Sunday, Nov 22, 2026
|
Advertisement

ತೊಡೆಯ ಮೂಳೆ ಮುರಿದ ಮರಿ ಆನೆ ರಾಜಾಗೆ ವನತಾರಾ ಆಸರೆ - ಅಸ್ಸಾಂನಿಂದ ಗುಜರಾತ್‌ಗೆ ವಿಶೇಷ ವಿಮಾನ ಪ್ರಯಾಣ!!

ಅಸ್ಸಾಂನಲ್ಲಿ ಜನಿಸಿದ ಕೇವಲ ಏಳು ವಾರದ ಮರಿ ಆನೆ ರಾಜಾ ಇದೀಗ ಬದುಕಿಗಾಗಿ ಹೋರಾಡುತ್ತಿದೆ. ಜನಿಸಿದ ಕೆಲವೇ ಗಂಟೆಗಳಲ್ಲಿ ತಾಯಿಯ ಆನೆಯಿಂದ ಗಾಯಗೊಂಡು ಬಲ ತೊಡೆಯ ಮೂಳೆ ಮುರಿತಕ್ಕೆ ಒಳಗಾಗಿದ್ದ ರಾಜಾಗೆ ಕಳೆದ ಹಲವು ವಾರಗಳಿಂದ ಚಿಕಿತ್ಸೆ ನೀಡಲಾಗುತ್ತಿದೆ. ಆದರೆ ಆರೋಗ್ಯದಲ್ಲಿ ನಿರೀಕ್ಷಿತ ಚೇತರಿಕೆ ಕಂಡುಬರದ ಹಿನ್ನೆಲೆಯಲ್ಲಿ ಹೆಚ್ಚಿನ ವೈದ್ಯಕೀಯ ಸೌಲಭ್ಯ ಮತ್ತು ಆರೈಕೆ ಒದಗಿಸುವ ಉದ್ದೇಶದಿಂದ ಗುಜರಾತ್‌ನ ಜಾಮ್‌ನಗರದಲ್ಲಿರುವ ವನತಾರಾ ಆಸ್ಪತ್ರೆಗೆ ಸ್ಥಳಾಂತರಿಸಲಾಗುತ್ತಿದೆ.

ಮರಿ ಆನೆ ರಾಜಾ | Photo Credit: https://x.com/aditiiiii8666
ಮರಿ ಆನೆ ರಾಜಾ | Photo Credit: https://x.com/aditiiiii8666

ನವೆಂಬರ್ 20ರಂದು ವನತಾರಾ ಸಂಸ್ಥೆ ಬಿಡುಗಡೆ ಮಾಡಿರುವ ಮಾಹಿತಿಯ ಪ್ರಕಾರ, ರಾಜಾನನ್ನು ಅಸ್ಸಾಂನ ಗುವಾಹಟಿಯಿಂದ ವಿಶೇಷವಾಗಿ ವ್ಯವಸ್ಥೆ ಮಾಡಿರುವ ವಿಮಾನದ ಮೂಲಕ ಜಾಮ್‌ನಗರಕ್ಕೆ ಕರೆತರಲಾಗುತ್ತಿದೆ. ಈ ವಿಮಾನ ಪ್ರಯಾಣ ಸುಮಾರು ನಾಲ್ಕು ಗಂಟೆ ತೆಗೆದುಕೊಳ್ಳುವ ನಿರೀಕ್ಷೆಯಿದೆ. ರಸ್ತೆ ಮಾರ್ಗದಲ್ಲಿ ಸಾಗಿಸಬೇಕಾದರೆ 2,500 ಕಿಲೋಮೀಟರ್‌ಗಳಿಗೂ ಹೆಚ್ಚು ದೂರ ಕ್ರಮಿಸಬೇಕಾಗುತ್ತದೆ. ಈಗಾಗಲೇ ಗಂಭೀರ ಗಾಯದಿಂದ ಬಳಲುತ್ತಿರುವ ಮರಿ ಆನೆಗೆ ಇಷ್ಟು ದೀರ್ಘ ಪ್ರಯಾಣ ಮತ್ತಷ್ಟು ತೊಂದರೆ ಉಂಟುಮಾಡುವ ಸಾಧ್ಯತೆಯಿರುವುದರಿಂದ ವಿಮಾನದಲ್ಲಿ ಸಾಗಿಸಲು ನಿರ್ಧರಿಸಲಾಗಿದೆ.

