ಕರಾವಳಿ ಜಿಲ್ಲೆಗಳ ಜನರಿಗೆ ಹವಾಮಾನ ಇಲಾಖೆ ಹಾಗೂ ಜಿಲ್ಲಾಡಳಿತ ಒಂದು ಪ್ರಮುಖ ಎಚ್ಚರಿಕೆಯನ್ನು ನೀಡಿದೆ. ಹೌದು, ಕರಾವಳಿ ಭಾಗದಲ್ಲಿ ಮಳೆರಾಯನ ಅಬ್ಬರ ಜೋರಾಗಲಿದ್ದು, ಜೂನ್ 11ರ ವರೆಗೆ ಇಡೀ ಕರಾವಳಿ ಜಿಲ್ಲೆಗಳಲ್ಲಿ ‘ಆರೆಂಜ್ ಅಲರ್ಟ್’ (Orange Alert) ಘೋಷಿಸಲಾಗಿದೆ. ಭಾರೀ ಮಳೆಯ ಜೊತೆಗೆ ಬಿರುಗಾಳಿ ಹಾಗೂ ಗುಡುಗು ಸಿಡಿಲಿನ ಆರ್ಭಟ ಇರಲಿದ್ದು, ಸಾರ್ವಜನಿಕರು ಫುಲ್ ಅಲರ್ಟ್ ಆಗಿರಬೇಕು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮುನ್ನೆಚ್ಚರಿಕೆ ಕ್ರಮವಾಗಿ ಜಿಲ್ಲಾಡಳಿತ ಒಂದಿಷ್ಟು ಕಟ್ಟುನಿಟ್ಟಾದ ಗೈಡ್ಲೈನ್ಸ್ ಬಿಡುಗಡೆ ಮಾಡಿದ್ದು, ಜೀವ ಮತ್ತು ಆಸ್ತಿ ಪಾಸ್ತಿ ರಕ್ಷಿಸಿಕೊಳ್ಳಲು ಜನರು ಈ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಬೇಕಿದೆ.
ಧೋ ಅಂತ ಸುರಿಯೋ ಮಳೆಗೆ ಹೊರಗೆ ಹೋಗ್ಬೇಡಿ: ಆಡಳಿತದ ಖಡಕ್ ಸೂಚನೆ
ಧಾರಾಕಾರವಾಗಿ ಸುರಿಯುವ ಮಳೆ, ಜೋರಾಗಿ ಬೀಸುವ ಗಾಳಿ ಹಾಗೂ ಸಿಡಿಲು ಬಡಿಯುವ ಅಪಾಯ ಇರುವುದರಿಂದ ಸಾರ್ವಜನಿಕರು, ಮುಖ್ಯವಾಗಿ ಮಕ್ಕಳು ಮತ್ತು ಕೂಲಿ ಕಾರ್ಮಿಕರು ಅನಗತ್ಯವಾಗಿ ಮನೆಯಿಂದ ಹೊರಗೆ ಅಡ್ಡಾಡದಂತೆ ಸೂಚಿಸಲಾಗಿದೆ. ಮಳೆ ಬರುವಾಗ ಎಲ್ಲೆಂದರಲ್ಲಿ ನಿಲ್ಲದೆ, ಸುರಕ್ಷಿತವಾದ ಗಟ್ಟಿ ಮುಟ್ಟಾದ ಕಟ್ಟಡಗಳ ಒಳಗೆ ಆಶ್ರಯ ಪಡೆಯುವುದು ಒಳಿತು.
ಇನ್ನು ನಮ್ಮ ಅನ್ನದಾತರಿಗೂ ಒಂದು ಮುಖ್ಯ ಮನವಿ ಮಾಡಲಾಗಿದೆ. ಮಳೆ ಮತ್ತು ಸಿಡಿಲು ಇರೋ ಸಮಯದಲ್ಲಿ ಯಾವುದೇ ಕಾರಣಕ್ಕೂ ಜಮೀನಿಗೆ ಇಳಿದು ಕೃಷಿ ಚಟುವಟಿಕೆಗಳನ್ನು ಮಾಡಬೇಡಿ ಎಂದು ರೈತರಲ್ಲಿ ವಿನಂತಿಸಲಾಗಿದೆ.
ಪ್ರವಾಸಿಗರು ಹಾಗೂ ಮೀನುಗಾರರೇ ಹುಷಾರ್!
ಕಡಲಿಗೆ ಇಳಿಯಬೇಡಿ: ಸಮುದ್ರ ಸಖತ್ ರಫ್ ಆಗಿರೋದ್ರಿಂದ ಮೀನುಗಾರರು ಮತ್ತು ಪ್ರವಾಸಿಗರು ಸಮುದ್ರಕ್ಕೆ ಇಳಿಯುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
ನದಿ, ಹಳ್ಳಗಳಿಂದ ದೂರವಿರಿ: ಕರಾವಳಿಯ ನದಿಗಳು ಹಾಗೂ ಇತರೆ ಜಲಮೂಲಗಳಲ್ಲಿ ನೀರಿನ ಹರಿವು ದಿಢೀರ್ ಹೆಚ್ಚಾಗುವ ಸಾಧ್ಯತೆ ಇದೆ. ಹೀಗಾಗಿ ಯಾರು ಕೂಡ ಈ ಜಾಗಗಳಿಗೆ ಹೋಗಬೇಡಿ.
ಕರೆಂಟ್ ಕಂಬ, ಹಳೇ ಬಿಲ್ಡಿಂಗ್ಗಳಿಂದ ಸೈಡಿಗೆ ಇರಿ!
