ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣ - ನಿಮ್ಮ ವಾಹನದ ಇಂಜಿನ್ ಸುರಕ್ಷಿತವಾಗಿದೆಯೇ?!!

ಒಂದು ಕಾಲದಲ್ಲಿ ಪೆಟ್ರೋಲ್‌ ಎಂದರೆ ಸಂಪೂರ್ಣ ಪಳೆಯುಳಿಕೆ ಇಂಧನ (Fossil Fuel) ಮಾತ್ರ ಆಗಿತ್ತು. ಆದರೆ ಇಂದು ಅದರೊಳಗೆ ಕೃಷಿಯ ಸುವಾಸನೆಯೂ ಬೆರೆತಿದೆ. ಕಬ್ಬು, ಜೋಳ, ಧಾನ್ಯಗಳ ತ್ಯಾಜ್ಯ, ಕಚ್ಚಾ ವಸ್ತುಗಳಿಂದ ಉತ್ಪಾದನೆಯಾಗುವ ಎಥೆನಾಲ್‌ ಈಗ ಭಾರತದ ಇಂಧನ ನೀತಿಯ ಪ್ರಮುಖ ಭಾಗವಾಗಿದೆ. ಸಸ್ಯತ್ಯಾಜ್ಯಗಳು ಮತ್ತು ಇತರೆ ಜೈವಿಕ ಮೂಲಗಳಿಂದ ತಯಾರಾಗುವ ಎಥೆನಾಲ್ ಈಗ ದೇಶದ ಇಂಧನ ಸುರಕ್ಷತೆಯ ಪ್ರಮುಖ ದಾರಿಯಾಗಿದೆ.

ಆದರೆ, ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣ ಹೆಚ್ಚುತ್ತಿರುವಂತೆ ವಾಹನ ಬಳಕೆದಾರರಲ್ಲಿ ಕುತೂಹಲ ಮತ್ತು ಆತಂಕ ಎರಡೂ ಹೆಚ್ಚುತ್ತಿವೆ. ಒಂದು ಕಡೆ ಇದು ದೇಶದ ಇಂಧನ ಸ್ವಾವಲಂಬನೆ, ರೈತರ ಆದಾಯ ಮತ್ತು ಪರಿಸರ ಸಂರಕ್ಷಣೆಗೆ ಮಹತ್ವದ ಹೆಜ್ಜೆಯಾದರೆ, ಮತ್ತೊಂದೆಡೆ ಹಳೆಯ ವಾಹನಗಳ ಕಾರ್ಯಕ್ಷಮತೆ, ಮೈಲೇಜ್ ಹಾಗೂ ನಿರ್ವಹಣೆ ಕುರಿತು ಗಂಭೀರ ಪ್ರಶ್ನೆಗಳು ಕೇಳಿಬರುತ್ತಿವೆ. ಅದರಲ್ಲೂ ಮುಖ್ಯವಾಗಿ ಎಥನಾಲ್ ಮಿಶ್ರಣ ಹೆಚ್ಚಾಗುತ್ತಿದ್ದಂತೆ ವಾಹನಗಳ ಎಂಜಿನ್ ಸಾಮರ್ಥ್ಯ ಕುಂಠಿತಗೊಳ್ಳುತ್ತದೆ ಮತ್ತು ಭಾಗಗಳು ಬೇಗನೆ ಹಾಳಾಗುತ್ತವೆ ಎಂಬ ವದಂತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಹಾಗಾದರೆ ನಿಜಕ್ಕೂ ಎಥನಾಲ್ ಮಿಶ್ರಣದಿಂದ ವಾಹನಗಳು ಕೆಡುತ್ತವೆಯೇ? ಅದಕ್ಕೆ ಪರ್ಯಾಯ ತಂತ್ರಜ್ಞಾನ ಅಥವಾ ಮುನ್ನೆಚ್ಚರಿಕೆ ಕ್ರಮಗಳು ಬೇಕೇ? ಈ ಪ್ರಶ್ನೆಗಳಿಗೆ ವಿಜ್ಞಾನ ಮತ್ತು ತಂತ್ರಜ್ಞಾನ ಏನು ಹೇಳುತ್ತದೆ ಎಂಬುದರ ವಿಸ್ತೃತ ವಿಶ್ಲೇಷಣೆ ಇಲ್ಲಿದೆ.

