ಆಧಾರ್ ಕಾರ್ಡ್ಗೆ ಸಂಬಂಧಿಸಿದ ಯಾವುದೇ ಸಣ್ಣ ತಿದ್ದುಪಡಿ ಅಥವಾ ಮೊಬೈಲ್ ನಂಬರ್ ಲಿಂಕ್ ಮಾಡಿಸಬೇಕೆಂದರೂ ಆಧಾರ್ ಸೇವಾ ಕೇಂದ್ರಗಳ (Aadhaar Seva Kendra) ಮುಂದೆ ಬೆಳಗ್ಗೆಯಿಂದಲೇ ಗಂಟೆಗಟ್ಟಲೆ ಕ್ಯೂನಲ್ಲಿ ನಿಲ್ಲುವುದು ನಮಗೆಲ್ಲಾ ಗೊತ್ತೇ ಇದೆ. ಆದರೆ, ಇನ್ಮುಂದೆ ಆ ಟೆನ್ಷನ್ ಪಡಬೇಕಾಗಿಲ್ಲ. ನಿಮ್ಮ ಸ್ಮಾರಟ್ಫೋನ್ನಲ್ಲಿರುವ ಅಧಿಕೃತ ಆ್ಯಪ್ ಬಳಸಿಕೊಂಡು ಮನೆಯಲ್ಲೇ ಕುಳಿತು ಬಹಳ ಸುಲಭವಾಗಿ ಮೊಬೈಲ್ ನಂಬರ್ ಅಪ್ಡೇಟ್ ಮಾಡಿಕೊಳ್ಳಬಹುದು.
ಈ ಹೊಸ ಡಿಜಿಟಲ್ ಸೌಲಭ್ಯವು ಜನಸಾಮಾನ್ಯರ ಸಮಯವನ್ನು ಉಳಿಸುವುದಲ್ಲದೆ, ದಲ್ಲಾಳಿಗಳ ಕಾಟಕ್ಕೂ ಬ್ರೇಕ್ ಹಾಕುತ್ತದೆ. ಹಾಗಾದರೆ, ನಿಮ್ಮ ಫೋನ್ನಲ್ಲೇ ಕೇವಲ 5 ನಿಮಿಷಗಳಲ್ಲಿ ಈ ಪ್ರಕ್ರಿಯೆಯನ್ನು ಹೇಗೆ ಪೂರ್ಣಗೊಳಿಸುವುದು? ಹಂತ-ಹಂತದ ಮಾಹಿತಿ ಇಲ್ಲಿದೆ:
ಮೊಬೈಲ್ ನಂಬರ್ ಅಪ್ಡೇಟ್ ಮಾಡುವ ಹಂತಗಳು (Step-by-Step Guide):
ಹಂತ 1 - ಮೊದಲಿಗೆ ನಿಮ್ಮ ಸ್ಮಾರಟ್ಫೋನ್ನ ಗೂಗಲ್ ಪ್ಲೇ ಸ್ಟೋರ್ಗೆ (Play Store) ಹೋಗಿ ಅಧಿಕೃತ ‘Aadhaar’ ಆ್ಯಪ್ ಅನ್ನು ಇನ್ಸ್ಟಾಲ್ ಮಾಡಿಕೊಳ್ಳಿ.
ಹಂತ 2 - ಆ್ಯಪ್ ಓಪನ್ ಮಾಡಿ, ನಿಮ್ಮ 12 ಅಂಕಿಗಳ ಆಧಾರ್ ಸಂಖ್ಯೆಯನ್ನು ನಮೂದಿಸಿ. ಇದಾದ ನಂತರ, ಆ್ಯಪ್ನಲ್ಲಿ ಕೇಳಲಾಗುವ ಮುಖದ ದೃಢೀಕರಣ (Face Authentication) ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿ ಲಾಗಿನ್ ಆಗಿ.
