ಬೆಂಗಳೂರಿನಲ್ಲಿ ಪ್ರತಿನಿತ್ಯ ಲೋಕಲ್ ರೈಲುಗಳಲ್ಲಿ ಓಡಾಡುವ ಸಾರ್ವಜನಿಕರಿಗೆ ಹಾಗೂ ಆಫೀಸ್ ಮುಗಿಸಿ ಊರಿಗೆ ಹೋಗುವವರಿಗೆ ನೈಋತ್ಯ ರೈಲ್ವೆ (SWR) ಮಹತ್ವದ ಪ್ರಕಟಣೆಯೊಂದನ್ನು ಹೊರಡಿಸಿದೆ. ಐಟಿ ಹಬ್ ಭಾಗವಾದ ಕೆ.ಆರ್. ಪುರಂ ಮತ್ತು ವೈಟ್ಫೀಲ್ಡ್ ಪ್ಯಾನಲ್ ಕ್ಯಾಬಿನ್ ನಡುವೆ ಹಳಿಗಳ ಇಂಜಿನಿಯರಿಂಗ್ ಕಾಮಗಾರಿ (ಲೈನ್ ಬ್ಲಾಕ್) ನಡೆಯುತ್ತಿರುವುದರಿಂದ ಈ ಮಾರ್ಗದ ರೈಲು ಸಂಚಾರದಲ್ಲಿ ಭಾರಿ ವ್ಯತ್ಯಯ ಉಂಟಾಗಲಿದೆ. ಜೂನ್ 7 ಮತ್ತು ಜೂನ್ 8 ರಂದು ಪ್ರಮುಖ 2 ರೈಲುಗಳನ್ನು ಸಂಪೂರ್ಣವಾಗಿ ಕ್ಯಾನ್ಸಲ್ ಮಾಡಲಾಗಿದ್ದು, ಇನ್ನು 6 ಮೆಮು (MEMU) ರೈಲುಗಳ ಸಂಚಾರವನ್ನು ಭಾಗಶಃ ರದ್ದುಗೊಳಿಸಲಾಗಿದೆ. ಹಾಗಾಗಿ ಪ್ರಯಾಣಿಕರು ಮುಂಚಿತವಾಗಿಯೇ ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳುವುದು ಒಳಿತು.
ಸಂಪೂರ್ಣವಾಗಿ ರದ್ದಾಗಿರುವ ರೈಲುಗಳ ವಿವರ ಇಲ್ಲಿವೆ:
ನೀವೇನಾದರೂ ಜೂನ್ 8 ರಂದು ಅಶೋಕಪುರಂ ಕಡೆಗೆ ಜರ್ನಿ ಮಾಡಲು ಪ್ಲಾನ್ ಮಾಡಿದ್ದರೆ ಈ ಲಿಸ್ಟ್ ನೋಡಿಕೊಳ್ಳಿ. ಕೆಳಗಿನ ಎರಡು ರೈಲುಗಳ ಸೇವೆಯನ್ನು ರೈಲ್ವೆ ಇಲಾಖೆ ಸಂಪೂರ್ಣವಾಗಿ ಬಂದ್ ಮಾಡಿದೆ:
ರೈಲು ಸಂಖ್ಯೆ 20623: ಅಶೋಕಪುರಂ – ಕೆಎಸ್ಆರ್ ಬೆಂಗಳೂರು ಎಕ್ಸ್ಪ್ರೆಸ್
ರೈಲು ಸಂಖ್ಯೆ 20624: ಕೆಎಸ್ಆರ್ ಬೆಂಗಳೂರು – ಅಶೋಕಪುರಂ ಎಕ್ಸ್ಪ್ರೆಸ್
ಜೂನ್ 7 ರಂದು ಭಾಗಶಃ ರದ್ದಾಗುವ ರೈಲುಗಳು (Short-Terminate):
ಕೆಲಸದ ನಿಮಿತ್ತ ಜೂನ್ 7 ರಂದು ಓಡಾಡುವ ಮೆಮು ರೈಲುಗಳ ಸಂಚಾರವನ್ನು ಅರ್ಧಕ್ಕೇ ನಿಲ್ಲಿಸಲಾಗುತ್ತಿದ್ದು, ಅದರ ಕಂಪ್ಲೀಟ್ ಡಿಟೇಲ್ಸ್ ಹೀಗಿದೆ:
ಮರಿಕುಪ್ಪಂ – ಕೆ.ಆರ್. ಪುರಂ ಮೆಮು (ರೈಲು ಸಂಖ್ಯೆ 66533): ಈ ರೈಲು ವೈಟ್ಫೀಲ್ಡ್ ಮತ್ತು ಕೆ.ಆರ್. ಪುರಂ ನಡುವೆ ಓಡುವುದಿಲ್ಲ. ಇದು ವೈಟ್ಫೀಲ್ಡ್ ಸ್ಟೇಷನ್ನಲ್ಲೇ ತನ್ನ ಜರ್ನಿ ಕೊನೆಗೊಳಿಸಲಿದೆ.