ಎಥೆನಾಲ್ ಮಿಶ್ರಣದ ಇತಿಹಾಸ ಮತ್ತು ಇಂದಿನ ಸ್ಥಿತಿ

ಕೆಲ ವರ್ಷಗಳ ಹಿಂದಷ್ಟೇ ಭಾರತದಲ್ಲಿ E10 (10% ಎಥೆನಾಲ್ ಮತ್ತು 90% ಪೆಟ್ರೋಲ್) ಇಂಧನ ಬಳಕೆಯಲ್ಲಿತ್ತು. ಆದರೆ ಈಗ ದೇಶದಾದ್ಯಂತ E20 (20% ಎಥೆನಾಲ್) ಜಾರಿಗೆ ಬಂದಿದೆ. ಜಾಗತಿಕ ಮಟ್ಟದಲ್ಲಿ ನೋಡುವುದಾದರೆ, ಇತ್ತೀಚೆಗೆ ಅಮೆರಿಕಾದಲ್ಲಿ E85 ಇಂಧನವೂ ಬಿಡುಗಡೆಯಾಗಿದೆ. ಭವಿಷ್ಯದಲ್ಲಿ ಸಂಪೂರ್ಣ ಎಥೆನಾಲ್ ಆಧಾರಿತ E100 ಇಂಧನ ಬಳಕೆಯ ಕುರಿತೂ ದೊಡ್ಡ ಮಟ್ಟದ ಚರ್ಚೆಗಳು ಮತ್ತು ಸಂಶೋಧನೆಗಳು ನಡೆಯುತ್ತಿವೆ.

ಭಾರತವು ತನ್ನ ಪೆಟ್ರೋಲ್ ಅಗತ್ಯದ ಬಹುಭಾಗವನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತದೆ. ಇದಕ್ಕಾಗಿ ಪ್ರತಿವರ್ಷ ಕೋಟ್ಯಂತರ ರೂಪಾಯಿ ವಿದೇಶಿ ವಿನಿಮಯ ವೆಚ್ಚವಾಗುತ್ತದೆ. ಆದರೆ, ಸ್ಥಳೀಯವಾಗಿ ಎಥೆನಾಲ್‌ ತಯಾರಿಕೆಯಿಂದ ದೇಶದ ಆರ್ಥಿಕತೆಯ ಮೇಲಿನ ಈ ಹೊರೆ ತಗ್ಗಲಿದೆ.

ಎಥೆನಾಲ್ ಮಿಶ್ರಣದ ಪ್ರಮುಖ ಮೂರು ಪ್ರಯೋಜನಗಳು

ಇದು ಕೇವಲ ಇಂಧನ ಬದಲಾವಣೆ ಅಲ್ಲ. ಕೃಷಿ, ಪರಿಸರ ಮತ್ತು ದೇಶದ ಆರ್ಥಿಕತೆಯನ್ನು ಒಟ್ಟಾಗಿ ಬೆಸೆಯುವ ಮಹತ್ವದ ಹೆಜ್ಜೆಯಾಗಿದೆ:

ಆರ್ಥಿಕ ಸ್ವಾವಲಂಬನೆ: ಕಚ್ಚಾ ತೈಲದ ಆಮದು ವೆಚ್ಚವನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು. ಇದರಿಂದ ಉಳಿಯುವ ಹಣವನ್ನು ದೇಶದ ಅಭಿವೃದ್ಧಿಗೆ ಬಳಸಬಹುದು ಮತ್ತು ರೈತರಿಗೆ ಹೆಚ್ಚುವರಿ ಆದಾಯದ ಮೂಲ ಸಿಗುತ್ತದೆ.

