ಬೆಂಗಳೂರಿನಲ್ಲಿ ಸೆಂಟ್ರಲ್ ಗೌರ್ಮೆಂಟ್ ಕೆಲಸ ಹುಡುಕುತ್ತಿರುವ ಯುವಕ-ಯುವತಿಯರಿಗೆ ಒಂದು ಸೂಪರ್ ಸುದ್ದಿ. ಭಾರತ ಸರ್ಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯದ ಅಧೀನದಲ್ಲಿರುವ ಪ್ರಸಿದ್ಧ ಸಂಸ್ಥೆ CSIR - ನ್ಯಾಷನಲ್ ಏರೋಸ್ಪೇಸ್ ಲ್ಯಾಬೊರೇಟರಿಸ್ (NAL) ಖಾಲಿ ಇರುವ 21 ಪ್ರಾಜೆಕ್ಟ್ ಸ್ಟಾಫ್ ಹುದ್ದೆಗಳ ಭರ್ತಿಗೆ ಭರ್ಜರಿ ಅವಕಾಶ ನೀಡಿದೆ.
ಇಲ್ಲಿರುವ ಸುವರ್ಣಾವಕಾಶ ಏನೆಂದರೆ, ಈ ಕೆಲಸಗಳಿಗೆ ಯಾವುದೇ ರೀತಿಯ ಲಿಖಿತ ಪರೀಕ್ಷೆ ಇರುವುದಿಲ್ಲ. ಕೇವಲ ನೇರ ಸಂದರ್ಶನದ (Walk-in-Interview) ಮೂಲಕವೇ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿಕೊಳ್ಳಲಾಗುತ್ತದೆ. ಈ ಹುದ್ದೆಗಳು ಸಂಪೂರ್ಣವಾಗಿ ತಾತ್ಕಾಲಿಕ ಮತ್ತು ಒಪ್ಪಂದದ ಆಧಾರದ ಮೇಲಿರುತ್ತವೆ.
ಹುದ್ದೆಗಳ ಹೈಲೈಟ್ಸ್
ಒಟ್ಟು ಹುದ್ದೆಗಳು: 21 (ಪ್ರಾಜೆಕ್ಟ್ ಅಸಿಸ್ಟೆಂಟ್ ಮತ್ತು ಪ್ರಾಜೆಕ್ಟ್ ಅಸೋಸಿಯೇಟ್)
ವಿದ್ಯಾರ್ಹತೆ: SSLC, ITI, ಡಿಪ್ಲೊಮಾ, B.Sc, B.E/B.Tech ಅಥವಾ ಪಿಜಿ ಮುಗಿಸಿದವರು ಅಪ್ಲೈ ಮಾಡಬಹುದು.
ಸಂದರ್ಶನ ನಡೆಯುವ ದಿನಾಂಕ: ಮೇ 26 ಮತ್ತು ಮೇ 29, 2026.
ಯಾವೆಲ್ಲಾ ಹುದ್ದೆಗಳಿವೆ?
ಒಟ್ಟು 21 ಹುದ್ದೆಗಳನ್ನು ಬೇರೆ ಬೇರೆ ವಿಭಾಗಗಳಲ್ಲಿ ಹಂಚಿಕೆ ಮಾಡಲಾಗಿದೆ. ಐಟಿಐ ಫಿಟ್ಟರ್/ಟರ್ನರ್ನಿಂದ ಹಿಡಿದು ಬಿ.ಇ, ಬಿ.ಟೆಕ್ ಹಾಗೂ ಸೈನ್ಸ್ ಪದವೀಧರರವರೆಗೆ ಎಲ್ಲರಿಗೂ ಇಲ್ಲಿ ಅವಕಾಶವಿದೆ. ಆಯಾ ಹುದ್ದೆಗಳಿಗೆ ತಕ್ಕಂತೆ ಆಕರ್ಷಕ ಮಾಸಿಕ ವೇತನ ಕೂಡ ಸಿಗಲಿದೆ.
ವಯೋಮಿತಿ ಎಷ್ಟು ಇರಬೇಕು?
ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳಿಗೆ ಗರಿಷ್ಠ 35 ವರ್ಷ ವಯಸ್ಸಿನ ಒಳಗಿರಬೇಕು. ಸರ್ಕಾರದ ನಿಯಮಗಳ ಪ್ರಕಾರ SC/ST/ಅಂಗವಿಕಲ ಹಾಗೂ ಮಹಿಳಾ ಅಭ್ಯರ್ಥಿಗಳಿಗೆ 5 ವರ್ಷ ಮತ್ತು OBC ಅಭ್ಯರ್ಥಿಗಳಿಗೆ 3 ವರ್ಷಗಳ ವಯೋಸಡಿಲಿಕೆ ಇರುತ್ತದೆ.
