ಮಳೆಗಾಲದ ಸಂಜೆ ಆಗಲಿ, ಚಳಿಗಾಲದ ವಾತಾವರಣವಾಗಲಿ ಅಥವಾ ಮನೆಗೆ ಅತಿಥಿಗಳು ದಿಢೀರ್ ಬಂದಾಗಲಿ – ಪಕೋಡ ಎಂದರೆ ಎಲ್ಲರಿಗೂ ಇಷ್ಟವಾದ ಸ್ನ್ಯಾಕ್. ಆದರೆ ಮನೆಯಲ್ಲೇ ತಯಾರಿಸಿದ ಪಕೋಡಗಳು ಕೆಲವೇ ನಿಮಿಷಗಳಲ್ಲಿ ಮೆತ್ತಗಾಗುವುದು ಸಾಮಾನ್ಯ ಸಮಸ್ಯೆ. ಹೋಟೆಲ್ನಲ್ಲಿ ಸಿಗುವಂತ ಗರಿಗರಿಯಾದ ಪಕೋಡ ಮನೆದಲ್ಲಿ ಯಾಕೆ ಬರೋದಿಲ್ಲ ಎಂದು ಹಲವರು ಯೋಚಿಸುತ್ತಾರೆ. ಇದರ ಹಿಂದೆ ಕೆಲವು ಸಣ್ಣ ಕಾರಣಗಳಿವೆ. ಅದಕ್ಕೆ ಸರಳ ಪರಿಹಾರವೂ ಇದೆ.
ಸಾಮಾನ್ಯವಾಗಿ ಪಕೋಡ ಹಿಟ್ಟನ್ನು ಕಡಲೆಹಿಟ್ಟು ಮತ್ತು ನೀರಿನಿಂದ ಮಾತ್ರ ತಯಾರಿಸಲಾಗುತ್ತದೆ. ಆದರೆ ಈ ಮಿಶ್ರಣದಲ್ಲಿ ತೇವಾಂಶ ಹೆಚ್ಚು ಇರುತ್ತದೆ. ಕರಿದ ನಂತರ ಪಕೋಡಗಳು ಗಾಳಿಯಲ್ಲಿರುವ ತೇವಾಂಶವನ್ನು ಹೀರಿಕೊಂಡು ಕುರುಕುಲನ್ನು ಕಳೆದುಕೊಳ್ಳುತ್ತವೆ. ಕಡಲೆಹಿಟ್ಟಿನಲ್ಲಿರುವ ಪ್ರೋಟೀನ್ ಪ್ರಮಾಣ ಹೆಚ್ಚಿರುವುದರಿಂದ ಅದು ತಣ್ಣಗಾದ ಮೇಲೆ ಸ್ವಲ್ಪ ಸಾಫ್ಟ್ ಆಗುತ್ತದೆ. ಅದರಿಂದಲೇ ಪಕೋಡಗಳು ಬೇಗ ಮೆತ್ತಗಾಗುತ್ತವೆ.
ಇದಕ್ಕೆ ಸುಲಭ ಪರಿಹಾರವೆಂದರೆ ಕಡಲೆಹಿಟ್ಟಿನ ಜೊತೆ 1 ಅಥವಾ 2 ಚಮಚ ಕಾರ್ನ್ಫ್ಲೋರ್ ಬೆರೆಸುವುದು. ಕಾರ್ನ್ಫ್ಲೋರ್ನಲ್ಲಿ ಸ್ಟಾರ್ಚ್ ಪ್ರಮಾಣ ಹೆಚ್ಚು. ಇದು ಎಣ್ಣೆಯಲ್ಲಿ ಕರಿಯುವಾಗ ಹೊರಭಾಗವನ್ನು ಗಟ್ಟಿಯಾಗಿ ಮತ್ತು ಕ್ರಿಸ್ಪಿಯಾಗಿ ಮಾಡುತ್ತದೆ. ಹೆಚ್ಚಿನ ತಾಪಮಾನದಲ್ಲಿ ಸ್ಟಾರ್ಚ್ ಬೇಗ ಒಣಗಿ ಗರಿಗರಿಯಾದ ಪದರ ಸೃಷ್ಟಿಸುತ್ತದೆ. ಇದರ ಫಲವಾಗಿ ಪಕೋಡಗಳು ಹೆಚ್ಚು ಹೊತ್ತು ಕರಕರೆ ಆಗಿಯೇ ಇರುತ್ತವೆ.
