ಕರೋನಾ, ಜಿಕಾ, ಎಬೋಲಾ ವೈರಸ್ಗಳ ಬೆನ್ನಲ್ಲೇ ಈಗ ಮತ್ತೊಂದು ವೈರಸ್ ಇಡೀ ವಿಶ್ವದ ವಿಜ್ಞಾನಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಅದೇ ಹ್ಯಾಂಟವೈರಸ್ (Hantavirus). ಇಲಿಗಳಿಂದ ಹರಡುವ ಈ ಅಪಾಯಕಾರಿ ಕಾಯಿಲೆಯ ಬಗ್ಗೆ ಇತ್ತೀಚೆಗೆ ನಡೆದಿರುವ ಹೊಸ ಸಂಶೋಧನೆಯೊಂದು ಇಡೀ ವೈದ್ಯಕೀಯ ಲೋಕವೇ ಬೆಚ್ಚಿಬೀಳುವಂತಹ ಶಾಕಿಂಗ್ ಸತ್ಯವೊಂದನ್ನು ಹೊರಹಾಕಿದೆ!
ಅದೇನಪ್ಪಾ ಅಂದ್ರೆ, ಈ ಹ್ಯಾಂಟವೈರಸ್ ಸೋಂಕಿಗೆ ಒಳಗಾದ ವ್ಯಕ್ತಿ ಕಾಯಿಲೆಯಿಂದ ಸಂಪೂರ್ಣವಾಗಿ ಗುಣಮುಖನಾದ ಮೇಲೂ, ಆತನ ದೇಹದಿಂದ ವೈರಸ್ ಪೂರ್ತಿಯಾಗಿ ಮಾಯವಾಗುವುದಿಲ್ಲ! ರೋಗಿಯ ರಕ್ತ, ಮೂತ್ರ ಮತ್ತು ಉಸಿರಾಟದ ಪ್ರದೇಶದಿಂದ ವೈರಸ್ ಕಣ್ಮರೆಯಾದರೂ, ಪುರುಷರ ವೀರ್ಯದಲ್ಲಿ (Semen) ಬರೋಬ್ಬರಿ 6 ವರ್ಷಗಳ ಕಾಲ ಈ ವೈರಸ್ನ ಆನುವಂಶಿಕ ಕುರುಹುಗಳು ಜೀವಂತವಾಗಿ ಇರುತ್ತವೆ ಎಂದು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ಏನಿದು ಹೊಸ ರಿಸರ್ಚ್? ಇದರ ಲಕ್ಷಣಗಳೇನು? ಇಲ್ಲಿದೆ ಕಂಪ್ಲೀಟ್ ರಿಪೋರ್ಟ್.
ಸಂಶೋಧನೆಯ ಪ್ರಮುಖ ಮುಖ್ಯಾಂಶಗಳು (Highlights):
ಇಲಿಗಳಿಂದ ಹರಡುವ ರೋಗ - ಹ್ಯಾಂಟವೈರಸ್ ಪ್ರಮುಖವಾಗಿ ಇಲಿಗಳ ಮೂತ್ರ, ಮಲ ಅಥವಾ ಲಾಲಾರಸದ ಸಂಪರ್ಕದಿಂದ ಮನುಷ್ಯರಿಗೆ ಹರಡುತ್ತದೆ.
ವೀರ್ಯದಲ್ಲಿ 6 ವರ್ಷ ವಾಸ - ಸೋಂಕು ಬಂದು ಐದು ವರ್ಷ 11 ತಿಂಗಳು ಕಳೆದರೂ ಪುರುಷರ ಸಂತಾನೋತ್ಪತ್ತಿ ಅಂಗಾಂಶದಲ್ಲಿ ವೈರಲ್ ಆರ್ಎನ್ಎ (Viral RNA) ಪತ್ತೆಯಾಗಿದೆ.
ಲೈಂಗಿಕ ಪ್ರಸರಣದ ಆತಂಕ - ರೋಗ ವಾಸಿಯಾದ ಮೇಲೂ ಇದು ಲೈಂಗಿಕವಾಗಿ ಒಬ್ಬರಿಂದ ಮತ್ತೊಬ್ಬರಿಗೆ ಹರಡಬಹುದೇ? ಅನ್ನೋ ಹೊಸ ಪ್ರಶ್ನೆ ಈಗ ಕಾಡತೊಡಗಿದೆ.
