ಇಡೀ ದೇಶದ ಕಣ್ಣು ಈಗ ಮೇ 4ರ ಸೋಮವಾರದ ಮೇಲೆ ನೆಟ್ಟಿದೆ. ಯಾಕೆಂದರೆ ಅಂದು ಕೇರಳ, ಪಶ್ಚಿಮ ಬಂಗಾಳ, ಅಸ್ಸಾಂ, ತಮಿಳುನಾಡು ಮತ್ತು ಪುದುಚೇರಿ ವಿಧಾನಸಭಾ ಚುನಾವಣೆಗಳ ಫಲಿತಾಂಶ ಪ್ರಕಟವಾಗಲಿದೆ. ಬೆಳಗ್ಗೆ 8 ಗಂಟೆಗೆ ಮತ ಎಣಿಕೆ ಶುರುವಾಗಲಿದ್ದು, ಮಧ್ಯಾಹ್ನದ ಹೊತ್ತಿಗೆ ಯಾವ ರಾಜ್ಯದಲ್ಲಿ ಯಾರ ಸರ್ಕಾರ ಅಸ್ತಿತ್ವಕ್ಕೆ ಬರುತ್ತೆ ಅನ್ನೋದು ಕನ್ಫರ್ಮ್ ಆಗಲಿದೆ.
ಈ ಬಾರಿ ಐದೂ ರಾಜ್ಯಗಳಲ್ಲಿ ಬಿಗ್ ಫೈಟ್ ನಡೆದಿದ್ದು, ಘಟಾನುಘಟಿ ನಾಯಕರಿಗೆ ಇದು ಪ್ರತಿಷ್ಠೆಯ ಪ್ರಶ್ನೆಯಾಗಿದೆ.
ಯಾವ ರಾಜ್ಯದಲ್ಲಿ ಯಾರ ನಡುವೆ ಫೈಟ್?
ಪಶ್ಚಿಮ ಬಂಗಾಳ: ಇಲ್ಲಿ ಮಮತಾ ಬ್ಯಾನರ್ಜಿ ಅವರಿಗೆ ಮಾಡು ಇಲ್ಲವೇ ಮಡಿ ಎಂಬಂತಾಗಿದೆ. ತೃಣಮೂಲ ಕಾಂಗ್ರೆಸ್ನ ಭದ್ರಕೋಟೆಗೆ ಈ ಬಾರಿ ಬಿಜೆಪಿ ಸಖತ್ ಟಕ್ಕರ್ ಕೊಟ್ಟಿದೆ. ದೀದಿಯ ಮ್ಯಾಜಿಕ್ ಮತ್ತೆ ನಡೆಯುತ್ತಾ ಅಥವಾ ಕಮಲ ಅರಳುತ್ತಾ ಅನ್ನೋದೇ ಇಲ್ಲಿನ ದೊಡ್ಡ ಕುತೂಹಲ.
ತಮಿಳುನಾಡು: ಇಲ್ಲಿ ಡಿಎಂಕೆ ತನ್ನ ಅಧಿಕಾರ ಉಳಿಸಿಕೊಳ್ಳಲು ಕಸರತ್ತು ನಡೆಸಿದ್ದರೆ, ಅತ್ತ ಎಐಎಡಿಎಂಕೆ ಮರಳಿ ಫಾರ್ಮ್ಗೆ ಬರಲು ಪ್ಲ್ಯಾನ್ ಮಾಡಿದೆ. ಇತ್ತ ಬಿಜೆಪಿ ಕೂಡ ತಮಿಳು ಮಣ್ಣಿನಲ್ಲಿ ತನ್ನ ಪ್ರಭಾವ ಹೆಚ್ಚಿಸಿಕೊಳ್ಳಲು ಹವಣಿಸುತ್ತಿದೆ.
ಕೇರಳ: ಪಿಣರಾಯಿ ವಿಜಯನ್ ನೇತೃತ್ವದ ಎಡರಂಗ (LDF) ಸತತವಾಗಿ ಎರಡನೇ ಬಾರಿಗೆ ಇತಿಹಾಸ ಬರೆಯಲು ರೆಡಿಯಾಗಿದೆ. ಅತ್ತ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಈ ಬಾರಿ ಹೇಗಾದರೂ ಮಾಡಿ ಅಧಿಕಾರ ಹಿಡಿಯಲೇಬೇಕು ಅಂತ ಪಣ ತೊಟ್ಟಿದೆ.
ಅಸ್ಸಾಂ: ಹಿಮಂತ ಬಿಸ್ವಾ ಶರ್ಮಾ ಅವರ ನಾಯಕತ್ವದಲ್ಲಿ ಬಿಜೆಪಿ ಮತ್ತೆ ಪವರ್ಗೆ ಬರಲು ಸಜ್ಜಾಗಿದೆ. ತನ್ನ ಹಿಡಿತವನ್ನು ಅಸ್ಸಾಂನಲ್ಲಿ ಮುಂದುವರಿಸುವ ವಿಶ್ವಾಸದಲ್ಲಿ ಕೇಸರಿ ಪಡೆ ಇದೆ.