Advertisement

ಜನಿಸಿದ ಕೆಲವೇ ಗಂಟೆಗಳಲ್ಲಿ ತಾಯಿಯಿಂದ ಗಾಯ

ರಾಜಾ 2026ರ ಅಕ್ಟೋಬರ್ 2ರಂದು ಅಸ್ಸಾಂನ ಗೋಗಾಮುಖ್ ಪ್ರದೇಶದಲ್ಲಿ ಜನಿಸಿದ್ದಾನೆ. ಜನಿಸಿದ ಕೆಲವೇ ಗಂಟೆಗಳಲ್ಲಿ ಆತನ 11 ವರ್ಷದ ತಾಯಿ ಆನೆ ಗಾಬರಿಗೊಂಡು ಮರಿಯಾನೆಗೆ ಒದ್ದಿದ್ದಾಳೆ. ಇದರಿಂದ ರಾಜಾನ ಬಲ ತೊಡೆಯ ಪ್ರಮುಖ ಮೂಳೆ ಸಂಪೂರ್ಣವಾಗಿ ಮುರಿದಿದೆ. ಗಾಯದ ತೀವ್ರತೆಯಿಂದಾಗಿ ಆತನಿಗೆ ಸ್ವತಂತ್ರವಾಗಿ ನಿಲ್ಲಲು ಅಥವಾ ಗಾಯಗೊಂಡ ಕಾಲಿನ ಮೇಲೆ ದೇಹದ ಭಾರವನ್ನು ಹೊರಲು ಸಾಧ್ಯವಾಗಿರಲಿಲ್ಲ.

ಇದಲ್ಲದೆ, ನವಜಾತ ಆನೆಗಳಿಗೆ ರೋಗನಿರೋಧಕ ಶಕ್ತಿ ಹೆಚ್ಚಿಸಲು ಸಹಾಯ ಮಾಡುವ ತಾಯಿಯ ಮೊದಲ ಹಾಲು 'ಕೊಲೊಸ್ಟ್ರಮ್' ಕೂಡ ರಾಜಾಗೆ ಸರಿಯಾಗಿ ದೊರೆತಿರಲಿಲ್ಲ. ಇದರಿಂದ ಆತನ ಆರೋಗ್ಯದ ಬಗ್ಗೆ ವೈದ್ಯಕೀಯ ತಂಡಕ್ಕೆ ಹೆಚ್ಚಿನ ಕಾಳಜಿ ವಹಿಸುವ ಅನಿವಾರ್ಯತೆ ಎದುರಾಯಿತು.

ಚಿಕಿತ್ಸೆಯ ನಡುವೆಯೇ ಹೆಚ್ಚಿದ ಆರೋಗ್ಯ ಸಮಸ್ಯೆಗಳು

ರಾಜಾನ ಸ್ಥಿತಿಯ ಬಗ್ಗೆ ಮಾಹಿತಿ ದೊರೆತ ನಂತರ ವನತಾರಾದ ಪಶುವೈದ್ಯಕೀಯ ತಂಡ ಅಕ್ಟೋಬರ್ 8ರಂದು ಸ್ಥಳಕ್ಕೆ ಭೇಟಿ ನೀಡಿ ತಪಾಸಣೆ ನಡೆಸಿತು. ಎಕ್ಸ್‌ರೇ ಪರೀಕ್ಷೆಯಲ್ಲಿ ಬಲ ತೊಡೆಯ ಮೂಳೆ ಮುರಿದಿರುವುದು ದೃಢಪಟ್ಟಿತು. ತಕ್ಷಣವೇ ಗಾಯಗೊಂಡ ಕಾಲಿಗೆ ಪ್ಲಾಸ್ಟರ್ ಮತ್ತು ಬ್ಯಾಂಡೇಜ್ ಹಾಕಿ ಮೂಳೆಗೆ ಆಧಾರ ನೀಡುವ ಚಿಕಿತ್ಸೆ ಆರಂಭಿಸಲಾಯಿತು.

ಅಕ್ಟೋಬರ್ 10ರಂದು ರಾಜಾನನ್ನು ಹೆಚ್ಚಿನ ಆರೈಕೆಗಾಗಿ ಪೋಹುಮಾರಾದ ಕೇಂದ್ರಕ್ಕೆ ಸ್ಥಳಾಂತರಿಸಲಾಯಿತು. ಅಲ್ಲದೆ, ಸುರಕ್ಷಿತವಾಗಿ ನೀರಿನಲ್ಲಿ ಚಲಿಸುವ ಮೂಲಕ ದೇಹಕ್ಕೆ ವ್ಯಾಯಾಮ ದೊರೆಯುವ ಉದ್ದೇಶದಿಂದ ಹೈಡ್ರೋಥೆರಪಿ ಕೊಳವನ್ನೂ ನಿರ್ಮಿಸಲಾಗಿತ್ತು.

