ನಮಸ್ಕಾರ ಕನ್ನಡ ಸಿನಿಪ್ರಿಯರೇ, ಸ್ಯಾಂಡಲ್ವುಡ್ನಲ್ಲಿ ತನ್ನ ಮಾತಿನ ಮೋಡಿಯಿಂದಲೇ ಜನರ ಮನಗೆದ್ದ ನಟ ಅಂದ್ರೆ ಅದು ಗೋಲ್ಡನ್ ಸ್ಟಾರ್ ಗಣೇಶ್. ಕಾಮಿಡಿ ಟೈಮ್ ನಿರೂಪಕನಾಗಿ ಕೆರಿಯರ್ ಶುರು ಮಾಡಿ, ಸಣ್ಣಪುಟ್ಟ ಪಾತ್ರಗಳಲ್ಲಿ ಕಾಣಿಸಿಕೊಂಡು, ಇಂದು ಕನ್ನಡ ಚಿತ್ರರಂಗದ ಸೂಪರ್ ಸ್ಟಾರ್ ಆಗಿ ಬೆಳೆದು ನಿಂತಿದ್ದಾರೆ. ಗಣೇಶ್ ಅವರು ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟು ಈಗ ಬರೋಬ್ಬರಿ 20 ವರ್ಷಗಳು ಕಳೆದಿವೆ. ಒಬ್ಬ ನಟನಾಗಿ ಎರಡು ದಶಕಗಳ ಕಾಲ ಪ್ರೇಕ್ಷಕರನ್ನು ರಂಜಿಸುವುದು ಸುಲಭದ ಮಾತಲ್ಲ.
ಈ ವಿಶೇಷ ಮೈಲಿಗಲ್ಲನ್ನು ಗಣೇಶ್ ಅವರು ತಮ್ಮ ಬಹುನಿರೀಕ್ಷಿತ ಸಿನಿಮಾವಾದ 'ಪಿನಾಕ' ಸೆಟ್ನಲ್ಲಿ ಚಿತ್ರತಂಡದ ಜೊತೆ ಸೇರಿ ಅದ್ದೂರಿಯಾಗಿ ಆಚರಿಸಿದ್ದಾರೆ.
'ಪಿನಾಕ' ಸೆಟ್ನಲ್ಲಿ ಸಂಭ್ರಮದ ಮಳೆ
ಪೀಪಲ್ ಮೀಡಿಯಾ ಫ್ಯಾಕ್ಟರಿ ನಿರ್ಮಿಸುತ್ತಿರುವ 'ಪಿನಾಕ' ಸಿನಿಮಾ ಗಣೇಶ್ ಅವರ ಕೆರಿಯರ್ನಲ್ಲೇ ಅತಿ ದೊಡ್ಡ ಸಿನಿಮಾ ಅಂತಾನೇ ಹೇಳಲಾಗುತ್ತಿದೆ. ಇಂತಹ ಬಿಗ್ ಬಜೆಟ್ ಸಿನಿಮಾದ ಶೂಟಿಂಗ್ ಸ್ಪಾಟ್ನಲ್ಲಿ ಗಣೇಶ್ ಅವರ 20 ವರ್ಷಗಳ ಸಾಧನೆಯನ್ನು ಕೇಕ್ ಕತ್ತರಿಸುವ ಮೂಲಕ ಆಚರಿಸಲಾಯಿತು. ನಿರ್ಮಾಪಕರಾದ ಟಿಜಿ ವಿಶ್ವಪ್ರಸಾದ್ ಮತ್ತು ಕೃತಿ ಪ್ರಸಾದ್ ಅವರು ಗಣೇಶ್ಗೆ ಅಭಿನಂದನೆ ಸಲ್ಲಿಸಿ ಗೌರವಿಸಿದರು. ಈಗಾಗಲೇ ಸಿನಿಮಾದ ಶೇ.80ರಷ್ಟು ಶೂಟಿಂಗ್ ಮುಗಿದಿದ್ದು, ತಾಂತ್ರಿಕವಾಗಿ ಸಿನಿಮಾ ಸಖತ್ ರಿಚ್ ಆಗಿ ಮೂಡಿಬರುತ್ತಿದೆ. ಬೇರೆ ಭಾಷೆಯ ಖ್ಯಾತ ಕಲಾವಿದರು ಕೂಡ ಈ ಸಿನಿಮಾದಲ್ಲಿ ನಟಿಸುತ್ತಿರುವುದು ವಿಶೇಷ.
