ಸ್ಯಾಂಡಲ್ವುಡ್ನ 'ಶೋ ಮ್ಯಾನ್' ಎಂದೇ ಖ್ಯಾತರಾಗಿರುವ ನಿರ್ದೇಶಕ ಜೋಗಿ ಪ್ರೇಮ್, ತಮ್ಮ ಮುಂಬರುವ ಬಹುನಿರೀಕ್ಷಿತ ಚಿತ್ರ 'ಕೆಡಿ: ದ ಡೆವಿಲ್' ಸಿನಿಮಾದ ಹಾಡಿನ ಕುರಿತು ಎದ್ದಿರುವ ವಿವಾದಕ್ಕೆ ಕೊನೆಗೂ ತೆರೆ ಎಳೆದಿದ್ದಾರೆ. ಚಿತ್ರದ 'ಸರ್ಸೆ ನಿನ್ನ ಸೆರಗ ಸರ್ಸೆ' ಹಾಡಿನ ಸಾಹಿತ್ಯ ಅಶ್ಲೀಲವಾಗಿದೆ ಎಂಬ ಆರೋಪ ಕೇಳಿಬಂದ ಬೆನ್ನಲ್ಲೇ, ಪ್ರೇಮ್ ವಿಡಿಯೋ ಮೂಲಕ ಸ್ಪಷ್ಟನೆ ನೀಡಿದ್ದು, ಸಾರ್ವಜನಿಕರ ಕ್ಷಮೆಯಾಚಿಸಿದ್ದಾರೆ.
'ಕೆಡಿ' ಚಿತ್ರದ ಈ ಹಾಡು ಬಿಡುಗಡೆಯಾದ ಕೆಲವೇ ಕ್ಷಣಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿತ್ತು. ಹಾಡಿನಲ್ಲಿ ಬಳಸಲಾದ ಕೆಲವು ಪದಗಳು ಕೀಳುಮಟ್ಟದ್ದಾಗಿವೆ ಮತ್ತು ಅಶ್ಲೀಲತೆಯಿಂದ ಕೂಡಿವೆ ಎಂದು ನೆಟ್ಟಿಗರು ದೂರಿದ್ದರು. ವಿಶೇಷವಾಗಿ ಉತ್ತರ ಭಾರತದಲ್ಲಿ ಈ ಹಾಡಿನ ಹಿಂದಿ ಆವೃತ್ತಿಗೆ ತೀವ್ರ ವಿರೋಧ ವ್ಯಕ್ತವಾಗಿತ್ತು. ವಿವಾದ ಎಷ್ಟರಮಟ್ಟಿಗೆ ಬೆಳೆಯಿತೆಂದರೆ, ಕೇಂದ್ರ ಸರ್ಕಾರವೂ ಮಧ್ಯಪ್ರವೇಶಿಸಿ ಸೆನ್ಸಾರ್ ಮಂಡಳಿಗೆ ಕ್ರಮ ಕೈಗೊಳ್ಳಲು ಸೂಚಿಸಿತ್ತು ಎನ್ನಲಾಗಿದೆ.
KD movie ಹಾಡಿನ ವಿವಾದ ಕುರಿತು ಕೊನೆಗೂ ಮೌನ ಮುರಿದ ನಿರ್ದೇಶಕ ಜೋಗಿ ಪ್ರೇಮ್..#KDMovie @directorprems @DhruvaSarja @duttsanjay pic.twitter.com/FD3bg7tHbs
— kannadaprabha (@KannadaPrabha) March 18, 2026
ತಮ್ಮ ಎಕ್ಸ್ (ಟ್ವಿಟ್ಟರ್) ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡಿರುವ ಪ್ರೇಮ್, "ನಾನು ಈ ಹಾಡನ್ನು ಯಾರ ಮನಸ್ಸಿಗೂ ನೋವು ಮಾಡುವ ಉದ್ದೇಶದಿಂದ ಬರೆದಿಲ್ಲ. ಈ ಹಿಂದೆ ತಾಯಿ, ದೇವರು ಮತ್ತು ಪ್ರೀತಿಯ ಬಗ್ಗೆ ಅತ್ಯುತ್ತಮ ಹಾಡುಗಳನ್ನು ನೀಡಿದ್ದೇನೆ. ಈ ಹಾಡನ್ನು ಬರೆಯುವಾಗ ನನ್ನ ದೃಷ್ಟಿಕೋನ ಬೇರೆಯೇ ಇತ್ತು. ಒಂದು ಮದ್ಯದ ಬಾಟಲ್ ಮತ್ತು ಉಪ್ಪಿನಕಾಯಿಯನ್ನು ಕಲ್ಪಿಸಿಕೊಂಡು ಈ ಸಾಹಿತ್ಯ ರಚಿಸಿದ್ದೆ. ಆದರೆ, ಜನರು ಅದನ್ನು ಬೇರೆ ಅರ್ಥದಲ್ಲಿ ಗ್ರಹಿಸಿದ್ದಾರೆ," ಎಂದು ತಿಳಿಸಿದ್ದಾರೆ.
