ಜರ್ಮನಿ ಅಂದ್ರೆ ಕೇವಲ ಸುಂದರವಾದ ದೇಶ ಮಾತ್ರವಲ್ಲ, ಅದು ಅವಕಾಶಗಳ ಆಗರವೂ ಹೌದು. ನೀವೇನಾದರೂ ವಿದೇಶಕ್ಕೆ ಹೋಗಿ ಕೆಲಸ ಮಾಡಬೇಕು ಅನ್ನೋ ಕನಸು ಕಂಡಿದ್ರೆ, ಈಗ ಜರ್ಮನಿ ನಿಮಗೆ ರೆಡ್ ಕಾರ್ಪೆಟ್ ಸ್ವಾಗತ ಕೋರುತ್ತಿದೆ. ಯಾಕಂದ್ರೆ, ಅಲ್ಲಿ ಸದ್ಯದ ಪರಿಸ್ಥಿತಿಯಲ್ಲಿ ಕೆಲಸ ಮಾಡುವವರಿಗಿಂತ ಕೆಲಸಗಳೇ ಜಾಸ್ತಿ ಇವೆ!
ಜನಸಂಖ್ಯೆಯ ಬದಲಾವಣೆ ಮತ್ತು ಡಿಜಿಟಲ್ ಕ್ರಾಂತಿಯಿಂದಾಗಿ ಜರ್ಮನಿಯಲ್ಲಿ ಈಗ 3 ಪ್ರಮುಖ ಕ್ಷೇತ್ರಗಳಲ್ಲಿ ವಿಪರೀತ ಕೆಲಸಗಾರರ ಕೊರತೆ ಇದೆ.
1. ಆರೋಗ್ಯ ಕ್ಷೇತ್ರ (Health & Nursing) - ಎಲ್ಲಕ್ಕಿಂತ ಹೆಚ್ಚು ಡಿಮ್ಯಾಂಡ್!
ಜರ್ಮನಿಯಲ್ಲಿ ಸದ್ಯಕ್ಕೆ ನರ್ಸ್ಗಳು ಮತ್ತು ವೈದ್ಯರಿಗೆ ಇರುವ ಬೇಡಿಕೆ ಮತ್ಯಾರಿಗೂ ಇಲ್ಲ. ಅಲ್ಲಿನ ಜನಸಂಖ್ಯೆಯಲ್ಲಿ ಶೇ. 20 ಕ್ಕಿಂತ ಹೆಚ್ಚು ಜನರು 65 ವರ್ಷ ದಾಟಿದವರು. ಅಂದ್ರೆ, ವಯಸ್ಸಾದವರ ಸಂಖ್ಯೆ ಹೆಚ್ಚಿರುವುದರಿಂದ ಅವರಿಗೆ ಚಿಕಿತ್ಸೆ ಮತ್ತು ಆರೈಕೆ ನೀಡಲು ಸಿಬ್ಬಂದಿಯ ಅಗತ್ಯ ಬೆಟ್ಟದಷ್ಟಿದೆ.
ಯಾರಿಗೆಲ್ಲ ಅವಕಾಶ?: ನರ್ಸ್ಗಳು, ವೃದ್ಧಾಪ್ಯದ ಆರೈಕೆ ಮಾಡುವವರು, ಸಾಮಾನ್ಯ ವೈದ್ಯರು ಮತ್ತು ವೈದ್ಯಕೀಯ ತಂತ್ರಜ್ಞರಿಗೆ ಅಲ್ಲಿ ಫುಲ್ ಡಿಮ್ಯಾಂಡ್.
ಯಾಕೆ ಹೀಗೆ?: ಹಿರಿಯ ನಾಗರಿಕರ ಸಂಖ್ಯೆ ಹೆಚ್ಚುತ್ತಿರುವುದರಿಂದ ಆಸ್ಪತ್ರೆಗಳು ಮತ್ತು ಕೇರ್ ಸೆಂಟರ್ಗಳಲ್ಲಿ ಸಿಬ್ಬಂದಿಯ ಕೊರತೆ ಎದುರಾಗಿದೆ.
2. ಐಟಿ ಮತ್ತು ಸಾಫ್ಟ್ವೇರ್
ಜರ್ಮನಿ ಈಗ ವೇಗವಾಗಿ 'ಡಿಜಿಟಲ್ ಜರ್ಮನಿ'ಯಾಗಿ ಬದಲಾಗುತ್ತಿದೆ. ಬ್ಯಾಂಕಿಂಗ್ನಿಂದ ಹಿಡಿದು ಸರ್ಕಾರದ ಕೆಲಸದವರೆಗೂ ಎಲ್ಲವೂ ಆನ್ಲೈನ್ ಆಗುತ್ತಿರುವುದರಿಂದ ಟೆಕ್ಕಿಗಳಿಗೆ ಅಲ್ಲಿ ಭರ್ಜರಿ ಅವಕಾಶಗಳಿವೆ.