ಹಂತ 3 - ಯಶಸ್ವಿಯಾಗಿ ಲಾಗಿನ್ ಆದ ನಂತರ ಹೋಮ್ ಪೇಜ್ನಲ್ಲಿ ಕೆಳಗೆ ಸ್ಕ್ರಾಲ್ ಮಾಡಿದರೆ, ನಿಮಗೆ “My Aadhaar Updates” ಎಂಬ ಆಪ್ಷನ್ ಕಾಣಿಸುತ್ತದೆ, ಅದರ ಮೇಲೆ ಕ್ಲಿಕ್ ಮಾಡಿ.
ಹಂತ 4 - ಈಗ ಅಲ್ಲಿ ಕಾಣಿಸುವ “Mobile Number Update” ಆಪ್ಷನ್ ಆಯ್ದುಕೊಂಡು ‘Continue’ ಕೊಡಿ. ನೀವು ಹೊಸದಾಗಿ ಲಿಂಕ್ ಮಾಡಬೇಕಿರುವ ಮೊಬೈಲ್ ಸಂಖ್ಯೆಯನ್ನು ನಮೂದಿಸಿ, ಆ ನಂಬರ್ಗೆ ಬರುವ ಒಟಿಪಿ (OTP) ಹಾಕಿ ದೃಢೀಕರಿಸಿ.
ಹಂತ 5 - ಕೊನೆಯದಾಗಿ, ಈ ಆನ್ಲೈನ್ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ₹75 ಪ್ರೊಸೆಸಿಂಗ್ ಶುಲ್ಕವನ್ನು (Processing Fee) ಆನ್ಲೈನ್ ಮೂಲಕವೇ ಪಾವತಿಸಿ.
ಕೇವಲ ಫೋನ್ ನಂಬರ್ ಮಾತ್ರವಲ್ಲ, 'ವಿಳಾಸ' ಕೂಡ ಬದಲಾಯಿಸಬಹುದು!
ಈ ಆ್ಯಪ್ನಲ್ಲಿ ಕೇವಲ ಮೊಬೈಲ್ ಸಂಖ್ಯೆ ಮಾತ್ರವಲ್ಲದೆ, ನಿಮ್ಮ ಆಧಾರ್ ಕಾರ್ಡ್ನಲ್ಲಿರುವ ವಿಳಾಸವನ್ನು (Address Update) ಕೂಡ ಸುಲಭವಾಗಿ ಬದಲಾಯಿಸಿಕೊಳ್ಳಬಹುದು. ಒಂದು ವೇಳೆ ನೀವು ಬಾಡಿಗೆ ಮನೆ ಬದಲಾಯಿಸಿದ್ದರೆ ಅಥವಾ ವಿಳಾಸ ತಿದ್ದುಪಡಿ ಮಾಡಬೇಕಿದ್ದರೆ, ಅದೇ "My Aadhaar Updates" ವಿಭಾಗದಲ್ಲಿರುವ 'Address Update' ಆಪ್ಷನ್ ಬಳಸಿ. ನಿಮ್ಮ ಹೊಸ ವಿಳಾಸಕ್ಕೆ ಸಾಕ್ಷಿಯಾಗಿ ವೋಟರ್ ಐಡಿ, ರೇಷನ್ ಕಾರ್ಡ್ ಅಥವಾ ಬ್ಯಾಂಕ್ ಪಾಸ್ಬುಕ್ ಅನ್ನು ಸ್ಕ್ಯಾನ್ ಮಾಡಿ ಅಪ್ಲೋಡ್ ಮಾಡುವ ಮೂಲಕ ಕೇವಲ ₹50 ರಿಂದ ₹75 ರ ನಾಮಮಾತ್ರ ಶುಲ್ಕದಲ್ಲಿ ವಿಳಾಸವನ್ನೂ ಅಪ್ಡೇಟ್ ಮಾಡಬಹುದು.