ಪರಿಸರ ಸಂರಕ್ಷಣೆ: ಎಥೆನಾಲ್‌ ಪರಿಸರ ಸ್ನೇಹಿ ಇಂಧನವಾಗಿದ್ದು, ಹಾನಿಕಾರಕ ಇಂಗಾಲದ ಡೈಆಕ್ಸೈಡ್ (CO2) ಮತ್ತು ಕಾರ್ಬನ್ ಮೊನಾಕ್ಸೈಡ್ ಹೊರಸೂಸುವಿಕೆಯನ್ನು ಕಡಿಮೆ ಮಾಡುತ್ತದೆ. ಮಾಲಿನ್ಯವನ್ನು ತಗ್ಗಿಸುವಲ್ಲಿ ಇದು ಅತ್ಯಂತ ಸಹಕಾರಿಯಾಗಿದೆ.

ಇಂಧನ ದಕ್ಷತೆ: ಎಥೆನಾಲ್ ಹೆಚ್ಚಿನ ಆಕ್ಟೇನ್ ರೇಟಿಂಗ್ ಹೊಂದಿದ್ದು, ಇದು ಇಂಜಿನ್‌ನಲ್ಲಿ ಇಂಧನವು ಸಂಪೂರ್ಣವಾಗಿ ದಹಿಸಲು (Complete Combustion) ನೆರವಾಗುತ್ತದೆ.

ಸಾಮಾಜಿಕ ಜಾಲತಾಣಗಳ ವದಂತಿ ಮತ್ತು ವಾಸ್ತವ: ಇಂಜಿನ್ ಕೆಡುತ್ತದೆಯೇ?
ಸಾಮಾಜಿಕ ಜಾಲತಾಣಗಳಲ್ಲಿ ಎಥೆನಾಲ್ ಮಿಶ್ರಿತ ಪೆಟ್ರೋಲ್‌ನಿಂದ ವಾಹನಗಳ ಎಂಜಿನ್ ಹಾಳಾಗುತ್ತದೆ ಎಂಬ ವದಂತಿಗಳು ಹರಡುತ್ತಿರುವ ಬೆನ್ನಲ್ಲೇ, ಈ ಕುರಿತಾದ ಸತ್ಯಾಸತ್ಯತೆಗಳು ಮತ್ತು ತಾಂತ್ರಿಕ ವಿವರಗಳು ಮುನ್ನೆಲೆಗೆ ಬಂದಿವೆ. 

ವಿಜ್ಞಾನ ಮತ್ತು ಆಟೋಮೊಬೈಲ್ ತಂತ್ರಜ್ಞಾನದ ಪ್ರಕಾರ ಇದರ ವಾಸ್ತವ ಹೀಗಿದೆ:

ತೇವಾಂಶ ಹೀರಕ ಗುಣ (Hygroscopic Nature)

ಎಥೆನಾಲ್‌ಗೆ ಗಾಳಿಯಲ್ಲಿರುವ ತೇವಾಂಶ ಅಥವಾ ನೀರನ್ನು ಹೀರಿಕೊಳ್ಳುವ ಗುಣವಿದೆ. ವಾಹನವನ್ನು ದೀರ್ಘಕಾಲದವರೆಗೆ ಬಳಸದೆ ನಿಲ್ಲಿಸಿದಾಗ, ಟ್ಯಾಂಕ್‌ನಲ್ಲಿರುವ ಇಂಧನವು ನೀರನ್ನು ಹೀರಿಕೊಂಡು ಕೆಳಭಾಗದಲ್ಲಿ ಶೇಖರವಾಗಬಹುದು (Phase Separation). ಇದು ಇಂಜಿನ್ ಸ್ಟಾರ್ಟ್ ಆಗಲು ತೊಂದರೆ ಉಂಟುಮಾಡಬಹುದು.