ಯಾರಿಗೆಲ್ಲ ಚಾನ್ಸ್? - ಪೈಥಾನ್, ಜಾವಾ ಅಥವಾ C# ಗೊತ್ತಿರುವ ಸಾಫ್ಟ್ವೇರ್ ಡೆವಲಪರ್ಗಳು, ಸೈಬರ್ ಸೆಕ್ಯುರಿಟಿ ಎಕ್ಸ್ಪರ್ಟ್ಗಳು, ಡೇಟಾ ಸೈನ್ಟಿಸ್ಟ್ಗಳು ಮತ್ತು ಎಐ (AI) ಪರಿಣಿತರಿಗೆ ಅಲ್ಲಿ ಲಕ್ಷ ಲಕ್ಷ ಸಂಬಳದ ಕೆಲಸಗಳಿವೆ.
ಯಾಕೆ ಹೀಗೆ? - ಅಲ್ಲಿನ ದೊಡ್ಡ ದೊಡ್ಡ ಆಟೋಮೊಬೈಲ್ ಮತ್ತು ಬ್ಯಾಂಕಿಂಗ್ ಕಂಪನಿಗಳು ಸಂಪೂರ್ಣ ಡಿಜಿಟಲ್ ರೂಪ ಪಡೆಯುತ್ತಿವೆ, ಹಾಗಾಗಿ ಬುದ್ಧಿವಂತ ಟೆಕ್ಕಿಗಳ ಅಗತ್ಯ ತುಂಬಾ ಇದೆ.
3. ಎಂಜಿನಿಯರಿಂಗ್
ಜರ್ಮನಿ ಅಂದ್ರೆ ಎಂಜಿನಿಯರಿಂಗ್ಗೆ ಹೆಸರುವಾಸಿ. ಕಾರ್ ತಯಾರಿಕೆ ಇರಲಿ ಅಥವಾ ದೊಡ್ಡ ದೊಡ್ಡ ಕಟ್ಟಡಗಳಿರಲಿ, ಅಲ್ಲಿ ಎಂಜಿನಿಯರ್ಗಳಿಲ್ಲದೆ ಒಂದು ದಿನವೂ ನಡೆಯಲ್ಲ.
ಯಾರಿಗೆಲ್ಲ ಡಿಮ್ಯಾಂಡ್? - ಮೆಕ್ಯಾನಿಕಲ್, ಎಲೆಕ್ಟ್ರಿಕಲ್, ಸಿವಿಲ್ ಮತ್ತು ಮೆಕಟ್ರಾನಿಕ್ಸ್ ಎಂಜಿನಿಯರ್ಗಳಿಗೆ ಜರ್ಮನಿ ಅಚ್ಚುಮೆಚ್ಚಿನ ತಾಣ.
ಯಾಕೆ ಹೀಗೆ? - ಜರ್ಮನಿ ಪ್ರಪಂಚದ ವಾಹನ ತಯಾರಿಕೆಯ ಶಕ್ತಿ ಕೇಂದ್ರ. ಇದರ ಜೊತೆಗೆ ಅಲ್ಲಿ ಪರಿಸರ ಸ್ನೇಹಿ ಅಂದ್ರೆ ಸೋಲಾರ್ ಮತ್ತು ನವೀಕರಿಸಬಹುದಾದ ಇಂಧನ ಪ್ರಾಜೆಕ್ಟ್ಗಳು ಹೆಚ್ಚಾಗಿ ನಡೆಯುತ್ತಿವೆ. ಈ ಕಾರಣಕ್ಕೆ ಎಂಜಿನಿಯರ್ಗಳ ಬೇಡಿಕೆ ಕುಗ್ಗಿಲ್ಲ.
ಇತರ ಯಾವ ಕೆಲಸಗಳಿಗೆ ಅವಕಾಶವಿದೆ?
ಈ ಮೂರು ಪ್ರಮುಖ ಕ್ಷೇತ್ರಗಳ ಜೊತೆಗೆ ಜರ್ಮನಿಯಲ್ಲಿ ಇನ್ನೂ ಕೆಲವು ಕೆಲಸಗಳಿಗೆ ವಿಪರೀತ ಬೇಡಿಕೆಯಿದೆ
ಲಾಜಿಸ್ಟಿಕ್ಸ್ - ಲಾರಿ ಚಾಲಕರು ಮತ್ತು ಸಾಮಾನು ಸಾಗಣೆ ಮಾಡುವ ಕಂಪನಿಗಳಿಗೆ ಸಿಬ್ಬಂದಿ ಬೇಕು.
ಶಿಕ್ಷಣ - ಶಿಕ್ಷಕರು ಮತ್ತು ಮಕ್ಕಳನ್ನು ನೋಡಿಕೊಳ್ಳುವ (Childcare) ಸಿಬ್ಬಂದಿಯ ಅಗತ್ಯವಿದೆ.
ಗ್ರೀನ್ ಎನರ್ಜಿ - ಪರಿಸರ ತಂತ್ರಜ್ಞಾನ ಮತ್ತು ಸೋಲಾರ್ ಕ್ಷೇತ್ರದಲ್ಲಿ ಕೆಲಸ ಮಾಡುವವರಿಗೂ ಒಳ್ಳೆ ಸ್ಕೋಪ್ ಇದೆ.