ಗಮನಿಸಬೇಕಾದ ಪ್ರಮುಖ ಅಂಶಗಳು
ಸಮಯ ಮಿತಿ - ನೀವು ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದ ನಂತರ, ನಿಮ್ಮ ಹೊಸ ಮೊಬೈಲ್ ಸಂಖ್ಯೆಯು ಆಧಾರ್ ಕಾರ್ಡ್ಗೆ ಅಪ್ಡೇಟ್ ಆಗಲು ಗರಿಷ್ಠ 30 ದಿನಗಳ ಸಮಯ ತೆಗೆದುಕೊಳ್ಳುತ್ತದೆ.
ಅಧಿಕೃತ ಶುಲ್ಕ - ಈ ಆನ್ಲೈನ್ ಸೇವೆಗೆ ಸರ್ಕಾರದಿಂದ ಅಧಿಕೃತವಾಗಿ ₹75 ಶುಲ್ಕ ನಿಗದಿಪಡಿಸಲಾಗಿದೆ.
ಮುಂಬರುವ ಫೀಚರ್ಸ್ - ಸದ್ಯಕ್ಕೆ ಆ್ಯಪ್ನಲ್ಲಿ ಮೊಬೈಲ್ ನಂಬರ್ ಮತ್ತು ವಿಳಾಸ ಅಪ್ಡೇಟ್ ಮಾತ್ರ ಸಕ್ರಿಯವಾಗಿದೆ. ಮುಂದಿನ ದಿನಗಳಲ್ಲಿ ಬರಲಿರುವ ಹೊಸ ಅಪ್ಡೇಟ್ನಲ್ಲಿ ಹೆಸರಿನ (Name) ಬದಲಾವಣೆಯ ಆಯ್ಕೆಗಳೂ ಪೂರ್ಣ ಪ್ರಮಾಣದಲ್ಲಿ ಲಭ್ಯವಾಗಲಿವೆ.
ಸೈಬರ್ ತಜ್ಞರ ಎಚ್ಚರಿಕೆ (Security Warning)
ಭಾರತ ಸರ್ಕಾರದ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರ (UIDAI) ಬಯೋಮೆಟ್ರಿಕ್ ಬದಲಿಗೆ ಫೇಸ್ ಅಥೆಂಟಿಕೇಶನ್ ತಂತ್ರಜ್ಞಾನ ಬಳಸಿ ಆ್ಯಪ್ ಮೂಲಕವೇ ಅಪ್ಡೇಟ್ ಮಾಡಲು ಅವಕಾಶ ನೀಡಿರುವುದು ನಿಜಕ್ಕೂ ಹೆಮ್ಮೆಯ ವಿಷಯ. ಆದರೆ ಇದರ ಜೊತೆಯಲ್ಲೇ ವಂಚನೆಗಳೂ ಹೆಚ್ಚಾಗುತ್ತಿವೆ.
ಆಧಾರ್ ಅಪ್ಡೇಟ್ ನೆಪದಲ್ಲಿ ಮಾರುಕಟ್ಟೆಯಲ್ಲಿ ಸಾಕಷ್ಟು ನಕಲಿ ಆ್ಯಪ್ಗಳು ಹಾಗೂ ಲಿಂಕ್ಗಳು ಹರಿದಾಡುತ್ತಿವೆ. ಆದ್ದರಿಂದ ದಯವಿಟ್ಟು ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಲಭ್ಯವಿರುವ ಅಧಿಕೃತ ಆ್ಯಪ್ ಅನ್ನು ಮಾತ್ರ ಬಳಸಿ. ವಾಟ್ಸಾಪ್ ಅಥವಾ ಟೆಲಿಗ್ರಾಮ್ನಲ್ಲಿ ಬರುವ ಯಾವುದೇ ಅಪರಿಚಿತ ಲಿಂಕ್ಗಳನ್ನು ಕ್ಲಿಕ್ ಮಾಡಿ ನಿಮ್ಮ ವೈಯಕ್ತಿಕ ಆಧಾರ್ ಮಾಹಿತಿಯನ್ನು ಹಂಚಿಕೊಳ್ಳಬೇಡಿ. ದೃಢೀಕೃತ ಆ್ಯಪ್ ಬಳಸಿ ಸುರಕ್ಷಿತವಾಗಿರಿ.
