ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಮಹಿಳೆಯರ ಸುರಕ್ಷತೆ ಎಲ್ಲಿದೆ ಎಂಬ ಪ್ರಶ್ನೆ ಮತ್ತೆ ಎದುರಾಗಿದೆ. ನಗರದ ಸಮೀಪವಿರುವ ರೆಸಾರ್ಟ್ವೊಂದಕ್ಕೆ ಆಫೀಸ್ ಕೆಲಸದ ನಿಮಿತ್ತ ತೆರಳಿದ್ದ ತುಷಿಕಾ ಅಗರ್ವಾಲ್ ಎಂಬ ಐಟಿ ಉದ್ಯೋಗಿಗೆ ಪುರುಷರ ಗುಂಪೊಂದು ಅಸಭ್ಯವಾಗಿ ವರ್ತಿಸಿ ಕಿರುಕುಳ ನೀಡಿದೆ. ಈ ಬಗ್ಗೆ ತುಷಿಕಾ ಅವರು ವಿಡಿಯೋ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದು, ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಅಸಲಿಗೆ ಅಲ್ಲಿ ನಡೆದಿದ್ದೇನು?
ತುಷಿಕಾ ಅಗರ್ವಾಲ್ ತಮ್ಮ ಕಚೇರಿಯ ಕೆಲಸದ ನಿಮಿತ್ತ ರೆಸಾರ್ಟ್ಗೆ ಹೋಗಿದ್ದರು. ಅಲ್ಲಿ ಊಟದ ಸಮಯದಲ್ಲಿ ಸುಮಾರು 20 ರಿಂದ 30 ಪುರುಷರ ಗುಂಪೊಂದು ಇವರನ್ನು ಕೆಟ್ಟದಾಗಿ ದಿಟ್ಟಿಸಿ ನೋಡಲು ಆರಂಭಿಸಿದೆ. ಆ ಗುಂಪಿನಲ್ಲಿದ್ದವರೆಲ್ಲಾ ಮದ್ಯಪಾನ ಮಾಡಿದ್ದರು ಎನ್ನಲಾಗಿದೆ. ಆರಂಭದಲ್ಲಿ ದೂರು ನೋಡುತ್ತಿದ್ದ ಆ ಗುಂಪು, ನಂತರ ಇವರ ಬಳಿ ಬಂದು "ನಮ್ಮ ಜೊತೆ ಡ್ಯಾನ್ಸ್ ಮಾಡುತ್ತೀರಾ?" ಎಂದು ಪೀಡಿಸಲು ಶುರು ಮಾಡಿದ್ದಾರೆ.
ತುಷಿಕಾ ಅವರು ಇದಕ್ಕೆ ಒಪ್ಪದಿದ್ದಾಗ, ಆ ಗುಂಪಿನಲ್ಲಿದ್ದ ಒಬ್ಬ ವ್ಯಕ್ತಿ ನೇರವಾಗಿ ಇವರ ಬಳಿ ಬಂದು, ತನ್ನ ಸಹೋದ್ಯೋಗಿಗಳ ಜೊತೆ ನೃತ್ಯ ಮಾಡುವಂತೆ ಒತ್ತಾಯಿಸಿದ್ದಾನೆ. ಇದು ತುಷಿಕಾ ಅವರಿಗೆ ತೀವ್ರ ಮುಜುಗರ ಮತ್ತು ಅಸಮಾಧಾನ ತಂದಿದೆ.
ಮೊಬೈಲ್ ನಂಬರ್ಗಾಗಿ ಕಿರಿಕಿರಿ!