ಕೆ.ಆರ್. ಪುರಂ – ಕುಪ್ಪಂ ಮೆಮು (ರೈಲು ಸಂಖ್ಯೆ 66534): ಈ ರೈಲು ಕೆ.ಆರ್. ಪುರಂ ಸ್ಟೇಷನ್ನಿಂದ ಸ್ಟಾರ್ಟ್ ಆಗುವ ಬದಲಿಗೆ, ವೈಟ್ಫೀಲ್ಡ್ ನಿಲ್ದಾಣದಿಂದಲೇ ತನ್ನ ನಿಗದಿತ ಸಮಯಕ್ಕೆ ಪ್ರಯಾಣ ಆರಂಭಿಸಲಿದೆ.
ಅನಂತಪುರ – ಕೆಎಸ್ಆರ್ ಬೆಂಗಳೂರು ಮೆಮು (ರೈಲು ಸಂಖ್ಯೆ 66560): ಚನ್ನಸಂದ್ರ ಮತ್ತು ಕೆಎಸ್ಆರ್ ಬೆಂಗಳೂರು ನಿಲ್ದಾಣಗಳ ನಡುವೆ ಈ ರೈಲಿನ ಓಡಾಟವನ್ನು ಕಡಿತಗೊಳಿಸಲಾಗಿದೆ.
ಕೆಎಸ್ಆರ್ ಬೆಂಗಳೂರು – ಮರಿಕುಪ್ಪಂ ಮೆಮು (ರೈಲು ಸಂಖ್ಯೆ 66520): ಮೆಜೆಸ್ಟಿಕ್ (KSR ಬೆಂಗಳೂರು) ಮತ್ತು ವೈಟ್ಫೀಲ್ಡ್ ನಡುವೆ ಈ ರೈಲು ಭಾಗಶಃ ರದ್ದಾಗಲಿದ್ದು, ಬೆಂಗಳೂರು ಬದಲಿಗೆ ವೈಟ್ಫೀಲ್ಡ್ನಿಂದಲೇ ಮರಿಕುಪ್ಪಂ ಕಡೆಗೆ ಸಂಚಾರ ಶುರು ಮಾಡಲಿದೆ.
ಜೂನ್ 8 ರಂದು ಭಾಗಶಃ ರದ್ದಾಗುವ ರೈಲುಗಳು:
ವಾರಾಂತ್ಯದ ದಿನವಾದ ಜೂನ್ 8 ರಂದು ಕೂಡ ಕೆಳಗಿನ ಮೆಮು ರೈಲುಗಳ ಸಂಚಾರದ ಹಾದಿಯನ್ನು ಬದಲಾಯಿಸಲಾಗಿದೆ:
ಮರಿಕುಪ್ಪಂ – ಕೆಎಸ್ಆರ್ ಬೆಂಗಳೂರು ಮೆಮು (ರೈಲು ಸಂಖ್ಯೆ 66519): ಈ ರೈಲು ವೈಟ್ಫೀಲ್ಡ್ ಮತ್ತು ಮೆಜೆಸ್ಟಿಕ್ ನಡುವೆ ಸಂಚರಿಸುವುದಿಲ್ಲ. ವೈಟ್ಫೀಲ್ಡ್ ನಿಲ್ದಾಣ ಬಂದ ತಕ್ಷಣ ಈ ರೈಲು ಅಲ್ಲಿಗೇ ಸ್ಟಾಪ್ ಆಗಲಿದೆ.
ಕೆಎಸ್ಆರ್ ಬೆಂಗಳೂರು – ಮರಿಕುಪ್ಪಂ ಮೆಮು (ರೈಲು ಸಂಖ್ಯೆ 66546): ಈ ರೈಲು ಮೆಜೆಸ್ಟಿಕ್ ನಿಲ್ದಾಣದಿಂದ ಹೊರಡುವ ಬದಲಿಗೆ ವೈಟ್ಫೀಲ್ಡ್ ಸ್ಟೇಷನ್ನಿಂದಲೇ ನಿಗದಿತ ಟೈಮ್ಗೆ ಮರಿಕುಪ್ಪಂ ಕಡೆಗೆ ಹೊರಡಲಿದೆ.
ರೈಲ್ವೆ ಇಲಾಖೆಯ ಮನವಿ:
ಬೆಂಗಳೂರಿನ ಹಳಿಗಳ ಇಂಜಿನಿಯರಿಂಗ್ ಕಾಮಗಾರಿಯನ್ನು ಆದಷ್ಟು ಬೇಗ ಮುಗಿಸಿ, ಮುಂದೆ ರೈಲುಗಳು ಯಾವುದೇ ತೊಂದರೆ ಇಲ್ಲದೆ ವೇಗವಾಗಿ ಸಂಚರಿಸಲು ಅನುಕೂಲ ಮಾಡಿಕೊಡುವ ನಿಟ್ಟಿನಲ್ಲಿ ಈ ತಾತ್ಕಾಲಿಕ ಬದಲಾವಣೆ ಮಾಡುವುದು ಅನಿವಾರ್ಯವಾಗಿದೆ. ದಿನನಿತ್ಯ ಕಚೇರಿ ಹಾಗೂ ಇತರೆ ಕೆಲಸಗಳಿಗಾಗಿ ಈ ರೂಟ್ನಲ್ಲಿ ಓಡಾಡುವ ಸಾರ್ವಜನಿಕರು ರೈಲ್ವೆ ಇಲಾಖೆಯೊಂದಿಗೆ ಸಹಕರಿಸಬೇಕು ಎಂದು ನೈಋತ್ಯ ರೈಲ್ವೆ ಪ್ರಕಟಣೆಯಲ್ಲಿ ವಿನಂತಿಸಿದೆ.