ಹ್ಯಾಂಟವೈರಸ್ ಅಂದ್ರೆ ಏನು? ಇದರ ಲಕ್ಷಣಗಳೇನು?
ಹ್ಯಾಂಟವೈರಸ್ ಇಲಿಗಳ ಹಿಕ್ಕೆಗಳಿಂದ ಒಣಗಿದ ಧೂಳಿನ ಕಣಗಳನ್ನು ಮನುಷ್ಯರು ಉಸಿರಾಡುವುದರಿಂದ ದೇಹವನ್ನು ಸೇರುತ್ತದೆ. ಇದು ಒಮ್ಮೆ ಶ್ವಾಸಕೋಶವನ್ನು ತಲುಪಿದರೆ ಸಾಕು, ಪರಿಸ್ಥಿತಿ ತೀವ್ರವಾಗಿ ಹದಗೆಡುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ 'ಹ್ಯಾಂಟವೈರಸ್ ಪಲ್ಮನರಿ ಸಿಂಡ್ರೋಮ್' (HPS) ಎಂದು ಕರೆಯಲಾಗುತ್ತದೆ.
ಸಾಮಾನ್ಯ ಜ್ವರದಂತೆಯೇ ಇದರ ಲಕ್ಷಣಗಳು ಶುರುವಾಗುತ್ತವೆ. ತೀವ್ರ ಜ್ವರ, ಸ್ನಾಯು ನೋವು, ವಿಪರೀತ ಸುಸ್ತು, ವಾಕರಿಕೆ ಮತ್ತು ತಲೆನೋವು ಇದರ ಆರಂಭಿಕ ಲಕ್ಷಣಗಳು. ಪರಿಸ್ಥಿತಿ ಗಂಭೀರವಾದರೆ ಉಸಿರಾಟದ ತೊಂದರೆ ಕಾಣಿಸಿಕೊಂಡು ಶ್ವಾಸಕೋಶವೇ ವೈಫಲ್ಯ (Lung Failure) ಆಗುವ ಅಪಾಯವಿರುತ್ತದೆ. ಸಾಮಾನ್ಯವಾಗಿ ಈ ವೈರಸ್ ಒಬ್ಬರಿಂದ ಒಬ್ಬರಿಗೆ ಹರಡುವುದಿಲ್ಲ. ಆದರೆ ಚಿಲಿ ಮತ್ತು ಅರ್ಜೆಂಟೀನಾದಲ್ಲಿ ಕಂಡುಬರುವ 'ಆಂಡಿಸ್ ವೈರಸ್' (Andes Virus) ಎಂಬ ಅಪರೂಪದ ತಳಿ ಮಾತ್ರ ಕುಟುಂಬದ ನಿಕಟ ಸಂಪರ್ಕಗಳ ನಡುವೆ ಬೇಗನೆ ಹರಡುತ್ತದೆ.
ಗ್ರಹಿಕೆಯನ್ನು ಬದಲಾಯಿಸಿದ ಸ್ವಿಟ್ಜರ್ಲೆಂಡ್ ಅಧ್ಯಯನ!
ಜೈವಿಕ ಬೆದರಿಕೆಗಳ ಬಗ್ಗೆ ಸಂಶೋಧನೆ ನಡೆಸುವ ಸ್ವಿಟ್ಜರ್ಲೆಂಡ್ನ ಪ್ರಸಿದ್ಧ 'ಸ್ಪೀಜ್ ಪ್ರಯೋಗಾಲಯ'ದ (Spiez Laboratory) ವಿಜ್ಞಾನಿಗಳು ಇತ್ತೀಚೆಗೆ ಪೀರ್-ರಿವ್ಯೂಡ್ ಅಧ್ಯಯನವೊಂದನ್ನು ಪ್ರಕಟಿಸಿದ್ದಾರೆ. ಅವರು ದಕ್ಷಿಣ ಅಮೆರಿಕಾದಲ್ಲಿ ಹ್ಯಾಂಟವೈರಸ್ ಸೋಂಕಿಗೆ ಒಳಗಾಗಿದ್ದ 55 ವರ್ಷದ ವ್ಯಕ್ತಿಯೊಬ್ಬನನ್ನು ಸುದೀರ್ಘವಾಗಿ ಟ್ರ್ಯಾಕ್ ಮಾಡಿದ್ದರು.