ನೃತ್ಯ ಮಾಡಲು ನಿರಾಕರಿಸಿದ ಮೇಲೂ ಈ ಪುರುಷರ ಗುಂಪು ಸುಮ್ಮನಾಗಿಲ್ಲ. ತುಷಿಕಾ ಅವರ ಪರ್ಸನಲ್ ಮೊಬೈಲ್ ನಂಬರ್ ಪಡೆಯಲು ಹಠ ಹಿಡಿದಿದ್ದಾರೆ. ಅಷ್ಟೇ ಅಲ್ಲದೆ, ಆಕೆಯ ಆಫೀಸ್ ಸಿಬ್ಬಂದಿಗಳ ಬಳಿ ಹೋಗಿ ಆಕೆಯ ಫೋನ್ ನಂಬರ್ ಕೊಡುವಂತೆ ಕೇಳಿದ್ದಾರೆ. ಒಬ್ಬಂಟಿ ಮಹಿಳೆ ಎಂದು ತಿಳಿದು ಇಷ್ಟೆಲ್ಲಾ ಕಿರುಕುಳ ನೀಡಿರುವುದು ನಿಜಕ್ಕೂ ಶಾಕಿಂಗ್ ಸಂಗತಿ.
ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆದ ವಿಡಿಯೋ
ತಮಗಾದ ಈ ಕೆಟ್ಟ ಅನುಭವವನ್ನು ತುಷಿಕಾ ವಿಡಿಯೋ ಮೂಲಕ ವಿವರಿಸಿದ್ದಾರೆ. ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಕಿಡಿ ಕಾರುತ್ತಿದ್ದಾರೆ.
- "ಒಬ್ಬಂಟಿ ಮಹಿಳೆಯನ್ನು ಇಂತಹ ಜಾಗಕ್ಕೆ ಮೀಟಿಂಗ್ಗೆ ಕಳುಹಿಸಿದ ಕಂಪನಿಯ ನಿರ್ಧಾರ ತಪ್ಪು" ಎಂದು ಕೆಲವರು ಕಾಮೆಂಟ್ ಮಾಡಿದ್ದಾರೆ.
- "ಬೆಂಗಳೂರಿನಲ್ಲಿ ಕಾಮ ಪಿಶಾಚಿಗಳ ಹಾವಳಿ ಹೆಚ್ಚಾಗಿದೆ, ಇವರಿಗೆ ಪೊಲೀಸರು ಸರಿಯಾದ ಶಾಸ್ತಿ ಮಾಡಬೇಕು" ಎಂದು ಜನರು ಆಗ್ರಹಿಸಿದ್ದಾರೆ.
- ಮತ್ತೊಬ್ಬ ಮಹಿಳೆ ಕಾಮೆಂಟ್ ಮಾಡಿ, "ನನಗೂ ಇಂತಹದೇ ಅನುಭವ ಈ ಹಿಂದೆ ಆಗಿತ್ತು" ಎಂದು ನೋವು ಹಂಚಿಕೊಂಡಿದ್ದಾರೆ.
ಪೊಲೀಸ್ ದೂರು ಮತ್ತು ತನಿಖೆ
ಈ ಘಟನೆಯ ಬಗ್ಗೆ ತುಷಿಕಾ ಅವರು ಈಗಾಗಲೇ ಪೊಲೀಸರಿಗೆ ದೂರು ನೀಡಿದ್ದಾರೆ. ಆದರೆ ಪೊಲೀಸರು ಇದುವರೆಗೆ ಯಾವ ರೀತಿಯ ಕ್ರಮ ಕೈಗೊಂಡಿದ್ದಾರೆ ಎಂಬ ಬಗ್ಗೆ ಇನ್ನು ಸ್ಪಷ್ಟ ಮಾಹಿತಿ ಸಿಕ್ಕಿಲ್ಲ. ಇಂತಹ ಸಾರ್ವಜನಿಕ ಸ್ಥಳಗಳಲ್ಲಿ, ಅದರಲ್ಲೂ ರೆಸಾರ್ಟ್ಗಳಂತಹ ಜಾಗದಲ್ಲಿ ಮಹಿಳೆಯರಿಗೆ ರಕ್ಷಣೆ ಇಲ್ಲದಿದ್ದರೆ ಹೇಗೆ ಎಂಬ ಪ್ರಶ್ನೆ ದೊಡ್ಡದಾಗಿ ಎದ್ದಿದೆ.
