ್ತಿದ್ದ ಹಳೆಯ ವಿಡಿಯೋವನ್ನು ನೆಟ್ಟಿಗರು ಹುಡುಕಿ ತೆಗೆದಿದ್ದಾರೆ. ಸದ್ಯ ವಾಟ್ಸಾಪ್, ಫೇಸ್ಬುಕ್ ಹಾಗೂ ಇನ್ಸ್ಟಾಗ್ರಾಮ್ಗಳಲ್ಲಿ ಈ ವಿಡಿಯೋ ಭಾರಿ ವೈರಲ್ ಆಗುತ್ತಿದ್ದು, "ಕಾರಣಿಕದ ಭವಿಷ್ಯ ಸುಳ್ಳಾಗುವುದಿಲ್ಲ, ಕುದರಿಕಾರ ನುಡಿದ ಮಾತು ನೂರಕ್ಕೆ ನೂರರಷ್ಟು ಸತ್ಯವಾಗಿದೆ" ಎಂದು ಗದಗ ಜಿಲ್ಲೆಯ ಜನರು ಹಾಗೂ ಡಿಕೆಶಿ ಅಭಿಮಾನಿಗಳು ಹುಬ್ಬೇರಿಸುತ್ತಿದ್ದಾರೆ. ಗ್ರಾಮೀಣ ಭಾಗದ ದೈವಿಕ ನಂಬಿಕೆ ಮತ್ತು ಕಾರಣಿಕದ ಶಕ್ತಿ ಮತ್ತೊಮ್ಮೆ ಸಾಬೀತಾಗಿದೆ ಎಂಬ ಚರ್ಚೆಗಳು ನಾಡಿನಾದ್ಯಂತ ಜೋರಾಗಿ ನಡೆದಿವೆ.