ಅವರು ಚೇತರಿಸಿಕೊಂಡಾಗ ರಕ್ತ ಮತ್ತು ಮೂತ್ರದಲ್ಲಿ ವೈರಸ್ ಇರಲಿಲ್ಲ. ಆದರೆ, ಸೋಂಕು ತಗುಲಿ ಬರೋಬ್ಬರಿ 5 ವರ್ಷ 11 ತಿಂಗಳು ಕಳೆದ ನಂತರವೂ ಆತನ ವೀರ್ಯವನ್ನು ಪರೀಕ್ಷಿಸಿದಾಗ ಅದರಲ್ಲಿ ಹ್ಯಾಂಟವೈರಸ್ನ ಆನುವಂಶಿಕ ವಸ್ತು (Genetic Material) ಪತ್ತೆಯಾಗಿದೆ! ಇದು ವಿಜ್ಞಾನಿಗಳನ್ನು ಆಶ್ಚರ್ಯಚಕಿತರನ್ನಾಗಿಸಿದೆ.
ಗುಣಮುಖರಾದ ಮೇಲೂ ಲೈಂಗಿಕವಾಗಿ ಹರಡುತ್ತಾ?
ಪುರುಷರ ವೃಷಣಗಳು (Testes) ದೇಹದಲ್ಲಿ "ರೋಗನಿರೋಧಕ-ಸವಲತ್ತು" (Immune-privileged) ಹೊಂದಿರುವ ಜಾಗಗಳಾಗಿವೆ. ಅಂದರೆ ಇಲ್ಲಿ ದೇಹದ ರೋಗನಿರೋಧಕ ಶಕ್ತಿ ತಲುಪುವುದು ಕಷ್ಟ. ಹಾಗಾಗಿ ಕೆಲವು ವೈರಸ್ಗಳು ದೇಹದ ರಕ್ಷಣಾ ವ್ಯವಸ್ಥೆಯಿಂದ ತಪ್ಪಿಸಿಕೊಂಡು ಇಲ್ಲಿ ದೀರ್ಘಕಾಲ ಅಡಗಿಕೊಳ್ಳುತ್ತವೆ. ಹಿಂದೆ ಎಬೋಲಾ ಮತ್ತು ಜಿಕಾ ವೈರಸ್ ವಿಷಯದಲ್ಲೂ ಹೀಗೆಯೇ ಆಗಿತ್ತು.
ತಜ್ಞರ ಎಚ್ಚರಿಕೆ: ವೀರ್ಯದಲ್ಲಿ ವೈರಲ್ ಆರ್ಎನ್ಎ ಪತ್ತೆಯಾಗಿದೆ ಎಂದರೆ ಅದು ತಕ್ಷಣವೇ ಮತ್ತೊಬ್ಬರಿಗೆ ಸಾಂಕ್ರಾಮಿಕವಾಗಿ ಹರಡುತ್ತದೆ ಎಂದರ್ಥವಲ್ಲ. ಸದ್ಯಕ್ಕೆ ಹ್ಯಾಂಟವೈರಸ್ ಲೈಂಗಿಕವಾಗಿ ಹರಡಿರುವ ಯಾವುದೇ ಅಧಿಕೃತ ಪ್ರಕರಣಗಳು ದಾಖಲಾಗಿಲ್ಲ. ಆದರೆ, ಜನರ ನಡುವೆ ಸುಲಭವಾಗಿ ಹರಡುವ 'ಆಂಡಿಸ್ ತಳಿ'ಯ ಇತಿಹಾಸ ನೋಡಿರುವ ವಿಜ್ಞಾನಿಗಳು, ಭವಿಷ್ಯದಲ್ಲಿ ಇದು ಲೈಂಗಿಕವಾಗಿ ಹರಡುವ ಸಾಧ್ಯತೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕುತ್ತಿಲ್ಲ. ಈ ಬಗ್ಗೆ ಇನ್ನು ಹೆಚ್ಚಿನ ಸಂಶೋಧನೆಗಳು ನಡೆಯಬೇಕಿದೆ.
