Sunday, Nov 22, 2026
|
Advertisement

ಹಂಪಿ ಉತ್ಸವಕ್ಕೆ ಸರ್ಕಾರದ ನಿರ್ಲಕ್ಷ್ಯ? ಸಿದ್ದರಾಮಯ್ಯ ಕೊಟ್ಟ ಮಾತು ಏನಾಯ್ತು !!

ಕಾಂಗ್ರೆಸ್ ಸರ್ಕಾರವು  ಎಲ್ಲ ಐತಿಹಾಸಿಕ ಹಬ್ಬಗಳಿಗೂ ಹೆಚ್ಚು ಪ್ರಾಮುಖ್ಯತೆ ಕೊಟ್ಟು ವಿಜೃಂಣೆಯಿಂದ ತಯಾರಿ ನಡೆಸಿ ಕಾರ್ಯಕ್ರಮವನ್ನು ನಡೆಸಿಕೊಡುವ ಸರ್ಕಾರವು  ವಿಶ್ವಪ್ರಸಿದ್ಧ ಐತಿಹಾಸಿಕ ತಾಣವಾಗಿರುವ  ಹಂಪಿಯಲ್ಲಿ ನಡೆಯುವ ಹಂಪಿ ಉತ್ಸವದ ದಿನಾಂಕ ಇನ್ನೂ ಘೋಷಣೆಯಾಗದಿರುವುದು ಸ್ಥಳೀಯರು, ಕಲಾವಿದರು ಹಾಗೂ ಸಾಂಸ್ಕೃತಿಕ ಅಭಿಮಾನಿಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಪ್ರತಿವರ್ಷ ನವೆಂಬರ್ ತಿಂಗಳಿನಲ್ಲಿ ಉತ್ಸವ ನಡೆಸುವುದಾಗಿ ಸರ್ಕಾರ ಭರವಸೆ ನೀಡಿದ್ದರೂ, ಈ ಬಾರಿ ನವೆಂಬರ್ ತಿಂಗಳು ಸಮೀಪಿಸುತ್ತಿದ್ದಂತೆ ಉತ್ಸವದ ಸಿದ್ಧತೆಗಳು ಕಾಣಿಸದಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಹಂಪಿ ಉತ್ಸವ | Photo Credit: https://www.facebook.com/Siddaramaiah.Official
ಹಂಪಿ ಉತ್ಸವ | Photo Credit: https://www.facebook.com/Siddaramaiah.Official

ಕಳೆದ ಬಾರಿ ಹಂಪಿ ಉತ್ಸವದ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು, ಇನ್ನು ಮುಂದೆ ಪ್ರತಿವರ್ಷ ನವೆಂಬರ್ ತಿಂಗಳಿನಲ್ಲಿಯೇ ಉತ್ಸವ ನಡೆಸುವುದಾಗಿ ಘೋಷಿಸಿದ್ದರು. ನವೆಂಬರ್ 3, 4 ಮತ್ತು 5ರಂದು ಉತ್ಸವ ನಡೆಸುವ ಕುರಿತು ಭರವಸೆ ನೀಡಲಾಗಿತ್ತು. ಇದರಿಂದ ಸ್ಥಳೀಯ ಕಲಾವಿದರು, ಪ್ರವಾಸೋದ್ಯಮಕ್ಕೆ ಸಂಬಂಧಿಸಿದವರು ಹಾಗೂ ಸಾರ್ವಜನಿಕರಲ್ಲಿ ಹೆಚ್ಚಿನ ನಿರೀಕ್ಷೆ ಮೂಡಿತ್ತು. ಆದರೆ, ಈ ಬಾರಿ ನವೆಂಬರ್ ತಿಂಗಳು ಬಂದರೂ ಅಧಿಕೃತ ದಿನಾಂಕ ಪ್ರಕಟವಾಗದಿರುವುದು ಅಸಮಾಧಾನಕ್ಕೆ ಕಾರಣವಾಗಿದೆ.