ಪುದುಚೇರಿ: ಇಲ್ಲಿ ಈಗಾಗಲೇ ಎಕ್ಸಿಟ್ ಪೋಲ್ ಭವಿಷ್ಯ ಹೊರಬಂದಿದೆ. ಸಮೀಕ್ಷೆಗಳ ಪ್ರಕಾರ ಇಲ್ಲಿ ಎನ್ಡಿಎ (NDA) ಮೈತ್ರಿಕೂಟ 17 ರಿಂದ 21 ಸೀಟ್ ಗೆದ್ದು ಬಹುಮತದೊಂದಿಗೆ ಗೆಲುವಿನ ನಗೆ ಬೀರಲಿದೆ ಎನ್ನಲಾಗಿದೆ. ಕಾಂಗ್ರೆಸ್ ಬಣಕ್ಕೆ ಇಲ್ಲಿ ಸ್ವಲ್ಪ ಹಿನ್ನಡೆಯಾಗುವ ಸಾಧ್ಯತೆ ಇದೆ.
ಮತ ಎಣಿಕೆ ಹೇಗೆ ನಡೆಯುತ್ತೆ?
ಚುನಾವಣಾ ಆಯೋಗದ ಪ್ರಕಾರ, ಮೇ 4ರಂದು ಬೆಳಗ್ಗೆ 8 ಗಂಟೆಗೆ ಮೊದಲು ಪೋಸ್ಟಲ್ ಬ್ಯಾಲೆಟ್ (ಅಂಚೆ ಮತಪತ್ರ) ಎಣಿಕೆ ಶುರುವಾಗುತ್ತೆ. ಅದಾದ 30 ನಿಮಿಷಕ್ಕೆ ಅಂದರೆ 8:30 ರಿಂದ ಇವಿಎಂ ಮಿಷನ್ಗಳ ಮತ ಎಣಿಕೆ ಆರಂಭವಾಗಲಿದೆ. ಪ್ರತಿಯೊಂದು ಸುತ್ತಿನ ಎಣಿಕೆ ಮುಗಿದಂತೆ ಅಭ್ಯರ್ಥಿಗಳು ಪಡೆದ ಮತಗಳ ವಿವರ ಸಿಗುತ್ತಾ ಹೋಗುತ್ತದೆ.
ಬೆಳಗ್ಗೆ 10-11 ಗಂಟೆಯ ಹೊತ್ತಿಗೆ ಆರಂಭಿಕ ಟ್ರೆಂಡ್ಗಳು ಗೊತ್ತಾಗಲಿದ್ದು, ಮಧ್ಯಾಹ್ನ 1 ಅಥವಾ 2 ಗಂಟೆಯ ವೇಳೆಗೆ ರಾಜ್ಯಗಳ ಅಸಲಿ ಚಿತ್ರಣ ನಮಗೆ ಸಿಗಲಿದೆ.
ಫಲಿತಾಂಶ ಎಲ್ಲಿ ನೋಡಬಹುದು?
ನೀವು ಮನೆಯಲ್ಲೇ ಕುಳಿತು ಕ್ಷಣಕ್ಷಣದ ಲೈವ್ ಅಪ್ಡೇಟ್ಸ್ ಪಡೆಯಲು ಚುನಾವಣಾ ಆಯೋಗದ ಅಧಿಕೃತ ವೆಬ್ಸೈಟ್ eci.gov.in ಗೆ ಭೇಟಿ ನೀಡಬಹುದು. ಟಿವಿ ಮತ್ತು ನ್ಯೂಸ್ ಆಪ್ಗಳಲ್ಲೂ ದಿನವಿಡೀ ಅಪ್ಡೇಟ್ಸ್ ಸಿಗುತ್ತಿರುತ್ತದೆ.
ಈ ಐದು ರಾಜ್ಯಗಳ ಫಲಿತಾಂಶ ಮುಂದಿನ ರಾಷ್ಟ್ರೀಯ ರಾಜಕಾರಣದ ದಿಕ್ಸೂಚಿಯಾಗಲಿದೆ ಎನ್ನುವುದರಲ್ಲಿ ಅನುಮಾನವಿಲ್ಲ. ಯಾವ ರಾಜ್ಯದ ಜನ ಯಾರಿಗೆ ಜೈ ಅಂತಾರೆ ಅಂತ ನೋಡಲು ಸೋಮವಾರದವರೆಗೆ ಕಾಯಲೇಬೇಕು!