ಭಾಗಗಳ ಸವೆತ (Corrosion)

ಹಳೆಯ ವಾಹನಗಳಲ್ಲಿ ಬಳಸಿರುವ ರಬ್ಬರ್ ಟ್ಯೂಬ್‌ಗಳು, ಗ್ಯಾಸ್ಕೆಟ್‌ಗಳು ಮತ್ತು ಕೆಲವು ಲೋಹದ ಭಾಗಗಳು ಎಥೆನಾಲ್‌ನ ತೀವ್ರತೆಗೆ ಬೇಗನೆ ಸವೆಯುವ ಸಾಧ್ಯತೆ ಇರುತ್ತದೆ. ಎಥೆನಾಲ್ ಒಂದು ದ್ರಾವಕದಂತೆ (Solvent) ವರ್ತಿಸುವುದರಿಂದ ಹಳೆಯ ಪೈಪ್‌ಗಳನ್ನು ಹಾನಿಗೊಳಿಸಬಹುದು.

ಮೈಲೇಜ್ ಮೇಲೆ ಪರಿಣಾಮ

ಶುದ್ಧ ಪೆಟ್ರೋಲ್‌ಗೆ ಹೋಲಿಸಿದರೆ ಎಥೆನಾಲ್‌ನ ಶಕ್ತಿ ಸಾಂದ್ರತೆ (Energy Density) ಕೊಂಚ ಕಡಿಮೆ. ಆದ್ದರಿಂದ E20 ಇಂಧನ ಬಳಸಿದಾಗ ವಾಹನಗಳ ಮೈಲೇಜ್‌ನಲ್ಲಿ ಶೇಕಡಾ 3 ರಿಂದ 5 ರಷ್ಟು ಸಣ್ಣ ಪ್ರಮಾಣದ ಇಳಿಕೆ ಕಂಡುಬರಬಹುದು.

ಹೊಸ ವಾಹನಗಳಿಗೆ ಯಾವುದೇ ಆತಂಕವಿಲ್ಲ ಏಕೆ

ನೀವು ಇತ್ತೀಚಿನ ವರ್ಷಗಳಲ್ಲಿ (ವಿಶೇಷವಾಗಿ 2023ರ ನಂತರ) ಹೊಸ ವಾಹನವನ್ನು ಖರೀದಿಸಿದ್ದರೆ, ನೀವು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ. ಪ್ರಸ್ತುತ ಮಾರುಕಟ್ಟೆಗೆ ಬರುತ್ತಿರುವ ಎಲ್ಲಾ ಕಾರು ಮತ್ತು ಬೈಕ್‌ಗಳನ್ನು "E20 ತಡೆದುಕೊಳ್ಳುವ (E20 Compliant)" ತಂತ್ರಜ್ಞಾನದೊಂದಿಗೆ ತಯಾರಿಸಲಾಗುತ್ತಿದೆ.

ಆಟೋಮೊಬೈಲ್ ಕಂಪನಿಗಳು ಇಂಜಿನ್‌ನ ಒಳಗಿನ ಭಾಗಗಳನ್ನು, ಇಂಧನ ಪೈಪ್‌ಗಳನ್ನು ಮತ್ತು ಇಂಜೆಕ್ಟರ್‌ಗಳನ್ನು ಎಥೆನಾಲ್‌ನಿಂದ ಯಾವುದೇ ಹಾನಿಯಾಗದಂತಹ ವಿಶೇಷ ದರ್ಜೆಯ ಸ್ಟೀಲ್ ಮತ್ತು ರಬ್ಬರ್ ಮೆಟೀರಿಯಲ್‌ಗಳಿಂದ ರೂಪಿಸುತ್ತಿವೆ. ಹೀಗಾಗಿ ಹೊಸ ವಾಹನಗಳ ಕಾರ್ಯಕ್ಷಮತೆ ಮತ್ತು ಇಂಜಿನ್ ಸಾಮರ್ಥ್ಯ ಕುಂಠಿತಗೊಳ್ಳುವುದಿಲ್ಲ.