Advertisement

ಅತಿಸಾರ, ಬ್ಯಾಕ್ಟೀರಿಯಾ ಸೋಂಕು, ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಕಡಿಮೆಯಾಗುವುದು ಮತ್ತು ಯಕೃತ್ತಿನ ಸಮಸ್ಯೆಗಳು ಆತನನ್ನು ಕಾಡಿದವು. ದೀರ್ಘಕಾಲ ಮಲಗಿಯೇ ಇರಬೇಕಾದ ಪರಿಸ್ಥಿತಿಯಿಂದ ದೇಹದ ಕೆಲವು ಭಾಗಗಳಲ್ಲಿ ಒತ್ತಡದ ಗಾಯಗಳೂ ಕಾಣಿಸಿಕೊಂಡವು. ಇದರ ಜೊತೆಗೆ ಹೊಕ್ಕಳಿನ ಹರ್ನಿಯಾ ಸಮಸ್ಯೆಯೂ ಪತ್ತೆಯಾಯಿತು. ಹೀಗೆ ಹಲವು ಆರೋಗ್ಯ ಸಮಸ್ಯೆಗಳು ಒಂದೇ ಸಮಯದಲ್ಲಿ ಎದುರಾಗಿರುವುದರಿಂದ ರಾಜಾನ ಚಿಕಿತ್ಸೆಯೂ ಸವಾಲಿನದ್ದಾಗಿದೆ.

ಅನಂತ್ ಅಂಬಾನಿ ನೆರವಿನಿಂದ ವಿಶೇಷ ವಿಮಾನ ವ್ಯವಸ್ಥೆ

ಮರಿ ಆನೆಯ ಜೀವ ಉಳಿಸುವ ಉದ್ದೇಶದಿಂದ ವನತಾರಾ ಸಂಸ್ಥಾಪಕ ಅನಂತ್ ಅಂಬಾನಿ ಅವರ ನೆರವಿನೊಂದಿಗೆ ವಿಶೇಷ ವಿಮಾನ ಸಾರಿಗೆಯನ್ನು ವ್ಯವಸ್ಥೆ ಮಾಡಲಾಗಿದೆ. ರಾಜಾನ ಸುರಕ್ಷತೆ ಮತ್ತು ಆರಾಮಕ್ಕೆ ಆದ್ಯತೆ ನೀಡುವಂತೆ ವಿಮಾನದೊಳಗೆ ವಿಶೇಷ ಕಂಟೇನರ್ ಸಿದ್ಧಪಡಿಸಲಾಗಿದೆ. ಗಾಯಗೊಂಡ ಕಾಲಿಗೆ ಅಗತ್ಯವಾದ ಆಧಾರ ಒದಗಿಸುವುದರ ಜೊತೆಗೆ ಮೃದುವಾದ ಹಾಸಿಗೆಯ ವ್ಯವಸ್ಥೆಯನ್ನೂ ಮಾಡಲಾಗಿದೆ.

ಪ್ರಯಾಣದ ಸಮಯದಲ್ಲಿ ಪಶುವೈದ್ಯರು ಮತ್ತು ಆರೈಕೆ ಸಿಬ್ಬಂದಿ ರಾಜಾನ ಜೊತೆಯಲ್ಲಿರಲಿದ್ದಾರೆ. ಆತನ ಹೃದಯ ಬಡಿತ, ಉಸಿರಾಟ ಸೇರಿದಂತೆ ಪ್ರಮುಖ ಆರೋಗ್ಯ ಲಕ್ಷಣಗಳನ್ನು ನಿರಂತರವಾಗಿ ಗಮನಿಸಲಿದ್ದಾರೆ. ಅನಂತ್ ಅಂಬಾನಿ ಅವರ ನೆರವಿನಿಂದ ಕೈಗೊಳ್ಳಲಾಗುತ್ತಿರುವ ಮೂರನೇ ಆನೆ ವಿಮಾನ ಸಾಗಣೆ ಇದಾಗಿದೆ ಎಂದು ವನತಾರಾ ತಿಳಿಸಿದೆ.

