ಮಾರುಕಟ್ಟೆಗೆ ಹೋಗಿ ಕೈಯಾಡಿಸಿದರೆ ಸಾಕು, ಈ ಬೆಲೆ ಏರಿಕೆಯ ಬಿಸಿ ತಟ್ಟುತ್ತಿದೆ. ಇತ್ತೀಚಿನ ವರದಿಗಳ ಪ್ರಕಾರ, ದೇಶದಲ್ಲಿ ಸಗಟು ಬೆಲೆ ಹಣದುಬ್ಬರ (WPI) ಶೇ. 8.3ಕ್ಕೆ ಏರಿಕೆಯಾಗಿದೆ ಎಂದು ಕೇಳಿಬಂದಿದೆ. ಇದು ಕಳೆದ ಎರಡು ವರ್ಷಗಳಲ್ಲೇ (24 ತಿಂಗಳು) ದಾಖಲಾದ ಭಾರಿ ಜಿಗಿತವಾಗಿದೆ! ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದಂತಹ ಪರಿಸ್ಥಿತಿ ಮತ್ತು ಜಾಗತಿಕ ಅನಿಶ್ಚಿತತೆಗಳು ನಮ್ಮ ಅಡುಗೆ ಮನೆಯ ಬಜೆಟ್ ಮೇಲೆ ನೇರ ಪರಿಣಾಮ ಬೀರಲು ಶುರು ಮಾಡಿದೆ!
ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ಬಿಡುಗಡೆ ಮಾಡಿರುವ ಮಾಹಿತಿಯ ಪ್ರಕಾರ, ಜಾಗತಿಕ ಮಟ್ಟದಲ್ಲಿ ತೈಲ ಬೆಲೆ ಏರಿಕೆಯಾಗುತ್ತಿರುವುದೇ ಈ ಹಣದುಬ್ಬರ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಹಾಗಾದರೆ ಯಾವೆಲ್ಲಾ ವಸ್ತುಗಳು ದುಬಾರಿಯಾಗಿವೆ? ಬನ್ನಿ ನೋಡೋಣ.
ಹಣದುಬ್ಬರ ಏರಲು ಅಸಲಿ ಕಾರಣವೇನು.?
ಮಧ್ಯಪ್ರಾಚ್ಯದ ಬಿಕ್ಕಟ್ಟು ಹಾಗೂ ಹೊರ್ಮುಜ್ ಜಲಸಂಧಿಯ ದಿಗ್ಬಂಧನದಿಂದಾಗಿ ಭಾರತಕ್ಕೆ ಕಚ್ಚಾ ಪೆಟ್ರೋಲಿಯಂ ಆಮದು ಮಾಡಿಕೊಳ್ಳುವುದು ಕಷ್ಟವಾಗುತ್ತಿದೆ. ಕಚ್ಚಾ ತೈಲದ ಬೆಲೆ ಗಗನಕ್ಕೇರಿರುವುದರಿಂದ ಸಾರಿಗೆ ವೆಚ್ಚ ಹೆಚ್ಚಾಗಿದೆ. ಈ ಸರಪಳಿಯ ಪರಿಣಾಮವಾಗಿ ಪ್ರತಿಯೊಂದು ವಸ್ತುವಿನ ಬೆಲೆಯೂ ಏರುತ್ತಿದೆ..!
ವಲಯವಾರು ಹಣದುಬ್ಬರದ ಝಲಕ್;
ಇಂಧನ ಮತ್ತು ಶಕ್ತಿ - ಮಾರ್ಚ್ನಲ್ಲಿ ಕೇವಲ ಶೇ. 1.05 ರಷ್ಟಿದ್ದ ಇಂಧನ ಹಣದುಬ್ಬರ, ಏಪ್ರಿಲ್ನಲ್ಲಿ ಬರೋಬ್ಬರಿ ಶೇ. 24.71ಕ್ಕೆ ಏರಿದೆ! ಇದು ಕಳೆದ 42 ತಿಂಗಳಲ್ಲೇ ಅತಿ ಹೆಚ್ಚು.
ಕಚ್ಚಾ ಪೆಟ್ರೋಲಿಯಂ - ಇದರ ಹಣದುಬ್ಬರ ದರ ಶೇ. 88.06 ರಷ್ಟಿದ್ದು, ಆಮದು ಮಾಡಿಕೊಳ್ಳುವುದು ಭಾರೀ ದುಬಾರಿಯಾಗಿದೆ!
ಆಹಾರ ಪದಾರ್ಥಗಳು - ಆಹಾರದ ಬೆಲೆಗಳಲ್ಲೂ ಏರಿಕೆ ಕಂಡುಬಂದಿದ್ದು, ಸಾಮಾನ್ಯ ಜನರ ದಿನಸಿ ಬಿಲ್ ಹೆಚ್ಚುತ್ತಿದೆ.
ಯಾವೆಲ್ಲಾ ವಸ್ತುಗಳ ಬೆಲೆ ಏರಿಕೆಯಾಗಿದೆ?
ಸಗಟು ಹಣದುಬ್ಬರದ ಏರಿಕೆಯಿಂದಾಗಿ ಕೇವಲ ಪೆಟ್ರೋಲ್ ಮಾತ್ರವಲ್ಲ, ಉತ್ಪಾದನಾ ವಲಯದ ಹಲವು ವಸ್ತುಗಳು ದುಬಾರಿಯಾಗಿವೆ.