ಸಂದರ್ಶನದ ದಿನಾಂಕಗಳು ಮತ್ತು ವಿಭಾಗಗಳು
ನಿಮ್ಮ ವಿದ್ಯಾರ್ಹತೆಗೆ ತಕ್ಕಂತೆ ಬೇರೆ ಬೇರೆ ದಿನಾಂಕಗಳಂದು ಇಂಟರ್ವ್ಯೂ ಇರುತ್ತದೆ:
26 ಮೇ 2026: ಎಲೆಕ್ಟ್ರಾನಿಕ್ಸ್ (ECE/EEE), ಫಿಸಿಕ್ಸ್ ಮತ್ತು ಕೆಮಿಸ್ಟ್ರಿ ವಿಭಾಗದ ಹುದ್ದೆಗಳಿಗೆ.
29 ಮೇ 2026: ಐಟಿಐ (Fitter/Turner), ಮೆಕ್ಯಾನಿಕಲ್, ಏರೋಸ್ಪೇಸ್ ಮತ್ತು ಏರೋನಾಟಿಕಲ್ ವಿಭಾಗದ ಹುದ್ದೆಗಳಿಗೆ.
ಗಮನಿಸಿ: ಸಂದರ್ಶನ ನಡೆಯುವ ದಿನದಂದು ಬೆಳಿಗ್ಗೆ 9:00 ರಿಂದ 9:45 ರ ಒಳಗಾಗಿ ಸ್ಥಳದಲ್ಲೇ ರಿಜಿಸ್ಟ್ರೇಷನ್ ಮಾಡಿಕೊಳ್ಳುವುದು ಕಡ್ಡಾಯವಾಗಿದೆ. ಲೇಟ್ ಆಗಿ ಹೋದರೆ ಅವಕಾಶ ಸಿಗುವುದಿಲ್ಲ.
ಸಂದರ್ಶನ ನಡೆಯುವ ವಿಳಾಸ:
CSIR-NAL (RAB ಮೀಟಿಂಗ್ ಕಾಂಪ್ಲೆಕ್ಸ್), ನ್ಯಾಷನಲ್ ಏರೋಸ್ಪೇಸ್ ಲ್ಯಾಬೊರೇಟರಿಸ್, ಎಸ್ಬಿಐ (SBI) ಬ್ಯಾಂಕ್ ಎನ್ಎಎಲ್ ಶಾಖೆಯ ಪಕ್ಕದಲ್ಲಿ, ಕೋಡಿಹಳ್ಳಿ, ಬೆಂಗಳೂರು – 560017.
ಅಪ್ಲೈ ಮಾಡುವುದು ಹೇಗೆ? ಸರಳ ಹಂತಗಳು
ಈ ಹುದ್ದೆಗಳಿಗೆ ನೀವು ಪೋಸ್ಟ್ ಮೂಲಕ ಅಥವಾ ಇಮೇಲ್ ಮೂಲಕ ಮುಂಚಿತವಾಗಿ ಅರ್ಜಿ ಹಾಕುವ ಅಗತ್ಯವಿಲ್ಲ. ನೇರವಾಗಿ ಇಂಟರ್ವ್ಯೂಗೆ ಹೋಗಬೇಕಾಗುತ್ತದೆ. ಅದಕ್ಕೂ ಮುನ್ನ ಈ ಕೆಲಸ ಮಾಡಿ:
ಅರ್ಜಿ ಡೌನ್ಲೋಡ್ ಮಾಡಿ - ಮೊದಲು NAL ನ ಅಧಿಕೃತ ವೆಬ್ಸೈಟ್ (www.nal.res.in) ಗೆ ಭೇಟಿ ನೀಡಿ, ಅಲ್ಲಿ ನೀಡಿರುವ ನಿಗದಿತ ಅಪ್ಲಿಕೇಶನ್ ಫಾರ್ಮ್ ಅನ್ನು ಡೌನ್ಲೋಡ್ ಮಾಡಿಕೊಳ್ಳಿ.
ಫಾರ್ಮ್ ಭರ್ತಿ ಮಾಡಿ - ಡೌನ್ಲೋಡ್ ಮಾಡಿದ ಫಾರ್ಮ್ ಅನ್ನು ಪ್ರಿಂಟ್ ತಗೆದು, ನಿಮ್ಮ ಹೆಸರು, ವಿದ್ಯಾಭ್ಯಾಸದ ವಿವರಗಳನ್ನು ಸರಿಯಾಗಿ ಬರೆಯಿರಿ. ನಿಗದಿತ ಜಾಗದಲ್ಲಿ ನಿಮ್ಮ ಇತ್ತೀಚಿನ ಪಾಸ್ಪೋರ್ಟ್ ಅಳತೆಯ ಫೋಟೋ ಅಂಟಿಸಿ, ಕೊನೆಯಲ್ಲಿ ಸಹಿ ಮಾಡಿ.