ಈ ಕುರಿತು ಮಾತನಾಡಿರುವ ವನತಾರಾ ಸಿಇಒ ವಿವಾನ್ ಕರಾನಿ, "ರಾಜಾ ಮುರಿದ ಕಾಲಿನೊಂದಿಗೆ ಈ ಜಗತ್ತಿಗೆ ಬಂದಿರಬಹುದು. ಆದರೆ ಆತನ ಬದುಕುವ ಇಚ್ಛಾಶಕ್ತಿ ಮಾತ್ರ ಕುಂದಿಲ್ಲ" ಎಂದು ಹೇಳಿದ್ದಾರೆ.

ಜಾಮ್‌ನಗರದಲ್ಲಿ ಮುಂದುವರಿಯಲಿದೆ ವಿಶೇಷ ಚಿಕಿತ್ಸೆ

ಜಾಮ್‌ನಗರ ತಲುಪಿದ ಬಳಿಕ ರಾಜಾನ ಆರೋಗ್ಯದ ಬಗ್ಗೆ ಸಮಗ್ರ ವೈದ್ಯಕೀಯ ಪರೀಕ್ಷೆ ನಡೆಸಲಾಗುತ್ತದೆ. ಮೂಳೆ ಮುರಿತಕ್ಕೆ ಅಗತ್ಯವಾದ ವಿಶೇಷ ಚಿಕಿತ್ಸೆ ನೀಡುವುದರ ಜೊತೆಗೆ ಪೌಷ್ಟಿಕ ಆಹಾರ, ಸೋಂಕು ನಿಯಂತ್ರಣ ಮತ್ತು ಪುನರ್ವಸತಿಗೂ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ.

ಮುರಿದ ಮೂಳೆ ಸಂಪೂರ್ಣವಾಗಿ ಗುಣಮುಖವಾಗಲು ಎಷ್ಟು ಸಮಯ ಬೇಕಾಗುತ್ತದೆ ಎಂಬುದನ್ನು ಈಗಲೇ ನಿರ್ಧರಿಸಲು ಸಾಧ್ಯವಿಲ್ಲ. ಚಿಕಿತ್ಸೆಗೆ ರಾಜಾ ಹೇಗೆ ಸ್ಪಂದಿಸುತ್ತಾನೆ ಮತ್ತು ಇತರ ಆರೋಗ್ಯ ಸಮಸ್ಯೆಗಳು ಎಷ್ಟು ಬೇಗ ನಿಯಂತ್ರಣಕ್ಕೆ ಬರುತ್ತವೆ ಎಂಬುದರ ಮೇಲೆ ಆತನ ಚೇತರಿಕೆ ಅವಲಂಬಿತವಾಗಿದೆ. ಆರೋಗ್ಯದ ಸ್ಥಿತಿಯನ್ನು ಗಮನಿಸಿದರೆ ದೀರ್ಘಕಾಲದವರೆಗೆ ನಿರಂತರ ವೈದ್ಯಕೀಯ ಆರೈಕೆ ಅಗತ್ಯವಾಗುವ ಸಾಧ್ಯತೆಯೂ ಇದೆ.

ಸದ್ಯ ರಾಜಾನನ್ನು ಸುರಕ್ಷಿತವಾಗಿ ಜಾಮ್‌ನಗರಕ್ಕೆ ತಲುಪಿಸಿ ಸೂಕ್ತ ಚಿಕಿತ್ಸೆ ಒದಗಿಸುವುದೇ ವೈದ್ಯಕೀಯ ತಂಡದ ಪ್ರಮುಖ ಗುರಿಯಾಗಿದೆ. ಮತ್ತೆ ತನ್ನ ಕಾಲ ಮೇಲೆ ನಿಂತು ಆರೋಗ್ಯಕರ ಜೀವನ ನಡೆಸಲಿ ಎಂಬುದು ಪ್ರಾಣಿ ಪ್ರಿಯರ ಆಶಯವಾಗಿದೆ. ಪುಟ್ಟ ಆನೆಯ ಜೀವ ಉಳಿಸಲು ವನತಾರಾ ಕೈಗೊಂಡಿರುವ ಈ ವಿಶೇಷ ಪ್ರಯತ್ನ ಇದೀಗ ಎಲ್ಲರ ಗಮನ ಸೆಳೆದಿದೆ.

Comments