Advertisement

1. ಕಳೆದ ಉತ್ಸವದಲ್ಲೇ ನವೆಂಬರ್ ಭರವಸೆ ನೀಡಲಾಗಿತ್ತು

2026ರ ಫೆಬ್ರವರಿ 13ರಿಂದ 15ರವರೆಗೆ ಹಂಪಿ ಉತ್ಸವ ನಡೆದಿತ್ತು. ಈ ಸಂದರ್ಭದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು, ಹಂಪಿ ಉತ್ಸವವನ್ನು ಇನ್ನು ಮುಂದೆ ಪ್ರತಿವರ್ಷ ನವೆಂಬರ್ 2, 3 ಮತ್ತು 4ರಂದು ನಡೆಸುವುದಾಗಿ ಘೋಷಿಸಿದ್ದರು. ಫೆಬ್ರವರಿಯಲ್ಲಿ ವಿದ್ಯಾರ್ಥಿಗಳಿಗೆ ಪರೀಕ್ಷೆಗಳಿರುವುದರಿಂದ ನವೆಂಬರ್ ತಿಂಗಳು ಹೆಚ್ಚು ಸೂಕ್ತವಾಗಲಿದೆ ಎಂಬ ಅಭಿಪ್ರಾಯವೂ ಈ ದಿನಾಂಕ ಬದಲಾವಣೆಗೆ ಕಾರಣವಾಗಿತ್ತು. 

ಆದರೆ ಈಗ ನವೆಂಬರ್ ತಿಂಗಳಲ್ಲಿಯೇ ಉತ್ಸವ ನಡೆಸುವ ಭರವಸೆ ಈಡೇರಿಲ್ಲ ಎಂಬ ಆರೋಪ ಕೇಳಿಬಂದಿದ್ದು, ಸರ್ಕಾರದ ಘೋಷಣೆ ಮತ್ತು ವಾಸ್ತವದ ನಡುವಿನ ವ್ಯತ್ಯಾಸವನ್ನು ಸ್ಥಳೀಯರು ಪ್ರಶ್ನಿಸುತ್ತಿದ್ದಾರೆ.

2. ಉತ್ಸವಕ್ಕೆ ಕನಿಷ್ಠ ಎರಡು ತಿಂಗಳ ಸಿದ್ಧತೆ ಅಗತ್ಯ

ಹಂಪಿ ಉತ್ಸವ ಸಾಮಾನ್ಯ ಕಾರ್ಯಕ್ರಮವಲ್ಲ. ದೇಶದ ವಿವಿಧ ಭಾಗಗಳಿಂದ ಕಲಾವಿದರನ್ನು ಆಹ್ವಾನಿಸುವುದು, ವೇದಿಕೆಗಳನ್ನು ನಿರ್ಮಿಸುವುದು, ಧ್ವನಿ ಮತ್ತು ಬೆಳಕಿನ ವ್ಯವಸ್ಥೆ, ಸ್ಮಾರಕಗಳ ಸುತ್ತಲಿನ ವಿದ್ಯುತ್ ದೀಪಾಲಂಕಾರ, ಪ್ರವಾಸಿಗರಿಗಾಗಿ ಸಾರಿಗೆ ಮತ್ತು ಮೂಲಸೌಕರ್ಯ ವ್ಯವಸ್ಥೆ ಸೇರಿದಂತೆ ಹಲವು ಕೆಲಸಗಳನ್ನು ಮುಂಚಿತವಾಗಿ ಯೋಜಿಸಬೇಕಾಗುತ್ತದೆ.

ಅಂತಾರಾಷ್ಟ್ರೀಯ ಕಲಾವಿದರನ್ನು ಆಹ್ವಾನಿಸುವುದು, ಹಂಪಿ ಬೈ ಸ್ಕೈ ಕಾರ್ಯಕ್ರಮ, ಸಾಹಿತ್ಯ ಗೋಷ್ಠಿಗಳು, ಜಾನಪದ ಪ್ರದರ್ಶನಗಳು ಸೇರಿದಂತೆ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲು ಕನಿಷ್ಠ ಎರಡು ತಿಂಗಳ ಮುಂಚಿತ ಸಿದ್ಧತೆ ಅಗತ್ಯ ಎಂದು ಅಧಿಕಾರಿಗಳ ಅಭಿಪ್ರಾಯ ವರದಿಯಾಗಿದೆ. ದಿನಾಂಕ ಪ್ರಕಟಣೆಯ ವಿಳಂಬದಿಂದ ಈ ಸಿದ್ಧತೆಗಳು ಅಸ್ತವ್ಯಸ್ತವಾಗುವ ಆತಂಕ ಎದುರಾಗಿದೆ. 