ಪರ್ಫೆಕ್ಟ್ ಕ್ರಿಸ್ಪಿ ಪಕೋಡ ತಯಾರಿಸಲು ಮೊದಲಿಗೆ ಒಂದು ಪಾತ್ರೆಯಲ್ಲಿ ಕಡಲೆಹಿಟ್ಟು ಮತ್ತು ಕಾರ್ನ್ಫ್ಲೋರ್ ಸೇರಿಸಿ. ಅದಕ್ಕೆ ಉಪ್ಪು, ಮೆಣಸಿನ ಪುಡಿ, ಜೀರಿಗೆ ಅಥವಾ ನಿಮಗೆ ಇಷ್ಟವಾದ ಮಸಾಲೆಗಳನ್ನು ಹಾಕಿ. ನಂತರ ಸ್ವಲ್ಪ ಸ್ವಲ್ಪ ನೀರು ಸೇರಿಸುತ್ತಾ ಗಟ್ಟಿಯಾದ ಹಿಟ್ಟು ತಯಾರಿಸಬೇಕು. ಹಿಟ್ಟು ತುಂಬಾ ತೆಳುವಾಗಿರಬಾರದು, ಅತಿ ಗಟ್ಟಿಯಾಗಿಯೂ ಇರಬಾರದು. ಸರಿಯಾದ ಗಟ್ಟಿತನ ಇರಬೇಕು.
ಕಡಾಯಿಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿ. ಎಣ್ಣೆ ಸರಿಯಾಗಿ ಬಿಸಿಯಾಗಿರಬೇಕು. ಎಣ್ಣೆ ಸಾಕಷ್ಟು ಕಾಯದಿದ್ದರೆ ಪಕೋಡಗಳು ಎಣ್ಣೆಯನ್ನು ಹೆಚ್ಚು ಹೀರಿಕೊಳ್ಳುತ್ತವೆ ಮತ್ತು ಮೆತ್ತಗಾಗುತ್ತವೆ. ಪಕೋಡಗಳನ್ನು ಯಾವಾಗಲೂ ಮಧ್ಯಮ ಉರಿಯಲ್ಲಿ ಕರಿಯಿರಿ. ಅತಿ ಹೆಚ್ಚು ಉರಿಯಲ್ಲಿ ಕರಿದರೆ ಹೊರಗೆ ಬೇಗ ಬ್ರೌನ್ ಆಗಿ ಒಳಗೆ ಹಸಿ ಉಳಿಯಬಹುದು. ಮಧ್ಯಮ ಉರಿಯಲ್ಲಿ ಹೊಂಬಣ್ಣ ಬರುವವರೆಗೆ ಕರಿದರೆ ಉತ್ತಮ ಫಲಿತಾಂಶ ಸಿಗುತ್ತದೆ.
ಇನ್ನೊಂದು ಉಪಾಯವೆಂದರೆ ಒಂದು ಚಿಟಿಕೆ ಅಡುಗೆ ಸೋಡಾ ಹಾಕುವುದು. ಇದರಿಂದ ಪಕೋಡಗಳು ಸ್ವಲ್ಪ ಉಬ್ಬಿ ಹಗುರವಾಗುತ್ತವೆ. ಆದರೆ ಅತಿ ಹೆಚ್ಚು ಹಾಕಿದರೆ ರುಚಿ ಬದಲಾಗಬಹುದು, ಆದ್ದರಿಂದ ಪ್ರಮಾಣ ಕಡಿಮೆ ಇರಲಿ.
ಹೆಚ್ಚು ಕ್ರಂಚ್ ಬೇಕಾದರೆ ಡಬಲ್ ಫ್ರೈ ವಿಧಾನ ಬಳಸಬಹುದು. ಮೊದಲಿಗೆ ಪಕೋಡಗಳನ್ನು ಲೈಟಾಗಿ ಕರಿಯಿರಿ. ನಂತರ ಸರ್ವ್ ಮಾಡುವ ಮುನ್ನ ಮತ್ತೆ 1-2 ನಿಮಿಷ ಬಿಸಿ ಎಣ್ಣೆಯಲ್ಲಿ ಹಾಕಿ ಕರಿಯಿರಿ. ಇದರಿಂದ ಪಕೋಡಗಳು ಇನ್ನೂ ಗರಿಗರಿಯಾಗುತ್ತವೆ.
ಈ ಪಕೋಡಗಳ ಜೊತೆ ಸಿಂಪಲ್ ಟೊಮೆಟೊ ಚಟ್ನಿ ಮಾಡಿದರೆ ರುಚಿ ಇನ್ನಷ್ಟು ಹೆಚ್ಚುತ್ತದೆ. ಟೊಮೆಟೊ, ಬೆಳ್ಳುಳ್ಳಿ ಮತ್ತು ಹಸಿಮೆಣಸಿನಕಾಯಿ ನೇರವಾಗಿ ಉರಿಯಲ್ಲಿ ಸುಟ್ಟುಕೊಂಡು, ಸಿಪ್ಪೆ ತೆಗೆಯಿರಿ. ನಂತರ ಅವನ್ನು ಮಿಕ್ಸರ್ನಲ್ಲಿ ತರಿತರಿಯಾಗಿ ರುಬ್ಬಿ. ಬೇಕಾದರೆ ಒರಳುಗಲ್ಲಿನ ಮೇಲೆ ರುಬ್ಬಿದರೆ ರುಚಿ ಇನ್ನೂ ಚೆನ್ನಾಗಿರುತ್ತದೆ.