ಎಲ್ಪಿಜಿ (LPG) - ಗೃಹ ಬಳಕೆಯ ಗ್ಯಾಸ್ ಸಿಲಿಂಡರ್ ಬೆಲೆಗಳಲ್ಲೂ ಏರಿಕೆ ಕಂಡಿದೆ. ಮಾರ್ಚ್ನಲ್ಲಿ ಮೈನಸ್ನಲ್ಲಿದ್ದ ಇದರ ದರ ಈಗ ಶೇ. 10.29 ರಷ್ಟು ಏರಿದೆ.
ಲೋಹ ಮತ್ತು ರಾಸಾಯನಿಕ - ಕಟ್ಟಡ ನಿರ್ಮಾಣಕ್ಕೆ ಬೇಕಾದ ಕಬ್ಬಿಣ, ಲೋಹಗಳು ಹಾಗೂ ರಾಸಾಯನಿಕ ವಸ್ತುಗಳ ಬೆಲೆ ಹೆಚ್ಚಾಗಿದೆ.
ಜವಳಿ (ಬಟ್ಟೆಬರೆ) - ಬಟ್ಟೆಗಳ ತಯಾರಿಕಾ ವೆಚ್ಚ ಅಧಿಕವಾಗಿರುವುದರಿಂದ ಸಿದ್ಧ ಉಡುಪುಗಳ ಬೆಲೆಯೂ ಏರಲಿದೆ.
ಆಹಾರೇತರ ವಸ್ತುಗಳು - ಇವುಗಳ ಹಣದುಬ್ಬರ ಶೇ. 12.18ಕ್ಕೆ ಏರಿಕೆಯಾಗಿದ್ದು, ಜನಸಾಮಾನ್ಯರಿಗೆ ಹೊರೆಯಾಗುತ್ತಿದೆ.
ಬಜೆಟ್ ಮೇಲೆ ಬೀರುತ್ತಾ ಎಫೆಕ್ಟ್?
ಖಂಡಿತಾ ಹೌದು. ಸಗಟು ಬೆಲೆ ಹೆಚ್ಚಾದಾಗ ಚಿಲ್ಲರೆ ಮಾರುಕಟ್ಟೆಯಲ್ಲೂ ಅದರ ಪ್ರಭಾವ ಕಾಣಿಸಿಕೊಳ್ಳುತ್ತದೆ.. ಜಾಗತಿಕ ಬ್ರೋಕರೇಜ್ ಸಂಸ್ಥೆ ಬಾರ್ಕ್ಲೇಸ್ ಪ್ರಕಾರ, ಉತ್ಪಾದನಾ ವಸ್ತುಗಳ ಬೆಲೆ ಏರಿಕೆಯು ವಾರ್ಷಿಕ ಆಧಾರದ ಮೇಲೆ ಶೇ. 5ರಷ್ಟು ಹೆಚ್ಚಾಗಿದೆ. ಕಚ್ಚಾ ತೈಲದ ಬೆಲೆ ಹೀಗೆಯೇ ಮುಂದುವರಿದರೆ ಸಾರಿಗೆ ವೆಚ್ಚ ಏರಿ, ಹಣ್ಣು, ತರಕಾರಿ ಮತ್ತು ದಿನಸಿ ವಸ್ತುಗಳ ಬೆಲೆ ಇನ್ನೂ ಹೆಚ್ಚಾಗುವ ಸಾಧ್ಯತೆಯಿದೆ.
ಸಂಕ್ಷಿಪ್ತವಾಗಿ ಇಂದಿನ ಅಂಕಿ-ಅಂಶ;
- ಪ್ರಸಕ್ತ ಹಣದುಬ್ಬರ - ಶೇ. 8.3
- ಹಿಂದಿನ ತಿಂಗಳ ದರ - ಶೇ. 3.88 (ಮಾರ್ಚ್)
- ಕಳೆದ ವರ್ಷದ ಇದೇ ಅವಧಿ - ಶೇ. 0.85 (ಏಪ್ರಿಲ್ 2025)
ಒಟ್ಟಿನಲ್ಲಿ, ಜಾಗತಿಕ ರಾಜಕೀಯ ಬಿಕ್ಕಟ್ಟುಗಳು ಭಾರತದ ಮಾರುಕಟ್ಟೆಯ ಮೇಲೆ ದಟ್ಟವಾದ ಕಾರ್ಮೋಡ ಕವಿಸಿವೆ. ತೈಲ ಬೆಲೆ ಇಳಿಕೆಯಾಗುವವರೆಗೂ ಈ ಹಣದುಬ್ಬರದ ಬಿಸಿಯಿಂದ ತಪ್ಪಿಸಿಕೊಳ್ಳುವುದು ಕಷ್ಟದಂತೆ ಕಾಣುತ್ತಿದೆ.
ನಿಮ್ಮ ಅನಿಸಿಕೆ - ದಿನೇ ದಿನೇ ಏರುತ್ತಿರುವ ಈ ಬೆಲೆ ಏರಿಕೆಯನ್ನು ಸರ್ಕಾರ ಹೇಗೆ ನಿಯಂತ್ರಿಸಬೇಕು ಎಂದು ನೀವು ಬಯಸುತ್ತೀರಿ? ಕಮೆಂಟ್ ಮಾಡಿ ತಿಳಿಸಿ!