ಲವರ್ ಬಾಯ್ ಇಮೇಜ್ ಬಿಟ್ಟು ಹೊಸ ಅವತಾರದಲ್ಲಿ ಗಣೇಶ್
ನಮಗೆಲ್ಲಾ ಗಣೇಶ್ ಅಂದ್ರೆ ಮಳೆಗಾಲದ ಪ್ರೇಮಿ, ಕಾಮಿಡಿ ಕಿಂಗ್ ಎಂದೇ ಗೊತ್ತು. ಆದರೆ 'ಪಿನಾಕ' ಸಿನಿಮಾದಲ್ಲಿ ಗಣೇಶ್ ಅವರು ಹಿಂದೆಂದೂ ಕಾಣಿಸಿಕೊಳ್ಳದ ವಿಶಿಷ್ಟ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಲವರ್ ಬಾಯ್ ಇಮೇಜ್ ಪಕ್ಕಕ್ಕಿಟ್ಟು ಹೊಸ ಅವತಾರದಲ್ಲಿ ಬರ್ತಿರೋ ಗಣೇಶ್ ಅವರನ್ನ ನೋಡೋಕೆ ಅಭಿಮಾನಿಗಳು ತುದಿಗಾಲಲ್ಲಿ ನಿಂತಿದ್ದಾರೆ.
ಅಭಿಮಾನಿಗಳ ಪ್ರೀತಿಗೆ ಭಾವುಕರಾದ ಗಣೇಶ್
ಸಂಭ್ರಮಾಚರಣೆಯ ವೇಳೆ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಗಣೇಶ್ ಅವರು ಸ್ವಲ್ಪ ಭಾವುಕರಾದರು. "ನಾನು ಇಂಡಸ್ಟ್ರಿಗೆ ಬಂದು 20 ವರ್ಷ ಆಯ್ತು. ಅಂದು ನೀವು ನನ್ನನ್ನು ಹೇಗೆ ಕೈ ಹಿಡಿದು ನಡೆಸಿದಿರೋ, ಅದೇ ಪ್ರೀತಿ ಇಂದಿಗೂ ಇದೆ. ಕಾಲ ಉರುಳಿದರೂ ನನ್ನ ಅಭಿಮಾನಿ ಬಳಗ ದೊಡ್ಡದಾಗುತ್ತಿರುವುದು ನನ್ನ ಪುಣ್ಯ. ಇಷ್ಟು ಗೌರವದಿಂದ ನನ್ನನ್ನು ನಡೆಸಿಕೊಳ್ಳುತ್ತಿರುವ ಪೀಪಲ್ ಮೀಡಿಯಾ ಫ್ಯಾಕ್ಟರಿ ಸಂಸ್ಥೆಗೆ ನಾನು ಚಿರಋಣಿ" ಅಂತ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.
ಚಿತ್ರರಂಗದಲ್ಲಿ 'ಮುಂಗಾರು ಮಳೆ'ಯಿಂದ ಶುರುವಾದ ಇವರ ಗೋಲ್ಡನ್ ಪಯಣ ಇಂದಿಗೂ ಅದೇ ವೇಗದಲ್ಲಿ ಸಾಗುತ್ತಿದೆ. 20 ವರ್ಷಗಳ ಕಾಲ ಕನ್ನಡಿಗರನ್ನು ನಗಿಸಿ, ಅಳಿಸಿ, ರಂಜಿಸಿದ ಗಣೇಶ್ ಅವರಿಗೆ ನಮ್ಮ ಕಡೆಯಿಂದಲೂ ದೊಡ್ಡದೊಂದು ಅಭಿನಂದನೆ.