ಕೆಲವು ಪದಗಳನ್ನು ಕುತೂಹಲಕ್ಕಾಗಿ ಹಿಂದೆ-ಮುಂದೆ ಬಳಸಿದ್ದೇ ಈ ಗೊಂದಲಕ್ಕೆ ಕಾರಣವಾಯಿತು ಎಂದು ಒಪ್ಪಿಕೊಂಡಿರುವ ಅವರು, "ನನ್ನ ಸಾಹಿತ್ಯದಿಂದ ಯಾರಿಗಾದರೂ ನೋವಾಗಿದ್ದರೆ ನಾನು ಕ್ಷಮೆ ಕೇಳುತ್ತೇನೆ. ಇನ್ನೊಬ್ಬರಿಗೆ ನೋವು ನೀಡಿ ಕೋಟೆ ಕಟ್ಟುವ ಅವಶ್ಯಕತೆ ನನಗಿಲ್ಲ," ಎಂದು ಭಾವುಕರಾಗಿ ನುಡಿದಿದ್ದಾರೆ.
ಈ ವಿವಾದದ ನಡುವೆ ಹಾಡಿನಲ್ಲಿ ಕಾಣಿಸಿಕೊಂಡಿದ್ದ ನಟಿ ನೋರಾ ಫತೇಹಿ ಮತ್ತು ಹಿಂದಿ ಸಾಹಿತಿ ರಕೀಬ್ ಆಲಂ, ತಮಗೂ ಈ ಸಾಹಿತ್ಯಕ್ಕೂ ಸಂಬಂಧವಿಲ್ಲ ಎಂಬಂತೆ ನೀಡಿದ ಹೇಳಿಕೆಗಳಿಗೆ ಪ್ರೇಮ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ನೋರಾ ಫತೇಹಿ ಬಗ್ಗೆ: "ಯಾವುದೇ ನಟಿ ಚಿತ್ರೀಕರಣಕ್ಕೂ ಮುನ್ನ ಹಾಡನ್ನು ಕೇಳಿಸಿಕೊಳ್ಳುತ್ತಾರೆ. ಸಾಹಿತ್ಯ ಗೊತ್ತಿಲ್ಲದೆ ಅವರು ಭಾವನೆಗಳನ್ನು (Expressions) ನೀಡಲು ಹೇಗೆ ಸಾಧ್ಯ? ಹಾಡು ಬಿಡುಗಡೆಯಾದಾಗ ಸಂತೋಷ ವ್ಯಕ್ತಪಡಿಸಿದ್ದ ಅವರು, ಈಗ ವಿವಾದವಾಗುತ್ತಿದ್ದಂತೆ ಉಲ್ಟಾ ಹೊಡೆಯುತ್ತಿರುವುದು ತಪ್ಪು," ಎಂದು ಪ್ರೇಮ್ ಕಿಡಿಕಾರಿದ್ದಾರೆ.
ರಕೀಬ್ ಆಲಂ ಬಗ್ಗೆ: ಹಿಂದಿ ಸಾಹಿತ್ಯ ಬರೆದ ರಕೀಬ್ ಆಲಂ ಅವರು ಭಯದಿಂದಲೋ ಅಥವಾ ವಿವಾದದಿಂದ ತಪ್ಪಿಸಿಕೊಳ್ಳಲೋ ನನ್ನ ಮೇಲೆ ಗೂಬೆ ಕೂರಿಸುತ್ತಿದ್ದಾರೆ ಎಂದು ಪ್ರೇಮ್ ಬೇಸರ ವ್ಯಕ್ತಪಡಿಸಿದ್ದಾರೆ.
ಸಾರ್ವಜನಿಕರ ಭಾವನೆಗಳಿಗೆ ಗೌರವ ನೀಡಿರುವ ಪ್ರೇಮ್, ವಿವಾದಿತ ಹಾಡಿನ ಸಾಹಿತ್ಯವನ್ನು ಸಂಪೂರ್ಣವಾಗಿ ಬದಲಿಸುವುದಾಗಿ ಘೋಷಿಸಿದ್ದಾರೆ. "ನಾನು ಈ ಹಾಡನ್ನು ಮತ್ತೆ ಬರೆಯುತ್ತೇನೆ (Rewrite) ಮತ್ತು ಹೊಸ ಸಾಹಿತ್ಯದೊಂದಿಗೆ ದೇಶಾದ್ಯಂತ ಮರುಬಿಡುಗಡೆ ಮಾಡುತ್ತೇನೆ," ಎಂದು ಅವರು ಭರವಸೆ ನೀಡಿದ್ದಾರೆ. ಪ್ರೇಮ್ ಅವರ ಈ ನಿರ್ಧಾರಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಬೆಂಬಲ ವ್ಯಕ್ತವಾಗುತ್ತಿದೆ.