Advertisement

3. ಸ್ಥಳೀಯ ಕಲಾವಿದರಿಗೆ ನಷ್ಟವಾಗುವ ಆತಂಕ

ಹಂಪಿ ಉತ್ಸವದಲ್ಲಿ ಜಾನಪದ ಕಲಾವಿದರು, ಸಂಗೀತಗಾರರು, ನೃತ್ಯ ಕಲಾವಿದರು ಹಾಗೂ ವಿವಿಧ ಸಾಂಸ್ಕೃತಿಕ ತಂಡಗಳಿಗೆ ವೇದಿಕೆ ದೊರೆಯುತ್ತದೆ. ಇಂತಹ ಉತ್ಸವಗಳು ಸ್ಥಳೀಯ ಕಲಾವಿದರಿಗೆ ತಮ್ಮ ಪ್ರತಿಭೆ ಪ್ರದರ್ಶಿಸಲು ಮತ್ತು ಆದಾಯ ಗಳಿಸಲು ಅವಕಾಶ ಕಲ್ಪಿಸುತ್ತವೆ.

ಉತ್ಸವವನ್ನು ಕೊನೆಯ ಕ್ಷಣದಲ್ಲಿ ನಡೆಸಿದರೆ ಕಲಾವಿದರ ಆಯ್ಕೆ, ಕಾರ್ಯಕ್ರಮದ ಸಿದ್ಧತೆ ಹಾಗೂ ಸಂಭಾವನೆ ವಿಚಾರದಲ್ಲಿ ಗೊಂದಲ ಉಂಟಾಗಬಹುದು. ಹಿರಿಯ ಜಾನಪದ ಕಲಾವಿದೆ ಮಂಜಮ್ಮ ಜೋಗತಿ ಅವರು, ಉತ್ಸವವನ್ನು ತರಾತುರಿಯಲ್ಲಿ ನಡೆಸದೆ ಕಲಾವಿದರಿಗೆ ಗೌರವ ಸಿಗುವಂತೆ ಯೋಜಿತವಾಗಿ ಆಯೋಜಿಸಬೇಕು ಎಂಬ ಒತ್ತಾಯ ಮಾಡಿದ್ದಾರೆ. 

4. ದಸರಾ ಉತ್ಸವಕ್ಕೆ ₹45 ಕೋಟಿ, ಹಂಪಿಗೆ ಕಡಿಮೆ ಅನುದಾನವೇ?

ಸ್ಥಳೀಯರ ಆರೋಪದ ಪ್ರಕಾರ, ಮೈಸೂರು ದಸರಾ ಉತ್ಸವಕ್ಕೆ ಸರ್ಕಾರ ದೊಡ್ಡ ಪ್ರಮಾಣದಲ್ಲಿ ಅನುದಾನ ನೀಡುತ್ತಿದ್ದರೂ, ಹಂಪಿ ಉತ್ಸವಕ್ಕೆ ಅದಕ್ಕೆ ಹೋಲಿಸಿದರೆ ಕಡಿಮೆ ಹಣ ಮೀಸಲಿಡಲಾಗುತ್ತಿದೆ. ವರದಿಯಲ್ಲಿ ಮೈಸೂರು ದಸರಾಕ್ಕೆ ₹45 ಕೋಟಿ ಅನುದಾನದ ವಿಚಾರ ಉಲ್ಲೇಖವಾಗಿದ್ದು, ಹಂಪಿ ಉತ್ಸವಕ್ಕೆ ಅದರ ಅರ್ಧದಷ್ಟು ಅನುದಾನ ದೊರೆಯುತ್ತದೆ ಎಂದು ಸ್ಥಳೀಯರು ಹೇಳಿದ್ದಾರೆ. ಈ ಅನುದಾನದ ಹಂಚಿಕೆ ಮತ್ತು ಆದ್ಯತೆಯ ಬಗ್ಗೆ ಅಸಮಾಧಾನ ವ್ಯಕ್ತವಾಗಿದೆ. 

ಹಂಪಿ ಉತ್ಸವಕ್ಕೆ ಜಿಲ್ಲಾ ಖನಿಜ ಪ್ರತಿಷ್ಠಾನ (DMF) ನಿಧಿಯನ್ನು ಬಳಸುವ ಸಾಧ್ಯತೆಯನ್ನೂ ಸ್ಥಳೀಯರು ಪ್ರಸ್ತಾಪಿಸಿದ್ದಾರೆ. ಆದರೆ, ಈ ನಿಧಿಯನ್ನು ಉತ್ಸವಕ್ಕೆ ಬಳಸುವ ಬಗ್ಗೆ ಸರ್ಕಾರದ ಅಧಿಕೃತ ನಿರ್ಧಾರ ಹೊರಬಂದಿರುವುದಾಗಿ ವರದಿಯಾಗಿಲ್ಲ. ಇದು ಸ್ಥಳೀಯರು ಮುಂದಿಟ್ಟಿರುವ ಸಲಹೆಯಾಗಿದೆ.