ನೇರ ಹಾಜರಾತಿ - ಭರ್ತಿ ಮಾಡಿದ ಅಪ್ಲಿಕೇಶನ್ ಫಾರ್ಮ್ ಜೊತೆಗೆ ನಿಮ್ಮ ಎಲ್ಲಾ ಅಸಲಿ ದಾಖಲೆಗಳು ಮತ್ತು ಅವುಗಳ ಒಂದು ಸೆಟ್ ಜೆರಾಕ್ಸ್ ಪ್ರತಿಯನ್ನು ತಗೆದುಕೊಂಡು ಇಂಟರ್ವ್ಯೂ ದಿನದಂದು ನೇರವಾಗಿ ಕಚೇರಿಗೆ ಹೋಗಿ.
ಇಂಟರ್ವ್ಯೂಗೆ ತರಬೇಕಾದ ಕಡ್ಡಾಯ ದಾಖಲೆಗಳು
ಸಂದರ್ಶನಕ್ಕೆ ಹೋಗುವಾಗ ಈ ಕೆಳಗಿನ ದಾಖಲೆಗಳನ್ನು ಮರೆಯದೇ ನಿಮ್ಮ ಜೊತೆ ಕೊಂಡೊಯ್ಯಿರಿ:
ಗುರುತಿನ ಚೀಟಿ: ಆಧಾರ್ ಕಾರ್ಡ್ ಅಥವಾ ಸರ್ಕಾರದಿಂದ ಮಾನ್ಯತೆ ಪಡೆದ ಯಾವುದೇ ಐಡಿ ಪ್ರೂಫ್.
ಅಂಕಪಟ್ಟಿಗಳು: ಎಸ್ಎಸ್ಎಲ್ಸಿ, ಪಿಯುಸಿ, ಐಟಿಐ, ಡಿಪ್ಲೊಮಾ ಅಥವಾ ಪದವಿಯ ಎಲ್ಲಾ ಸೆಮಿಸ್ಟರ್ಗಳ ಮಾರ್ಕ್ಸ್ ಕಾರ್ಡ್ ಮತ್ತು ಸರ್ಟಿಫಿಕೇಟ್ಗಳು.
ಅನುಭವದ ಪತ್ರ: ಒಂದು ವೇಳೆ ನೀವು ಮೊದಲೇ ಎಲ್ಲಾದರೂ ಕೆಲಸ ಮಾಡಿದ್ದರೆ, ಆ ಅನುಭವದ ಪ್ರಮಾಣಪತ್ರ (ಅನ್ವಯಿಸುವವರಿಗೆ ಮಾತ್ರ).
ಜಾತಿ ಪ್ರಮಾಣಪತ್ರ: ವಯೋಸಡಿಲಿಕೆ ಮತ್ತು ರಿಸರ್ವೇಶನ್ ಬೇಕಾದವರು ಕಡ್ಡಾಯವಾಗಿ ಕ್ಯಾಸ್ಟ್ ಸರ್ಟಿಫಿಕೇಟ್ ತರಬೇಕು.
NOC (ನಿರಾಕ್ಷೇಪಣಾ ಪತ್ರ): ಒಂದು ವೇಳೆ ನೀವು ಈಗಾಗಲೇ ಬೇರೆ ಯಾವುದಾದರೂ CSIR ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದರೆ, ಅಲ್ಲಿಂದ ತಂದ NOC ಪತ್ರ ಕಡ್ಡಾಯ.
ಕೇಂದ್ರ ಸರ್ಕಾರದ ಸಂಸ್ಥೆಯಲ್ಲಿ ಕೆಲಸ ಮಾಡಬೇಕು ಎನ್ನುವ ಆಸೆ ನಿಮಗಿದ್ದರೆ, ಈ ಉತ್ತಮ ಅವಕಾಶವನ್ನು ಮಿಸ್ ಮಾಡಿಕೊಳ್ಳಬೇಡಿ. ಆಸಕ್ತರು ಎಲ್ಲಾ ತಯಾರಿಗಳೊಂದಿಗೆ ನಿಗದಿತ ದಿನದಂದು ಸಂದರ್ಶನದಲ್ಲಿ ಭಾಗವಹಿಸಿ. ಹೆಚ್ಚಿನ ಮಾಹಿತಿಗಾಗಿ NAL ನ ಅಧಿಕೃತ ವೆಬ್ಸೈಟ್ ಗಮನಿಸಬಹುದು.
