ಬೆಂಗಳೂರಿನಲ್ಲಿ ಕೆಲಸ ಹುಡುಕುತ್ತಿದ್ದೀರಾ? ಜನಗಣತಿ ಕಾರ್ಯದಲ್ಲಿ ಪಾಲ್ಗೊಳ್ಳಿ, ಕೈತುಂಬಾ ಹಣ ಸಂಪಾದಿಸಿ!!

ಬೆಂಗಳೂರು ಅಂದ್ರೆನೇ ಅವಕಾಶಗಳ ಸಂತೆ. ಇದೀಗ ನಗರದ ಯುವಜನತೆಗೆ, ಅದರಲ್ಲೂ ವಿಶೇಷವಾಗಿ ವಿದ್ಯಾರ್ಥಿಗಳಿಗೆ ಮತ್ತು ಮನೆಯಲ್ಲೇ ಇರುವವರಿಗೆ ಒಂದು ಅದ್ಭುತ ಅವಕಾಶ ಎದುರಾಗಿದೆ. 2027ರ ರಾಷ್ಟ್ರೀಯ ಜನಗಣತಿ (National Census 2027) ಕಾರ್ಯಕ್ಕೆ ಬೆಂಗಳೂರು ಪೂರ್ವ ಮಹಾನಗರ ಪಾಲಿಕೆ (BECC) ಭರ್ಜರಿ ನೇಮಕಾತಿ ಆರಂಭಿಸಿದೆ. ಸುಮಾರು 1,000 ಜನರಿಗೆ ಇಲ್ಲಿ ಕೆಲಸ ಸಿಗಲಿದ್ದು, ಇದು ಕೇವಲ ಉದ್ಯೋಗ ಮಾತ್ರವಲ್ಲ, ದೇಶದ ಅಭಿವೃದ್ಧಿಯಲ್ಲಿ ಪಾಲ್ಗೊಳ್ಳುವ ಒಂದು ಹೆಮ್ಮೆಯ ಅವಕಾಶವೂ ಹೌದು.

ಏನಿದು ಹುದ್ದೆ? ಯಾರು ಅರ್ಜಿ ಸಲ್ಲಿಸಬಹುದು?

ಜನಗಣತಿ ಎಂದರೆ ಮನೆಮನೆಗೆ ಭೇಟಿ ನೀಡಿ ಮಾಹಿತಿ ಸಂಗ್ರಹಿಸುವ ಕೆಲಸ. ಇದಕ್ಕಾಗಿ 'ಎನ್ಯೂಮರೇಟರ್'ಗಳನ್ನು ನೇಮಿಸಿಕೊಳ್ಳಲಾಗುತ್ತಿದೆ. ಈ ಕೆಲಸಕ್ಕೆ ಹೈಫೈ ಡಿಗ್ರಿ ಇರಲೇಬೇಕು ಎಂದೇನೂ ಇಲ್ಲ. ನೀವು ಪಿಯುಸಿ ಮುಗಿಸಿದ್ದರೆ ಸಾಕು, ಈ ಉದ್ಯೋಗಕ್ಕೆ ಅರ್ಹರು. ಬಿ.ಇ.ಸಿ.ಸಿ. ಆಯುಕ್ತರಾದ ಡಿ.ಎಸ್. ರಮೇಶ್ ಅವರು ತಿಳಿಸಿರುವಂತೆ, ವಿದ್ಯಾರ್ಥಿಗಳು, ಸ್ವಯಂಸೇವಕರು ಮತ್ತು ಆಸಕ್ತ ನಾಗರಿಕರು ಈ ಕಾರ್ಯದಲ್ಲಿ ಕೈಜೋಡಿಸಬಹುದಾಗಿದೆ.

ಆದರೆ, ಒಂದು ಮುಖ್ಯ ಕಂಡಿಷನ್ ಇದೆ! ನಿಮ್ಮ ಬಳಿ ಆಂಡ್ರಾಯ್ಡ್ ಮೊಬೈಲ್ ಇರಬೇಕು. ಇಂದಿನ ಡಿಜಿಟಲ್ ಕಾಲದಲ್ಲಿ ಎಲ್ಲವೂ ಮೊಬೈಲ್‌ನಲ್ಲೇ ನಡೆಯುವುದರಿಂದ, ನಿಮ್ಮ ಫೋನ್ ಕನಿಷ್ಠ 12ನೇ ಆವೃತ್ತಿಯ ಆಂಡ್ರಾಯ್ಡ್ ಸಾಫ್ಟ್‌ವೇರ್ ಮತ್ತು 4GB RAM ಹೊಂದಿರಬೇಕು. ಮಾಹಿತಿಗಳನ್ನು ಆಪ್ ಮೂಲಕ ಅಪ್‌ಲೋಡ್ ಮಾಡಲು ಇದು ಅನಿವಾರ್ಯ.