5. ನವೆಂಬರ್ ತಿಂಗಳೇ ಹಂಪಿ ಉತ್ಸವಕ್ಕೆ ಏಕೆ ಸೂಕ್ತ?

  • ಹಿತಕರ ವಾತಾವರಣ-  ಫೆಬ್ರವರಿ ನಂತರ ಬೇಸಿಗೆಯ ತಾಪ ಹೆಚ್ಚಾಗುವುದರಿಂದ ನವೆಂಬರ್ ತಿಂಗಳು ಪ್ರವಾಸಿಗರಿಗೆ ಹೆಚ್ಚು ಅನುಕೂಲಕರ.
  • ಪ್ರವಾಸೋದ್ಯಮ- ನವೆಂಬರ್‌ನಲ್ಲಿ ದೇಶೀಯ ಮತ್ತು ವಿದೇಶಿ ಪ್ರವಾಸಿಗರು ಹಂಪಿಗೆ ಭೇಟಿ ನೀಡುವ ಸಾಧ್ಯತೆ ಹೆಚ್ಚಿದ್ದು, ಉತ್ಸವ ಪ್ರವಾಸೋದ್ಯಮಕ್ಕೆ ಉತ್ತೇಜನ ನೀಡಬಹುದು.
  • ತುಂಗಭದ್ರಾ ನದಿ ತೀರ- ನದಿ ತೀರದ ಕಾರ್ಯಕ್ರಮಗಳು ಮತ್ತು ಸಾಂಸ್ಕೃತಿಕ ಪ್ರದರ್ಶನಗಳಿಗೆ ನವೆಂಬರ್ ವಾತಾವರಣ ಸೂಕ್ತವೆಂದು ಸ್ಥಳೀಯರು ಅಭಿಪ್ರಾಯಪಟ್ಟಿದ್ದಾರೆ.
  • ಕಲಾವಿದರ ಅನುಕೂಲ- ಮುಂಚಿತ ದಿನಾಂಕ ನಿಗದಿಯಾದರೆ ಕಲಾವಿದರು ಮತ್ತು ಸಂಘಟಕರು ಸಿದ್ಧತೆ ನಡೆಸಲು ಸಮಯ ಸಿಗುತ್ತದೆ. 

6. ಚುನಾವಣಾ ನೀತಿ ಸಂಹಿತೆ ಅಡ್ಡಿಯಾಗಿದೆಯೇ?

ವಿಧಾನ ಪರಿಷತ್ ಚುನಾವಣೆ ಹಿನ್ನೆಲೆಯಲ್ಲಿ ಜಾರಿಯಾಗಿರುವ ನೀತಿ ಸಂಹಿತೆಯು ಹೊಸ ಸಭೆಗಳು, ಟೆಂಡರ್ ಪ್ರಕ್ರಿಯೆಗಳು ಹಾಗೂ ಉತ್ಸವದ ಕುರಿತು ಅಂತಿಮ ನಿರ್ಧಾರ ಕೈಗೊಳ್ಳಲು ಅಡ್ಡಿಯಾಗಬಹುದು ಎಂಬ ಆತಂಕವೂ ವ್ಯಕ್ತವಾಗಿದೆ. ಆದರೆ ಉತ್ಸವದ ದಿನಾಂಕವನ್ನು ಮುಂಚಿತವಾಗಿ ಘೋಷಿಸಿದ್ದರೆ ಸಿದ್ಧತೆಗಳನ್ನು ಮೊದಲೇ ಆರಂಭಿಸಲು ಸಾಧ್ಯವಿತ್ತು ಎಂಬುದು ಸ್ಥಳೀಯರ ವಾದವಾಗಿದೆ. 


ಈ ಹಿನ್ನೆಲೆಯಲ್ಲಿ ಹಂಪಿ ಉತ್ಸವವನ್ನು ಯಾವಾಗ ನಡೆಸಲಾಗುತ್ತದೆ, ಸರ್ಕಾರ ತನ್ನ ಹಿಂದಿನ ಭರವಸೆಯನ್ನು ಈಡೇರಿಸುತ್ತದೆಯೇ, ಸ್ಥಳೀಯ ಕಲಾವಿದರು ಮತ್ತು ಪ್ರವಾಸೋದ್ಯಮಕ್ಕೆ ನ್ಯಾಯ ಸಿಗುತ್ತದೆಯೇ ಎಂಬ ಪ್ರಶ್ನೆಗಳು ಎದುರಾಗಿವೆ.

Comments