ಆನ್ಲೈನ್ ಶಾಪಿಂಗ್ ಲೋಕದ ದೈತ್ಯ ಕಂಪನಿ ಫ್ಲಿಪ್ಕಾರ್ಟ್, ಇತ್ತೀಚೆಗೆ ತನ್ನ ಹೊಸ ಸೇವೆಯಾದ 'ಫ್ಲಿಪ್ಕಾರ್ಟ್ ಮಿನಿಟ್ಸ್' ಮೂಲಕ ಕೇವಲ 1 ರೂಪಾಯಿಗೆ 1 ಲೀಟರ್ ಹಾಲು ನೀಡುವುದಾಗಿ ಘೋಷಿಸಿತ್ತು. ಈ ಭರ್ಜರಿ ಆಫರ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡಿತ್ತಾದರೂ, ಹೈನುಗಾರಿಕೆ ವಲಯದಲ್ಲಿ ದೊಡ್ಡ ಮಟ್ಟದ ಆತಂಕ ಮತ್ತು ವಿವಾದವನ್ನ ಸೃಷ್ಟಿಸಿತ್ತು. ಈ ಬಗ್ಗೆ ಬೆಂಗಳೂರು ಹಾಲು ಒಕ್ಕೂಟದ ಅಧ್ಯಕ್ಷ ಡಿ.ಕೆ. ಸುರೇಶ್ ಅವರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಇದೀಗ ಈ ಎಲ್ಲಾ ಗೊಂದಲಗಳಿಗೆ ಫ್ಲಿಪ್ಕಾರ್ಟ್ ಆಡಳಿತ ಮಂಡಳಿ ಅಧಿಕೃತವಾಗಿ ಉತ್ತರ ನೀಡಿದೆ.
ರೈತರ ಹಿತಾಸಕ್ತಿಗೆ ಧಕ್ಕೆಯಿಲ್ಲ- ಫ್ಲಿಪ್ಕಾರ್ಟ್ ಸ್ಪಷ್ಟನೆ
ಈ ವಿವಾದದ ಬಗ್ಗೆ ಮೌನ ಮುರಿದಿರುವ ಫ್ಲಿಪ್ಕಾರ್ಟ್ ವಕ್ತಾರರು, ಈ ವಿಶೇಷ ಕೊಡುಗೆಯಿಂದ ರೈತರಿಗೆ ಅಥವಾ ಹಾಲು ಉತ್ಪಾದಕರಿಗೆ ಯಾವುದೇ ರೀತಿಯ ಆರ್ಥಿಕ ನಷ್ಟ ಉಂಟಾಗುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಸಂಸ್ಥೆಯ ಪ್ರಕಾರ, ಇದು ಕೇವಲ ಒಂದು ಸೀಮಿತ ಅವಧಿಯ ಪ್ರಚಾರ ಅಭಿಯಾನ. ಹೊಸ ಗ್ರಾಹಕರನ್ನ ಸೆಳೆಯಲು ಬ್ಯಾಂಕಿಂಗ್ ಪಾಲುದಾರರ ಸಹಯೋಗದೊಂದಿಗೆ ಇಂತಹ ರಿಯಾಯಿತಿಗಳನ್ನು ನೀಡಲಾಗುತ್ತದೆಯೇ ಹೊರತು, ಇದರ ಹೊರೆ ರೈತರ ಮೇಲೆ ಬೀಳುವುದಿಲ್ಲ ಎಂದು ಸಂಸ್ಥೆ ಹೇಳಿದೆ.
ವ್ಯಾಪಾರ ಹೇಗೆ ನಡೆಯುತ್ತದೆ?
ಫ್ಲಿಪ್ಕಾರ್ಟ್ ತನ್ನನ್ನು ಒಂದು 'ಮಾರುಕಟ್ಟೆ ವೇದಿಕೆ' (Marketplace) ಎಂದು ಕರೆದುಕೊಂಡಿದೆ. ಇಲ್ಲಿ ಹಾಲು ಮಾರಾಟ ಮಾಡುವ ಡೇರಿ ಪಾಲುದಾರರು ಮತ್ತು ಮಾರಾಟಗಾರರು ತಮಗೆ ಬೇಕಾದ ದರವನ್ನು ತಾವೇ ನಿರ್ಧರಿಸುತ್ತಾರೆ. ಗ್ರಾಹಕರಿಗೆ 1 ರೂಪಾಯಿಗೆ ಹಾಲು ಸಿಗುತ್ತಿದ್ದರೂ, ಹಾಲು ಪೂರೈಸುವ ಮಾರಾಟಗಾರರಿಗೆ ಮಾತ್ರ ಫ್ಲಿಪ್ಕಾರ್ಟ್ ಪೂರ್ಣ ದರವನ್ನೇ ಪಾವತಿಸುತ್ತದೆ. ಅಂದರೆ, ಮಾರುಕಟ್ಟೆ ದರ ಮತ್ತು 1 ರೂಪಾಯಿಯ ನಡುವಿನ ವ್ಯತ್ಯಾಸದ ಹಣವನ್ನು ಫ್ಲಿಪ್ಕಾರ್ಟ್ ಕಂಪನಿಯೇ ಭರಿಸುತ್ತದೆ. ಹೀಗಾಗಿ ರೈತರಿಂದ ಹಾಲು ಖರೀದಿಸುವ ದರದಲ್ಲಿ ಯಾವುದೇ ಇಳಿಕೆಯಾಗುವುದಿಲ್ಲ ಎಂದು ಕಂಪನಿ ಭರವಸೆ ನೀಡಿದೆ.