ಸಂಬಳ ಮತ್ತು ಸವಲತ್ತುಗಳು

ಇಲ್ಲಿ ಕೆಲಸ ಮಾಡುವವರಿಗೆ ಸರ್ಕಾರದಿಂದ ಉತ್ತಮ ಗೌರವ ಧನ (Honorarium) ಸಿಗಲಿದೆ. ಮೊದಲ ಹಂತದ ಕೆಲಸ ಮುಗಿಸಿದಾಗ 9,000 ರೂಪಾಯಿ ಸಿಗಲಿದೆ. ಎರಡನೇ ಹಂತದ ಕೆಲಸಕ್ಕೆ 16,000 ರೂಪಾಯಿ ನೀಡಲಾಗುತ್ತದೆ. ಅಷ್ಟೇ ಅಲ್ಲ, ಈ ಕೆಲಸವನ್ನು ಹೇಗೆ ಮಾಡಬೇಕು ಎಂಬುದರ ಬಗ್ಗೆ ಸಂಪೂರ್ಣ ತರಬೇತಿಯನ್ನು (Training) ಪಾಲಿಕೆಯೇ ನೀಡುತ್ತದೆ. ಹಾಗಾಗಿ "ನನಗೆ ಈ ಕೆಲಸದ ಬಗ್ಗೆ ಗೊತ್ತಿಲ್ಲವಲ್ಲ" ಎಂಬ ಆತಂಕ ಬೇಡ.

ಸ್ಥಳೀಯರಿಗೆ ಮೊದಲ ಆದ್ಯತೆ

ನೀವು ಬೆಂಗಳೂರಿನ ಮಹದೇವಪುರ, ಕೆ.ಆರ್.ಪುರಂ ಅಥವಾ ಅದರ ಸುತ್ತಮುತ್ತಲ ಪ್ರದೇಶದವರಾಗಿದ್ದರೆ ನಿಮಗೆ ಮೊದಲ ಆದ್ಯತೆ ಸಿಗಲಿದೆ. ಏಕೆಂದರೆ ಸ್ಥಳೀಯವಾಗಿ ವಾಸಿಸುವವರಿಗೆ ಆಯಾ ಭಾಗದ ಭೌಗೋಳಿಕ ಅರಿವು ಹೆಚ್ಚಿರುತ್ತದೆ ಎಂಬುದು ಅಧಿಕಾರಿಗಳ ಆಶಯ. ಈ ಭಾಗದ ನಿರುದ್ಯೋಗಿ ಯುವಕ-ಯುವತಿಯರಿಗೆ ಇದು ಮನೆಯ ಹತ್ತಿರವೇ ಕೆಲಸ ಮಾಡುವ ಸುಸಂದರ್ಭ.

ನೇರ ಸಂದರ್ಶನ ಎಲ್ಲಿ ಮತ್ತು ಯಾವಾಗ?

ಇದಕ್ಕೆ ಯಾವುದೇ ಸುದೀರ್ಘ ಅರ್ಜಿ ಸಲ್ಲಿಕೆ ಪ್ರಕ್ರಿಯೆ ಇಲ್ಲ. ನೀವೇ ನೇರವಾಗಿ ಸಂದರ್ಶನಕ್ಕೆ ಹಾಜರಾಗಬಹುದು (Walk-in Interview).

• ದಿನಾಂಕ: ಏಪ್ರಿಲ್ 24, 2026 (ಶುಕ್ರವಾರ)
• ಸಮಯ: ಬೆಳಿಗ್ಗೆ 10:00 ಗಂಟೆಯಿಂದ ಆರಂಭ
• ಸ್ಥಳ: ನ್ಯೂ ಹೊರೈಜನ್ ಕಾಲೇಜ್ ಆಫ್ ಇಂಜಿನಿಯರಿಂಗ್, ಮಾರತಹಳ್ಳಿ ಔಟರ್ ರಿಂಗ್ ರೋಡ್.

📢🇮🇳 Walk-in Interview – Census 2027 Enumerators 🇮🇳📢

Bengaluru East City Corporation (BECC) invites walk-in Interview for Enumerator roles for National Census 2027.

👤 Commissioner & Principal Census Officer D.S. Ramesh urges students, volunteers, and citizens to participate… pic.twitter.com/8iJh9dus7z

— Greater Bengaluru Authority (@GBA_office) April 22, 2026

ದೇಶದ ಭವಿಷ್ಯವನ್ನು ನಿರ್ಧರಿಸುವ ಈ ಜನಗಣತಿ ಕಾರ್ಯದಲ್ಲಿ ನೀವು ಭಾಗವಹಿಸುವುದು ಒಂದು ಜವಾಬ್ದಾರಿಯುತ ಕೆಲಸ. ಕೈತುಂಬಾ ಹಣದ ಜೊತೆಗೆ ಸರ್ಕಾರದ ಸರ್ಟಿಫಿಕೇಟ್ ಅಥವಾ ಅನುಭವ ಕೂಡ ನಿಮ್ಮದಾಗಲಿದೆ. ಇನ್ನೇಕೆ ತಡ? ಅರ್ಹತೆ ಇರುವವರು ಅಗತ್ಯ ದಾಖಲೆಗಳೊಂದಿಗೆ ಸಂದರ್ಶನಕ್ಕೆ ಹಾಜರಾಗಿ.