ಮಕ್ಕಳು ಮತ್ತು ಸಾರ್ವಜನಿಕರು ರಸ್ತೆ ಬದಿಯಲ್ಲಿರುವ ಅಪಾಯಕಾರಿ ಮರಗಳು ಹಾಗೂ ಕರೆಂಟ್ ಕಂಬಗಳಿಂದ ದೂರ ಇರಬೇಕು. ಬಿರುಗಾಳಿಗೆ ಎಲ್ಲಾದರೂ ಕರೆಂಟ್ ವೈರ್ ಕಿತ್ತು ಬಿದ್ದಿದ್ದರೆ, ಸಾಹಸ ಮಾಡಲು ಹೋಗದೆ ಅದರಿಂದ ಸೇಫ್ ಡಿಸ್ಟೆನ್ಸ್ ಮೇಂಟೇನ್ ಮಾಡಿ.
ಅಷ್ಟೇ ಅಲ್ಲ, ತುಂಬಾ ಹಳೆಯದಾದ, ಮುರಿದು ಬೀಳುವ ಹಂತದಲ್ಲಿರುವ ಬಿಲ್ಡಿಂಗ್ಗಳು ಮತ್ತು ಜಖಂಗೊಂಡಿರುವ ಮರಗಳ ಕೆಳಗೆ ನಿಲ್ಲಬೇಡಿ. ಜೋರಾದ ಗಾಳಿ ಬೀಸಿದಾಗ ಇವು ಬಿದ್ದು ಜೀವಕ್ಕೆ ಕುತ್ತು ತರುವ ಸಾಧ್ಯತೆ ದಟ್ಟವಾಗಿದೆ.
ಭೂಕುಸಿತದ ಭೀತಿ: ನಿಮ್ಮ ಏರಿಯಾದಲ್ಲಿ ನಿಗಾ ಇರಲಿ
ಭಾರೀ ಮಳೆಯಿಂದಾಗಿ ಕರಾವಳಿಯ ಕೆಲವು ಗುಡ್ಡಗಾಡು ಪ್ರದೇಶಗಳಲ್ಲಿ ಭೂಕುಸಿತ (Landslide) ಆಗುವ ಲಕ್ಷಣಗಳಿವೆ. ಹೀಗಾಗಿ ಅಪಾಯಕಾರಿ ಜಾಗಗಳಲ್ಲಿ ವಾಸಿಸುವ ಜನರು ಸದಾ ಅಲರ್ಟ್ ಆಗಿರಬೇಕು. ಏನಾದರೂ ಡೇಂಜರ್ ಅಂತ ಅನಿಸಿದರೆ ತಕ್ಷಣವೇ ನಿಮ್ಮ ವ್ಯಾಪ್ತಿಯ ತಹಶೀಲ್ದಾರ್ ಆಫೀಸ್ ಅಥವಾ ಗ್ರಾಮ ಪಂಚಾಯತ್ ಕಚೇರಿಯನ್ನು ಕಾಂಟ್ಯಾಕ್ಟ್ ಮಾಡಿ, ಹತ್ತಿರದ ಗವರ್ನಮೆಂಟ್ ಗಂಜಿ ಕೇಂದ್ರ ಅಥವಾ ರಿಲೀಫ್ ಸೆಂಟರ್ಗಳಿಗೆ ಶಿಫ್ಟ್ ಆಗಿ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಅಲರ್ಟ್ ಅವಧಿಯಲ್ಲಿ ಜಿಲ್ಲಾ ಮತ್ತು ತಾಲೂಕು ಮಟ್ಟದ ಎಲ್ಲಾ ಅಧಿಕಾರಿಗಳು ಹಾಗೂ ನೋಡಲ್ ಆಫೀಸರ್ಗಳು ತಮ್ಮ ಹೆಡ್ಕ್ವಾರ್ಟರ್ಸ್ನಲ್ಲೇ ಇರಬೇಕು, ರಜೆ ಹಾಕಿ ಎಲ್ಲೂ ಹೋಗಬಾರದು ಎಂದು ಕಟ್ಟುನಿಟ್ಟಿನ ಆರ್ಡರ್ ಮಾಡಲಾಗಿದೆ.
ಎಮರ್ಜೆನ್ಸಿ ಆಪತ್ತಿಗೆ ಈ ನಂಬರ್ಗಳಿಗೆ ಫೋನ್ ಮಾಡಿ
ಯಾವುದೇ ತುರ್ತು ಪರಿಸ್ಥಿತಿ ಎದುರಾದರೆ ಅಥವಾ ಪ್ರವಾಹದ ಮುನ್ಸೂಚನೆ ಸಿಕ್ಕರೆ ಸಾರ್ವಜನಿಕರು ತಕ್ಷಣವೇ ಕೆಳಗಿನ ಹೆಲ್ಪ್ಲೈನ್ ನಂಬರ್ಗಳನ್ನು ಸಂಪರ್ಕಿಸಬಹುದು:
ಟೋಲ್ ಫ್ರೀ ಹೆಲ್ಪ್ಲೈನ್: 1077
ಜಿಲ್ಲಾ ನಿಯಂತ್ರಣ ಕೊಠಡಿ (District Control Room): 0820-2574802
ಇದರ ಜೊತೆಗೆ ನಿಮ್ಮ ನಿಮ್ಮ ತಾಲೂಕು ಕೇಂದ್ರಗಳ ತಹಶೀಲ್ದಾರ್ ಆಫೀಸ್ ಕಂಟ್ರೋಲ್ ರೂಂಗೂ ಕರೆ ಮಾಡಬಹುದು.