ವಿವಾದಕ್ಕೆ ಕಾರಣವೇನು?
ಫ್ಲಿಪ್ಕಾರ್ಟ್ ಈ ಆಫರ್ ಘೋಷಿಸಿದ ತಕ್ಷಣ, ಬಮೂಲ್ ಅಧ್ಯಕ್ಷ ಡಿ.ಕೆ. ಸುರೇಶ್ ಅವರು ಆಕ್ರೋಶ ಹೊರಹಾಕಿದ್ದರು. "ಇಂತಹ ಕಡಿಮೆ ದರಗಳು ನಮ್ಮ ಹಾಲು ಒಕ್ಕೂಟಗಳನ್ನು ಮತ್ತು ರೈತರನ್ನು ನಾಶ ಮಾಡುತ್ತವೆ" ಎಂದು ಅವರು ದೂರಿದ್ದರು. ಅಲ್ಲದೆ, ಇಂತಹ ವ್ಯಾಪಾರ ತಂತ್ರಗಳ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಇ-ಮೇಲ್ ಮೂಲಕ ದೂರು ನೀಡಿದ್ದರು. ಇ-ಕಾಮರ್ಸ್ ಕಂಪನಿಗಳು ಮಾರುಕಟ್ಟೆಯನ್ನು ವಶಪಡಿಸಿಕೊಳ್ಳಲು ಇಂತಹ 'ಪ್ರಿಡೇಟರಿ ಪ್ರೈಸಿಂಗ್' (ಅತಿ ಕಡಿಮೆ ದರ ನಿಗದಿ) ಪದ್ಧತಿಯನ್ನು ಅನುಸರಿಸುತ್ತಿವೆ ಎಂಬುದು ಅವರ ಪ್ರಮುಖ ಆರೋಪವಾಗಿತ್ತು.
ರೈತರ ಆರ್ಥಿಕ ಬೆಳವಣಿಗೆಗೆ ಬೆಂಬಲ
ಫ್ಲಿಪ್ಕಾರ್ಟ್ ತನ್ನ ಹೇಳಿಕೆಯಲ್ಲಿ, ತಾವು ಸದಾ ರೈತರ ಮತ್ತು ಸಹಕಾರಿ ಸಂಘಗಳ ಪರವಾಗಿದ್ದೇವೆ ಎಂದು ತಿಳಿಸಿದೆ. ದೇಶಾದ್ಯಂತ ಇರುವ ರೈತರ ಉತ್ಪನ್ನಗಳಿಗೆ ಹೆಚ್ಚಿನ ಮಾರುಕಟ್ಟೆ ಒದಗಿಸಲು ಮತ್ತು ಅವರ ಆರ್ಥಿಕ ಪರಿಸ್ಥಿತಿಯನ್ನು ಸುಧಾರಿಸಲು ನಾವು ಶ್ರಮಿಸುತ್ತಿದ್ದೇವೆ. ತಂತ್ರಜ್ಞಾನದ ಮೂಲಕ ಗ್ರಾಹಕರಿಗೆ ವೇಗವಾಗಿ ಹಾಲು ತಲುಪಿಸುವ ಕೆಲಸ ಮಾಡುತ್ತಿದ್ದೇವೆಯೇ ಹೊರತು, ರೈತರಿಗೆ ಅನ್ಯಾಯ ಮಾಡುವ ಉದ್ದೇಶ ನಮಗಿಲ್ಲ ಎಂದು ಸಂಸ್ಥೆ ಹೇಳಿದೆ. ಫ್ಲಿಪ್ಕಾರ್ಟ್ ನೀಡಿರುವ ಈ ತ್ವರಿತ ಸ್ಪಷ್ಟನೆಯು ಹೈನುಗಾರರಲ್ಲಿ ಮೂಡಿದ್ದ ಆತಂಕವನ್ನು ಸ್ವಲ್ಪ ಮಟ್ಟಿಗೆ ಕಡಿಮೆ ಮಾಡಿದೆ. ರಿಯಾಯಿತಿಯ ನಷ್ಟವನ್ನು ಕಂಪನಿಯೇ ಭರಿಸುವುದರಿಂದ ರೈತರಿಗೆ ಯಾವುದೇ ತೊಂದರೆಯಾಗದು ಎಂಬುದು ಈಗ ಸ್ಪಷ್ಟವಾಗಿದೆ.
